Hirimyas 23 - Hanunuu

Ti Pagsarigan Rumas-ug

^1-2 Magkun ti Panginuun, ti Diyus sa Israil, “Kaawaawa kamu pag manga takinan manga nasakupan niku! Kamu mana ti mangalaga sa kang manga nasakupan parihu sa manug-alaga karanidu, dapat pinabay-anan lang niyu sida mamatay ag mawayak. Nakan dahil sa pinanwayak niyu kang manga nasakupan ag balaw niyu inalagaan, parusahan niku kamu. Hu, parusahan ngani niku kamu dahil sa binwat niyu kadautan.

³ Aku ngapu ti tumipun sa manga nasawad niku pag nasakupan ginan sa tuhay-tuhay pag rugar nu naan niku sida pag pinanwayak, ag darahun niku sida ibalik sa kanda daga bag-u yumamu maan sida ati.

⁴ Pakan-an niku sida manga takinan imaw ti mangalaga sa kanda; balaw yi sida madala hanggan mataranta. Udyi may tumalang sa kanda. Aku, ti Panginuun, ti magsabi inda.”

⁵ Magkun waya ti Panginuun, “Rumas-ug ti sirang pahariun niku ti usa ka hari matadlung ginan sa linahi ni Dabid. Humari siya may kadunungan, ag palantagun niya ti katadlungan ag katutuuhanan sa inda pag daga.

⁶ Inda pag ngaran ti iingaran sa kanya: ‘Ti Panginuun Kanta Katadlungan.’ Sa tunda pag udas maribri ti Huda ag magkaimaw kahusayan sa Israil.

⁷ “Sa ati katpung pag udas, balaw yi manumpa ti manga tawu magkun, ‘Magsumpa aku sa ngaran buhi pag Panginuun, ti nagpalpas sa manga taga Israil ginan sa Ihiptu!’

⁸ Bagkus ngap, sabihun nida, ‘Magsumpa aku sa ngaran buhi pag Panginuun, ti nagpalpas sa manga linahi Israil ginan sa manga nasyun sa kanaway hanggan sa tanan nasyun nu naan pag ikinalat niya sida.’ Ag mangulian yi sida sa kanda sadili daga.”

Ti Parusa sa manga Pudilun pag Purupita

⁹ Magkarunut kang tagipusuun dahil sa manga pudilun pag purupita. Pagtakigan hanggan kang manga but-ul, ga langu aku dahil sa banal pag tultulanun Panginuun laban sa kanda.

¹⁰ Napnu ti daga manga tawu magsamba sa manga diyus-diyusan, dahil magbuwat kadautan ti manga purupita ag pagsamantalahun kanda kapangyarihan. Ag dahil siyun sinaadan Panginuun ti daga, nakan nauga ag narubay ti manga tanum.

¹¹ Dahil inda ti pagsabihun Panginuun: “Ti manga manughandug parihu diman sa manga purupita. Parihu sida mauring ag magbuwat diman kadautan una sa kang Balay.

¹² Nakan bumaliw madlum ag maganuy kanda dalan. Madayaan ag mitalakpa sida dahil iparas-ug niku sa kanda ti kadamhakan sa udas parusahan niku sida. Aku, ti Panginuun, ti magsabi inda.

¹³ “Nakitan niku daut masyadu ti manga purupita sa Samarya, dahil magpanhula sida sa ngaran ni Baal ag pagpatalangun nida ti manga nasakupan niku manga Israilita.

¹⁴ Dapat nakitan diman niku mas daut waya ti pagbuwatun manga purupita sa Hirusalim, dahil magpanguragin sida ag magpudil waya. Pagpabisugun nida ti nalub-anan manga daut pag tawu hampay bumuwat waya kadautan, nakan udyi sida magpatlikud sa kanda kadautan. Ti manga taga Hirusalim parihu kay ka daut sa manga taga Suduma ag Gumura.

¹⁵ “Nakan ngani, aku, ti Panginuun Makamaskihan, magkumun tungkul sa inda pag manga purupita: Pakaunun niku sida mapait pag karan-unun ag painmun niku sida irinmun may hilu dahil sa kanda naglantap ti kadautan sa buu daga.”

¹⁶ Magkun ti Panginuun Makamaskihan sa manga taga Hirusalim, “Danga kamu magpasnu sa pagsabihun manga pudilun pag purupita. Pagpasarigun lang nida kamu sa manga kapudilan. Balaw ginan sa kangku kanda manga pagsabihun pangakakitun, nu unman ginan lang sa kanda sadili naisipan.

¹⁷ Inda ti pirmi nida pagsabihun sa manga tawu dayu magpatingi sa kang manga bagaw ag magsunud sa maganit nida tagipusuun: ‘Bumaliw mayad kanyu kahamtangan. Unman may daut mangyari sa kanyu.’

¹⁸ Dapat si unu pag manga purupita ti nakaalam sa kang pag-isipun? Unman ngani sida nagpatingi sa kang manga bagaw ngatay nagpahalaga sa kang manga sinabi.

¹⁹ Pagpatingi kamu! Kang pangagalit ga sa bagyu ngatay buhawi humampak sa ulu inda pag manga tawu daut.

²⁰ Balaw gid madura kang pangagalit tugka sa unman niku magkabuwat kang gustu buwatun. Ag sa uryan sirang, lubus niyu masalman inda.

²¹ Balaw niku sinugu tunda pag manga purupita, dapat ay naglakaw diman sida. Unman aku may sinabi sa kanda, dapat ay magtultul diman sida.

²² Nu alam lang nida nu hintay ti sa isip niku, sinabi yi mana nida kang manga bagaw sa kang manga nasakupan, hampay patlikudan nida kanda daut pag ugali ag manga pagbuwatun.

²³ Aku pag Diyus asan sa tanan rugar, balaw sa usa lang ka rugar.

²⁴ Una si unu unman may makapatagu sa kangku una naan pag lihim rugar mag-akitan di niku. Balaw aw alam niyu kuntay aku ati sa langit, asan sa daga ag una naan? Aku, ti Panginuun, ti magsabi inda.

²⁵ “Nadnugan niku ti manga pagsabihun manga purupita magbagaw kapudilan sa ngaran niku. Pagsabihun nida pinakan-an kunu niku sida tultulanun sa panab-anan tagin-up.

²⁶ Tugka kapira waya nguna sida mamagaw kapudilan ginan sa sadili nida naisipan?

²⁷ Sa panab-anan manga tagin-up nida tida ti pagsabihun nida sa manga tawu, pag-itulang nida kang manga nasakupan hampay kalimtan nida aku, parihu sa paglimut nida manga kaumputan sa kangku sa panab-anan nida pagsamba sa kan Baal.

²⁸ Pabay-ani niyu mamagaw inda pag manga purupita tungkul sa kanda manga tagin-up, dapat ti manga purupita nakadnug sa kang manga bagaw kailangan manultul inda may buu matinupadun. Dahil tuhay kanda manga tagin-up kaysa kang manga bagaw, parihu sa dayami tuhay sa tirigu.

²⁹ Unman aw makamaskihan kang manga bagaw? Parihu inda sa apuy makairub aw ngatay ga martilyu makarunut batu.

³⁰ “Nakan laban aku sa manga purupita paghuwadun lang ti tultulanun kaparihu nida purupita bag-u pagsabihun nida ginan kunu inda sa kangku.

³¹ Laban diman aku sa manga purupita magbuwat kay sadili tultulanun ag bag-u sabihun aku kunu ti magsabi tida.

³² Magtultulanun sida manga tagin-up balaw tutuu, nakan pagpatalangun nida kang manga nasakupan sa kanda manga kapudilan. Balaw niku sida pagsuguun ngatay pag sabihan pagbagaw, nakan unman sida may kaayadan maipakaun sa manga tawu. Aku, ti Panginuun, ti magsabi inda.

³³ “Hirimyas, nu may mamaingana sa kanmu usa ka nasakupan, ngatay purupita, aw ngatay manughandug nu unu ti pagsabihun niku, sabiha nimu dinayu niku sida.

³⁴ Nu may purupita, ngatay manughandug, ngatay una si unu ti magsabi kuntay siya kunu may tultulanun kuntay ginan kunu sa kangku, parusahan niku tida pag tawu hanggan kay magtal-anakan.

³⁵ Mas mayad waya mamaingana yi lang siya sa kay manga kakilala ngatay katawuhan niya nu hintay ti pagsabihun niku,

³⁶ kaysa sabihun niya, ‘May tultulanun aku ginan sa Panginuun.’ Dahil paggamitun lang inda iba hampay mapaangay nida kanda kaparihu, nakan paglikuun nida ti pagsabihun buhi pag Diyus, ti Panginuun Makamaskihan.

³⁷ “Hirimyas, nu mamaingana kawu sa usa ka purupita nu may tultulanun siya ginan sa kangku

³⁸ bag-u sabihun niya, ‘Hu, may tultulanun aku ginan sa Panginuun.’ Kailangan sabihun nimu sa kanya kuntay inda ti pagsabihun niku: ‘Dahil magkun kawu may tultulanun kawu ginan sa kangku, madi pag amparahun yi niku kawu manabi katida,

³⁹ kalimtan ag tabugun niku kawu ginan sa atubangan niku. Pabay-anan niku inda pag banwa ti ipinakaun niku sa kanmu manga ginurang.

⁴⁰ Ipauli niku kamu sa unman may katugkaan pag kakay-ahan balaw gid niyu malimtan hanggan aban.’ ”