Hirimyas 26 - Hanunuu

Naribri sa Kamatayan si Hirimyas

^1-2 Katpung umpisa maghari si Hihuyakim kay anak ni Hari Usyas sa Huda, magkun sa kangku ti Panginuun, “Pagtindug kawu sa sugkadan Balay Diyus, bag-u sabihun nimu sa tanan nasakupan banwa Huda linmuwang hampay mansamba sa Balay Diyus ti tanan pag-isugu niku sa kanmu. Danga gid nimu inda pagbawasi.

³ Barang abi mamatingi sida sa kanmu ag pumatlikud sa daut nida ugali. Nu kanda buwatun inda, balaw yi niku iparargu kang gayak kadamhakan sa kanda dahil sa kanda daut pag manga buwat.

⁴ Sabihun nimu sa kanda inda kang pagsabihun: Nu dayu kamu magpatingi sa kangku ag dayu magsunud sa kang ipinakaun pag sugu sa kanyu,

⁵ ag nu dayu kamu magpatingi sa pagsabihun manga manugsirbi niku pag purupita ti pirmi niku pagsuguun tag sa kanyu dapat unman niyu pagpatingihan,

⁶ dautun niku inda pag Balay Diyus parihu sa binuwat niku sa Silu. Inda pag banwa saadan tanan nasyun sa buu kalibutan!”

⁷ Nadnugan manga manughandug, manga purupita, ag tanan manga tawu ati sa Balay Diyus Panginuun ti pagsabihun ni Hirimyas.

⁸ Pagka nasabi niya inda, pinalibutan siya manga manughandug, manga purupita, hanggan manga tawu, bag-u sinabihan siya, “Kailangan kawu matyun!

⁹ Hayga kanmu pagsabihun sa ngaran Panginuun kuntay inda pag Balay Diyus dautun parihu sa Silu, ag inda pag banwa bumaliw mapung-aw udyi may mangulian?” Nakan dinakup nida si Hirimyas sa Balay Diyus Panginuun.

¹⁰ Pagka nadnugan inda manga may kangaranan sa Huda, ginminan sida sa balay hari ag nag-ati sa Balay Diyus. Tinmukaw sida sa may lakawan sa Bag-u Sabian Balay Diyus hampay manhusay.

¹¹ Magkun ti manga manughandug ag manga purupita sa manga may kangaranan hanggan sa tanan tawu siyun, “Kailangan sintinsiyahan kamatayan inda pag tawu dahil nagbagaw siya laban sa inda pag banwa. Nadnugan diman niyu kay pagsabihun!”

¹² Magkun maan si Hirimyas sa tanan manga may kangaranan ag sa tanan tawu: “Sinugu aku Panginuun sa pagbagaw laban sa inda pag Balay Diyus ag sa inda pag banwa, parihu sa nadnugan niyu.

¹³ Nakan bag-uha yi niyu kanyu ugali ag pangabuhi, bag-u pagsunud yi kamu sa Panginuun kanyu Diyus. Dahil nu inda buwatun niyu, balaw yi iparargu Panginuun ti pagsabihun niya pag kadamhakan laban sa kanyu.

¹⁴ Ag nu tungkul waydi sa kangku, unman aku may mabwat. Buwata niyu sa kangku nu hintay ti mayad ag matadlung para sa kanyu.

¹⁵ Dapat tandai niyu inda: nu matyun niyu aku, may saragtun kamu hanggan ti nasakupan sa inda pag banwa dahil sa pagmatay niyu sa tawu unman may kasalanan. Dahil tutuu aku ungud sinugu Panginuun hampay sabihun sa kanyu ti tanan nadnugan niyu taynguna.”

¹⁶ Magkun ti manga may kangaranan hanggan ti manga tawu sa manga manughandug ag manga purupita, “Balaw kailangan sintinsiyahan sa kamatayan inda pag tawu dahil nagbagaw siya sa kanta sa ngaran Panginuun nita Diyus.”

¹⁷ Bag-u may pira ka paggurangunun ti tinmindug sa atubangan ag magkun sa manga tawu magtiripnan siyun,

¹⁸ “Katpung si Isikyas ti hari sa Huda, nagbagaw si Mikas taga Murisit tungkul sa pag-ipasabi Panginuun sa tanan taga Huda. Magkun siya, ‘Magkun ti Panginuun Makamaskihan wayakun niya ti Siun, ti banwa Hirusalim. Inda miparihu sa inaradu pag tanman, tap-ukan manga nagkaragba daraka balay ag bumaliw katalunan ti bantud nagpatindugan Balay Diyus.’

¹⁹ Minatay aw siya ni Isikyas aw ngatay una si unu ati sa Huda? Unman! Bagkus ngap, nadala si Isikyas sa Panginuun ag nagpakarani siya sa kanya. Nakan balaw ipinatarus Panginuun ti pagsabihun niya pag kadamhakan laban sa kanda. Nakan nu matyun niyu si Hirimyas, kamu diman waydi ti pumarusa sa kanyu sadili.”

²⁰ Pagka sa ati diman pag udas, may usa waya ka nagbagaw tungkul sa pag-ipasabi Panginuun. Siya si Uryas kay anak ni Simaya taga Kiryat Harim. Nagbagaw diman siya laban sa inda pag banwa hanggan sa inda pag nasyun parihu sa kay pagsabihun ni Hirimyas.

²¹ Pagka nadnugan ni Hari Hihuyakim hanggan tanan may kangaranan ag manga manugpamahala niya ti pagsabihun ni Uryas, ginayak nida matyun siya. Dapat naalaman inda ni Uryas, nakan nalagiw siya atagbug sa Ihiptu dahil sa kadalaan.

²² Dapat sinugu ni Hari Hihuyakim si Ilnatan kay anak ni Akbur hanggan ti iba waya pag manga tawu kuntay pag-atag sa Ihiptu.

²³ Bin-ul nida si Uryas ati sa Ihiptu bag-u dinara sa kan Hari Hihuyakim, ag ipinamatay niya inda sa panab-anan baladaw, ag iyinmut kay bangkay sa kalubngan manga basta lang pag tawu.

²⁴ Dapat si Hirimyas inawatan ni Ahikam kay anak ni Sapan, nakan balaw siya minatay manga tawu.