Hirimyas 29 - Hanunuu

Kay Surat ni Hirimyas para sa manga Binihag

¹ Ginan sa Hirusalim, sinmurat si Hirimyas sa manga manugpamahala, sa manga manughandug, sa manga purupita, ag sa iba waya pag manga dinara bihag ni Nabukudunusur sa Babilunya.

² Isinurat niya inda igu nabihag si Hari Hihuyakin, hanggan kay ina, hanggan diman ti kaawat sa balay hari, ti manga takinan sa Huda ag Hirusalim, ti manga madunung pag manugpanday hanggan ti manga manugtarabahu.

³ Ag ipinakaun ni Hirimyas ti surat sa kanda ni Ilasa kay anak ni Sapan ag ni Gimaryas kay anak ni Hilkiyas. Sida ti sinugu ni Hari Sidikyas tag kan Nabukudunusur sa Babilunya. Inda ti pagsabihun sa surat:

⁴ Inda ti pagsabihun Panginuun Makamaskihan, ti Diyus Israil, sa tanan taga Hirusalim kay ipinabihag sa Babilunya:

⁵ “Pagpatindug kamu manga balay bag-u ati kamu pag uli. Pagtanum kamu bag-u pagkaun kanyu patubas.

⁶ Pag-asawa kamu agud magkaanak kamu. Pabay-ani diman niyu mangasawa kanyu manga anak hampay yumamu gid kamu.

⁷ Pag-awat kamu hampay sa kaayadan ag kaalwanan banwa dinarahan sa kanyu. Idarangin niyu inda dahil nu umalwan inda, umalwan diman kamu.”

⁸ Magkun waya ti Panginuun Makamaskihan, ti Diyus Israil, “Danga kamu magpadaya sa kanyu manga purupita ngatay sa manga kaibahan niyu manughula. Danga kamu magpasnu sa kanda manga tagin-up.

⁹ Dahil magbagaw sida kapudilan sa ngaran niku. Balaw niku sida sinugu.

¹⁰ Aku, ti Panginuun, magsabi pagkalawuy 70 ka timpu kay nagsakup Babilunya, balikan niku kamu ag tupadun niku kang taratu kuntay ibalik niku kamu sa kanyu daga.

¹¹ Alam niku nu kabitay tupadun kang manga gayak para sa kanyu — gayak para sa kaayadan niyu ag balaw sa kadautan, gayak para pakan-an kamu pag-asa ag mayad pag aratubangun.

¹² Nu katida, manawag ag mandarangin kamu sa kangku, patingihan niku kamu.

¹³ Nu pakarani kamu sa kangku buu tagipusuun, awatan niku kamu.

¹⁴ Hu, awatan niku kamu ag ibalik di niku ginan sa pagkabihag. Tipunun niku kamu ginan sa tuhay-tuhay pag manga nasyun nu naan pag winayak niku kamu, ag ibalik sa kanyu sadili daga. Aku, ti Panginuun, ti magsabi inda.

¹⁵ “Barang sabihun niyu namadara aku sa kanyu manga purupita asan tag sa Babilunya,

¹⁶ dapat inda ti pagsabihun niku tungkul sa hari ginan sa linahi ni Dabid ag sa tanan niyu kasimanwa natayak sa banwa Hirusalim balaw nabihag kaibahan niyu:

¹⁷ Padaran-an niku sida girahan, lun-us ag sakit. Miparihu sida sa lugu igus sida unman makaun.

¹⁸ Ungud, lagsun sida girahan, lun-us ag sakit, bag-u kayagtingan sida tanan kaharian. Tabugun niku sida una lang naan-naan pag nasyun, bag-u saadan, kayagtingan, sida manga tawu ati.

¹⁹ Dahil balaw nida pinatingihan kang manga bagaw ti pirmi niku pagsabihun sa kanda sa panab-anan niku manga manugsirbi pag manga purupita. Ag hanggan kamu pag manga binihag balaw diman naniwala.” Aku, ti Panginuun, ti magsabi inda.

²⁰ Nakan pagpatingi kamu sa pagsabihun Panginuun, kamu pag manga ipinabihag niya ginan sa Hirusalim atabug sa Babilunya.

²¹ Inda ti pagsabihun Panginuun Makamaskihan, ti Diyus Israil, tungkul sa kanda ni Akab kay anak ni Kulaya ag Sidikyas kay anak ni Maasiyas, “Nagbagaw sa kanyu kapudilan inda pag manga tawu sa ngaran niku. Nakan ngani ipakaun niku sida sa kan Hari Nabukudunusur sa Babilunya, bag-u sida kay ipamatay sa atubangan ngapu niyu.

²² Dahil sa kanda, ti tanan bihag sa Babilunya manga taga Huda manaad kaindaay sa kanda kaparihu, ‘Mana matyun kawu Panginuun parihu sa kanda ni Sidikyas ag ni Akab sinunug hari Babilunya.’

²³ Mangyari inda sa kanda dahil nagbuwat sida manga mayagting pag bagay sa Israil. Nanguragin sida sa asawa nida kaparihu ag nagbagaw kapudilan sa ngaran niku balaw kang pag-isugu kuntay buwatun nida. Magkaalaman niku kanda manga pagbuwatun, bag-u makapatutuu aku laban sa kanda. Aku, ti Panginuun, ti magsabi inda.”

Ti Itinultul para sa kan Simaya

^24-25 Ti Panginuun Makamaskihan, ti Diyus Israil, nag-ayaw sa kangku tultulanun para sa kan Simaya taga Nihilam. “Inda kay pagsabihun: Simaya, sa panab-anan lang nimu ngaran namadara kawu surat sa kan Sipaniyas kay anak ni Maasiyas usa ka manughandug, ag pinadaran-an diman nimu kupya ti iba waya pag manga manughandug, hanggan ti tanan taga Hirusalim. Angay sa kanmu surat sa kan Sipaniyas, magkun kawu,

²⁶ ‘Pinili kawu Panginuun kailis ni Hihuyada bilang pangulu manughandug Balay Diyus. Karampatan nimu magdakup hanggan magpauli tarikada sa liug manga magpabalhinguun purupita.

²⁷ Hayga balaw nimu inampara si Hirimyas taga Anatut kuntay magsabi purupita siya asan sa kanyu?

²⁸ Nanusurat waya siya atay sa kanmi sa Babilunya kuntay kami madugay waya atay. Nakan angay sa kanya, pagpatindug kunu kami manga balay ag sitay yi kami pag mangulian, pagtanum ag pagkaun kami kanmi inani.’ ”

²⁹ Pagka natanggap ni Sipaniyas ti surat ni Simaya, binasa niya inda sa kan purupita Hirimyas.

³⁰ Bag-u magkun ti Panginuun sa kan Hirimyas,

³¹ “Ipadara nimu inda pag tultulanun sa tanan bihag. Sabihun nimu sa kanda inda ti pagsabihun niku tungkul sa kan Simaya taga Nihilam, ‘Balaw niku sinugu si Simaya hampay mamagaw sa kanyu. Pinaumang niya kamu sa kay kapudilan.

³² Nakan aku, ti Panginuun, magsabi parusahan niku siya hanggan kay manga linahi. Una di usa sa kay manga linahi unman kumakit sa manga mayad pag bagay kang buwatun sa kanyu, dahil tinudluan niya kamu maglaban sa kangku. Aku, ti Panginuun, ti magsabi inda.’ ”