Hirimyas 25 - Hanunuu

Ti 70 ka Timpu Pagkabihag

¹ Inda pag tultulanun para sa manga taga Huda. Ipinakaun Panginuun sa kan Hirimyas katpung ikap-at pag timpu kay maghari ni Hihuyakim kay anak ni Hari Husyas sa Huda. Inda ti un-an timpu kay maghari ni Nabukudunusur sa Babilunya.

² Magkun si Purupita Hirimyas sa tanan taga Huda hanggan sa tanan magpangulian sa Hirusalim:

³ Sa sulud 23 ka timpu ginan sa ika-13 pag timpu kay maghari sa Huda ni Husyas kay anak ni Hari Amun tugka taynguna, ti Panginuun maghampang sa kangku. Ag parargu waydi pagsabihun niku sa kanyu ti pag-ipasabi niya, dapat unman kamu namatingi.

⁴ Una parargu waya mamadara tag sa kanyu ti Panginuun kay manga manugsirbi purupita, unman diman niyu pagbatiun ag balaw kamu magpatingi.

⁵ Magkun ti Panginuun sa panab-anan nida, “Patlikudi yi niyu kanyu manga daut pag ugali hanggan buwat hampay parargu kamu mangulian hanggan aban sa inda pag daga inayaw niku sa kanyu ag sa manga ginurang niyu.

⁶ Danga kamu magsamba ag magsirbi sa manga diyus-diyusan, ag danga aku paggalita sa panab-anan diyus-diyusan binuwat lang niyu, hampay balaw kamu kang parusahan.”

⁷ Dapat unman kamu namatingi sa Panginuun. Lalu waya niyu siya ginalit sa panab-anan manga binuwat niyu diyus-diyusan. Nakan kamu diman ti nagdara parusa sa kanyu sadili.

⁸ Nakan inda ti pagsabihun Panginuun Makamaskihan, “Dahil unman kamu namatingi sa kang manga pagsabihun,

⁹ ipagira niku kamu sa manga sundalu ginan sa kanaway pagpangunahan niku manugsirbi ni Hari Nabukudunusur sa Babilunya. Girahun niya inda pag daga ag ti manga nasakupan inda, hanggan ti tanan nasyun sa kay sangput. Rurisun niku kamu lubus, madiklahan gid ti manga tawu sa malakawan niyu, puyaan kamu iba dahil lubus kamu rangga hanggan aban.

¹⁰ Madura ti kasulungan ag kabayaan niyu. Unman diman madnugan ti kabayaan manga bag-u ipinaasawa. Udyi may man-galing tirigu hanggan manulu sulul-an nu yabi.

¹¹ Bumaliw mapung-aw inda pag daga. Inda pag nasyun hanggan ti manga nasyun sa kay kalibut sumirbi sa hari Babilunya sa sulud pitumpulu ka timpu.

¹² “Dapat pagkalawuy 70 ka timpu, parusahan diman niku ti hari Babilunya hanggan ti manga nasakupan niya dahil sa manga kasalanan nida. Ag buwatun diman niku maruku kanda nasyun hanggan aban.

¹³ Iparanas niku sa kanda nasyun ti tanan pagsabihun niku laban sa kanda ag sa iba waya pag manga nasyun angay sa binagaw ni Hirimyas nakasurat sa inda pag ribru.

¹⁴ Buwatun sida suruguun sa mayamu manga nasyun hanggan manga makapangyarihan pag hari. Parusahan niku sida angay sa kanda manga binuwat.”

Ti Ungut Punu Pangagalit Diyus

¹⁵ Magkun sa kangku ti Panginuun, ti Diyus Israil, “Bul-a nimu sa kang kamang ti ungut punu pangagalit niku, ipainum nimu sa tanan nasyun nu naan tag kawu pag-ipadara niku.

¹⁶ Nu mainum yi nida inda, manalayib-layib sida ga sa magkapaung, dahil sa girahan ipadara niku sa kanda.”

¹⁷ Nakan bin-ul niku ti ungut sa kamang Panginuun ag pinainum niku ti tanan nasyun nu naan aku pag isinugu niya.

¹⁸ Pinainum niku ti Hirusalim hanggan ti manga banwa sa Huda kaibahan kanda manga hari ag manga may kangaranan agud midamhak sida. Madiklahan ti manga tawu sa mangyari sa kanda. Puyaan ag saadan sida parihu sa pagbuwatun sa kanda taynguna.

¹⁹ Pinainum diman niku ti hari Ihiptu, hanggan kay manga may kangaranan ag manga takinan, ag ti tanan nasakupan niya,

²⁰ hanggan ti manga balaw Ihipsiyu magpangulian ati. Pinainum diman niku ti manga hari hanggan ti manga nasakupan inda pag manga rugar: Ti Us, ti banwa Pilistiya (kay manga hari nandumara sa Askalun, sa Gasa, sa Ikrun, ag sa Asdud),

²¹ ti Idum, ti Muab, ti Amun,

²² ti Tiru, ti Sidun, ti manga puru sa dipay dagat,

²³ ti Didan, ti Tima, ti Bus, ti manga ati sa ararayu pag rugar,

²⁴ ti Arabya, ti manga linahi sa pangawakawaan,

²⁵ ti Simri, ti Ilam, ti Midya,

²⁶ ti manga nasyun sa kanaway, ararayu man ngatay ararani, hanggan ti tanan kaharian sa buu kalibutan. Ag ti uryan painman, ti Babilunya.

²⁷ Bag-u magkun sa kangku ti Panginuun, “Sabihun nimu sa inda pag manga nasyun kuntay aku, ti Panginuun Makamaskihan, ti Diyus Israil, magsabi: ‘Sigi, pag-inum kamu sa ungut pangagalit niku tugka sa malangu, mansuka, ag maplid kamu, ag udyi makabangun dahil padarahan niku kamu girahan.’

²⁸ “Dapat nu dayu sida manginum, sabihun nimu sa kanda kuntay aku, ti Panginuun Makamaskihan ti magsabi, ‘Kailangan pag-inum kamu!

²⁹ Pag-umpisahan yi niku pagpadarahan kaparusahan ti Hirusalim, ti pinili niku pag banwa hampay sa kadayawan niku. Taynguna kanyu aw isip balaw niku kamu parusahan? Parusahan gid niku kamu! Dahil palabanun niku ti tanan nasyun sa buu kalibutan. Aku, ti Panginuun, ti magsabi inda.’

³⁰ “Hirimyas, sabihun nimu sa kanda ti tanan pagsabihun niku, ag sabihun waya nimu, ‘Manringgit ti Panginuun ginan sa langit; mangurarug kay busis ginan sa banal niya pag ulian. Manringgit siya mabaskug sa manga pinili niya. Manringgit diman siya sa tanan mag-uli sa kalibutan ga tawu magringgit habang magpigis siya ubas.

³¹ Madnugan kay busis sa buu kalibutan, dahil ihabla niya ti manga nasyun. Sintinsiyahan niya ti tanan, ag ipamatay sa girahan ti manga daut.’ Aku, ti Panginuun, ti magsabi inda.”

³² Magkun waya ti Panginuun Makamaskihan, “Pagdahan kamu! Ti kadamhakan rumas-ug sa tuhay-tuhay pag nasyun ga mabaskug pag bagyu ginan sa pinakaarayu pag bahagi kalibutan.”

³³ Sa ati pag sirang, mayamu ti matyun Panginuun, kanda manga bangkay manwayak-wayak una naan sa buu kalibutan. Unman yi may manhimanglaw, manipun ag manlubung sa kanda. Pabay-anan yi lang sida ga ugat sa babaw daga.

³⁴ Kamu pag manga takinan, paglumi kamu ka bisug, palilid kamu sa daga dahil sa karukuan. Dahil rinmas-ug yi ti sirang matyun kamu parihu sa mag-iyaw karanidu. Marunut kamu ga mahalaga pag anglit nabasag.

³⁵ Unman gid kamu may mapalagiwan rugar, unman kamu makalayas.

³⁶ Madnugan kanyu lulumian hanggan arunghung, dahil rinuris Panginuun kanyu manga nasakupan.

³⁷ Ag dahil sa masyadu pag pangagalit Panginuun bumaliw tigangan pag daga ti abunda pag pasturan.

³⁸ Ti Panginuun ga liyun magluwas sa lukib hampay manligaw kay turukbun. Bumaliw mapung-aw kanyu daga dahil sa paggira kalaban, hanggan dahil sa masyadu pangagalit Panginuun.