Hirimyas 28 - Hanunuu

Si Hirimyas ag si Purupita Hananiyas

¹ Katpung ati diman pag timpu, sa ikalima pag bulan sa ikap-at pag timpu kay maghari ni Sidikyas sa Huda, may pagsabihun sa kangku si Purupita Hananiyas kay anak ni Asur taga Gibyun ati sa Balay Diyus Panginuun, sa atubangan manga manughandug ag manga tawu siyun. Magkun siya,

² “Inda ti pagsabihun Panginuun Makamaskihan, ti Diyus Israil, ‘Bul-un yi niku ti kapangyarihan hari Babilunya.

³ Sa sulud duwa ka timpu, ibalik yi niku sitay ti tanan garamitun sa kang Balay, ti bin-ul ni Hari Nabukudunusur ag dinara sa Babilunya.

⁴ Pabalikun diman niku sitay si Hari Hihuyakin sa Huda kay anak ni Hihuyakim hanggan ti tanan taga Huda binihag sa Babilunya, dahil bul-un yi niku ti kapangyarihan hari Babilunya. Aku, ti Panginuun, ti magsabi inda.’ ”

⁵ Bag-u sinmagut si Purupita Hirimyas sa kan purupita Hananiyas ati sa atubangan manga manughandug ag manga tawu matindugan sa Balay Diyus Panginuun.

⁶ Magkun siya, “Amin! Buwatun mana tida Panginuun! Mana buwatun Panginuun kanmu pagsabihun darahun niya iuli sitay ti manga garamitun sa Balay Diyus hanggan ti tanan manga binihag sa Babilunya.

⁷ Dapat ay patingihi nimu inda kang sabihun sa kanmu ag sa tanan manga magpatingi sitay.

⁸ Ti manga purupita inmuna sa kanta magsabi kaybi kuntay rumas-ug ti girahan, lun-us, ag sakit sa mayamu pag nasyun hanggan sa manga bantug pag kaharian.

⁹ Ti manabi kahusayan pag purupita kailangan mapatutuuhanan. Nu matupad kay pagsabihun kahusayan, kilalan-un siya tutuu gid pag purupita Panginuun.”

¹⁰ Bag-u bin-ul ni purupita Hananiyas ti singkaw sa liug ni Hirimyas bag-u kay binari.

¹¹ Ag magkun siya sa manga tawu siyun, “Inda ti pagsabihun Panginuun: Ti manga nasyun nasakup ni Hari Nabukudunusur sa Babilunya ga pinaulian singkaw. Dapat dautun niku tunda pag singkaw sa sulud duwa ka timpu.” Rargu ginminan si Hirimyas.

¹² Balaw nadugay, pagkalawuy bariun ni Purupita Hananiyas ti singkaw sa liug ni Hirimyas, magkun ti Panginuun sa kan Hirimyas,

¹³ “Atihun nimu si Hananiyas ag sabihun nimu inda ti pagsabihun niku: Binari nimu ti singkaw kayu dapat ilisan niku tunda singkaw baul.

¹⁴ Aku, ti Panginuun Makamaskihan, ti Diyus Israil magsabi: Ipapas-an niku ti singkaw baul sa tanan nasyun, hampay manirbi sida sa kan Hari Nabukudunusur sa Babilunya. Hanggan ti manga maraisug pag hayup ipasakup niku sa pagdumara niya.”

¹⁵ Bag-u sinabi ni Purupita Hirimyas sa kan Purupita Hananiyas, “Hananiyas, pagpatingi kawu! Balaw kawu sinugu Panginuun, dapat pinabuyu nimu inda pag nasyun sa kapudilan nimu.

¹⁶ Nakan inda ti pagsabihun Panginuun, ‘Madura kawu sa inda pag kalibutan. Mamatay kawu sa inda diman pag timpu dahil tinudluan nimu ti manga tawu manlaban sa kangku.’ ”

¹⁷ Nakan katpung sa ikapitu pag bulan sa tida diman pag timpu, namatay si Purupita Hananiyas.