Hirimyas 27 - Hanunuu

Namauli Singkaw sa Kay Liug si Hirimyas

^1-2 Katpung umpisa maghari si Sidikyas kay anak ni Hari Husyas sa Huda, magkun sa kangku ti Panginuun, “Hirimyas, pagbuwat kawu singkaw, paulii nimu higut bag-u ipauli nimu sa kanmu tingdun.

³ Bag-u sabihun nimu inda sa manga hari sa Idum, Muab, Amun, Tiru ag Sidun sa panab-anan manga sinugu nida sa Hirusalim hampay pumasampak kan Hari Sidikyas sa Huda.

⁴ Sabihun nimu sa kanda inda pag tultulanun para sa kanda manga hari: ‘Inda ti pagsabihun Panginuun Makamaskihan, ti Diyus Israil:

⁵ Sa panab-anan niku kamaskihan linalang niku ti kalibutan, ti manga tawu hanggan ti manga hayup. Aku ti may karampatan nu si unu kang piyaran inda.

⁶ Nakan taynguna, ipakaun niku kanyu manga nasyun sa kang manugsirbi sa kan Hari Nabukudunusur sa Babilunya. Una hanggan ti manga maraisug pag hayup ipasakup niku sa kanya.

⁷ Ti tanan nasyun sumirbi sa kanya, sa kay anak, hanggan sa kay laki tugka sa marangga ti kaharian Babilunya. Bag-u ti Babilunya maan ti sumirbi sa mayamu pag nasyun hanggan sa manga makapangyarihan pag hari.

⁸ “ ‘Dapat nu may nasyun ngatay kaharian dayu mansirbi ngatay pumasakup sa kan Hari Nabukudunusur sa Babilunya, aku ti pumarusa sa nasyun ngatay sa ati pag kaharian sa panab-anan girahan, lun-us, ag sakit tugka sa mipasakup niku sida sa kan Nabukudunusur. Aku, ti Panginuun, ti magsabi inda.

⁹ Nakan danga kamu magpaniwala sa kanyu manga purupita hanggan manga manughula, ag manga manugpaliwanag tungkul sa manga tagin-up, una sa manga panhirian ngatay manga tihulan magkumun balaw kamu sakupun hari Babilunya.

¹⁰ Kapudilan ti pagsabihun nida sa kanyu. Ag nu maniwala kamu sa kanda paighitun niku kamu sa kanyu daga. Palayasun ag rurisun niku kamu.

¹¹ Dapat ti pumasakup ag sumirbi pag manga nasyun sa hari Babilunya pumirmaminti sa sadili nida banwa. Siyun sida pag mangulian, bungkagun nida kanda sadili daga. Aku, ti Panginuun, ti magsabi inda.’ ”

¹² Inda diman ti pagsabihun niku sa kan Hari Sidikyas sa Huda. Magkun aku, “Pagpasakup kamu sa hari Babilunya. Pagsirbi kamu sa kanya hanggan sa kay nasakupan niya hampay mabuhi kamu.

¹³ Dahil nu balaw, mamatay kamu hanggan ti manga nasakupan niyu sa girahan, lun-us ag sakit parihu sa pagsabihun Panginuun mangyari sa manga nasyun balaw manirbi sa hari Babilunya.

¹⁴ Danga kamu magpasnu sa pagsabihun manga purupita kuntay balaw kamu sakupun hari Babilunya, dahil kapudilan ti pagsabihun nida sa kanyu.

¹⁵ Inda ti pagsabihun Panginuun, ‘Balaw niku sinugu tunda pag manga purupita. Magbagaw sida kapudilan sa ngaran niku. Nakan nu mamasnu kamu sa kanda, palayasun niku kamu ag rurisun hanggan tunda pag manga purupita.’ ”

¹⁶ Bag-u sinabi niku sa manga manughandug ag sa tanan tawu, “Magkun ti Panginuun mana danga kamu magpasnu sa manga purupita magsabi kuntay arani yi ibalik ti manga garamitun sa Balay Diyus ginan sa Babilunya. Kapudilan kanda pagsabihun sa kanyu.

¹⁷ Danga kamu magpasnu sa kanda. Pagsirbi kamu sa hari Babilunya hampay mabuhi kamu. Kailangan aw waya mawayak inda pag banwa?

¹⁸ Nu ungud manga purupita sida ag ginan sa Panginuun kanda pagsabihun, pagdarangin sida sa Panginuun Makamaskihan kuntay ti manga garamitun natayak sa Balay Diyus sa balay hari sa Huda ag sa Hirusalim danga yi darahun tag sa Babilunya.

¹⁹ Dahil pagsabihun Panginuun Makamaskihan kuntay ti manga galang tulduk sa Balay Diyus, ti palaulian danum pag ingarnan Dagat, ti manga kalisa, ag tuhay waya pag manga garamitun sa banwa inda darahun sa Babilunya.

²⁰ Ti manga pagsabihun pag garamitun balaw dinara ni Hari Nabukudunusur sa Babilunya katpung binihag niya si Hari Hihuyakin kay anak ni Hari Hihuyakim sa Huda, kaibahan manga takinan sa Huda ag Hirusalim.

^21-22 Dapat taynguna, inda ti pagsabihun Panginuun Makamaskihan, ti Diyus Israil, ‘Darahun sa Babilunya inda pag manga garamitun ag pumirmaminti ati tugka sa rumas-ug ti sirang bul-un niku inda ag ibalik sa Hirusalim.’ ”