Hirimyas 24 - Hanunuu

Ti Duwa ka Baskit Punu Igus

¹ May ipinakakit ti Panginuun sa kangku pagkalawuy bihagun ni Nabukudunusur hari Babilunya si Hihuyakin hari Huda, anak ni Hihuyakim. Si Hihuyakin dinara atag sa Babilunya hanggan ti manga takinan niya, ag ti manga anad pag manugpanday hanggan manugtarabahu sa Huda. Sa kang pangakakitun nakitan niku ti duwa ka alat igus ati sa atubangan Balay Diyus Panginuun.

² Ti manga igus sa usa ka alat marinu, lutu, ag bag-u puti. Dapat ti manga igus waydi sa usa ka alat nalugu yi ag balaw yi makaun.

³ Bag-u namaingana sa kangku ti Panginuun, “Hirimyas, hintay kanmu nakitan?” Sinmagut aku, “Manga igus duy. Ti iba mayad gid, dapat ti iba duy nalugu yi ag balaw yi makaun.”

⁴ Bag-u magkun sa kangku ti Panginuun,

⁵ Aku ti Panginuun, ti Diyus Israil, magkumun kilalan-un niku ga manga mararinu pag igus ti manga Israilita kang ipinabihag sa manga taga Babilunya.

⁶ Dahanan niku sida hampay mayad kanda kahamtangan bag-u ipabalik niku sida sa inda pag daga. Utru niku sida ipatindug ag balaw yi rurisun. Parig-unun niku sida ag balaw yi ayitun.

⁷ Pakan-an niku sida tagipusuun makakilala sa kangku kuntay aku ti Panginuun. Sida kang yi nasakupan ag aku kanda yi Diyus, dahil bumalik yi sida sa kangku sa buu nida tagipusuun.

⁸ “Dapat si Hari Sidikyas sa Huda baliwun niku ga lugu igus balaw yi makaun, hanggan ti manga takinan niya ag ti tanan taga Israil nasawad buhi sa Hirusalim una sa Ihiptu.

⁹ Buwatun niku sida mayagting sa tanan nasyun sa buu kalibutan. Puyaan ag saadan sida sa tanan nasyun nu naan pag wayakun niku sida.

¹⁰ Padaran-an niku sida gira, lun-us ag sakit tugka sa mamatay sida sa daga ipinakaun niku sa kanda hanggan sa manga kagurangan nida.”