Hirimyas 22 - Hanunuu

Ti Parusa Panginuun sa manga Hari sa Huda

¹ Magkun sa kangku ti Panginuun, “Pag-atag kawu sa balay hari sa Huda sabiha nimu inda pag tultulanun:

² Hari Huda, linahi ni Dabid, patingihi inda pag tultulanun Panginuun. Pagpatingi diman kanmu manga takinan hanggan nasakupan maglawuy sitay pag manga puwirtahan.

³ Inda ti pagsabihun Panginuun: Ilantag niyu ti katadlungan hanggan ti katuwiran. Awati niyu ti manga tinakawan, iribri niyu sida sa kamang manga tawu mag-api sa kanda. Danga niyu paghigpiti ngatay pag sakti ti manga day-uhan, ulila hanggan manga buranday mag-uli kaibahan niyu. Danga diman kamu magmatay sa manga tawu unman may kasalanan.

⁴ Nu sundun niyu inda pag manga sugu niku, pirmaminti humari sa Hirusalim kay linahi ni Dabid. Ti hari kaibahan kay manga takinan ag nasakupan, pumarada masakyan sa manga kalisa ag kabayu magsulud sa puwirtahan balay hari.

⁵ Dapat nu unman niyu sundun inda kang manga sugu, pag-isumpa niku sa kang sadili mawasak inda pag balay hari.”

⁶ Inda ti pagsabihun Panginuun tungkul sa balay hari sa Huda: “Para sa kangku, kanmu karinuan parihu sa Gilyad ngatay sa katayungtungan bantud Libanun. Dapat buwatun niku kawu ga pangawakawaan, parihu sa usa ka banwa unman may mag-uli.

⁷ Mamadara aku manga tawu man-guba sa kanmu. Ti kada usa sa kanda mandara manga gamit pan-guba. Pukanun nida kanmu manga tulduk sidru bag-u iyamut tag sa apuy.

⁸ Ti manga tawu ginan sa tuhay-tuhay pag nasyun maglawuy sa inda pag banwa mamaraingan-an, ‘Hayga nguna binuwat inda Panginuun sa may kadayawan pag banwa?’

⁹ Ag inda ti isagut sa kanda, ‘Dahil dinayu nida ti kasunduan Panginuun nida Diyus, bag-u nagsamba hanggan nagsirbi sida sa manga diyus-diyusan.’ ”

Ti Tultulanun tungkul sa kan Hihuahas

^10-11 Manga taga Huda, danga kamu maglumi sa pagkamatay ni Hari Usyas. Bagkus ngap, paglumi kamu lubus sa kay anak niya sa kan Hihuahas ti nag-ilis sa kanya bilang hari sa Huda. Dahil binihag siya ag unman yi siya makabalik waya. Nakan unman yi niya makitan uman inda pag daga kay linusadan. Dahil Panginuun ti nagsabi balaw yi siya makabalik.

¹² Mamatay siya sa daga nu naan siya pag dinara bihag. Balaw yi niya makitan uman inda pag daga.

Ti Tultulanun tungkul sa kan Hihuyakim

¹³ Kaawaawa gid kawu Hihuyakim, nagbungsud kawu kanmu balay hari sa panab-anan daut pag paraan. Pinatarabahu nimu kanmu kaparihu una unman may upa.

¹⁴ Magkun kawu, “Mamatindug aku balay hari daraka kay sulud-sulud sa tungud. Paulian niku inda daraka pag gaha hanggan lingub tabla sidru. Bag-u papinturahan niku maragang.”

¹⁵ Kanmu aw hantup bumaliw kawu may kadayawan pag hari nu mamatindug kawu balay hari binuwat sa kayu sidru? Hayga balaw nimu sundun kanmu ama? Matadlung ag tutuu kay manga binuwat; nakan namuhi siya maalwan ag may kahusayan kay kahamtangan.

¹⁶ Inapinan niya ti karampatan manga pugri hanggan ti manga magpangailangan, nakan nagbaliw mayad ti tanan para sa kanya. Katunda ti kang-ud pag magkilala sa kangku.

¹⁷ Dapat kawu bay, unman may tuhay pagkaibgan nu ud mandaya, magmatay manga tawu unman may kasalanan, mag-api, hanggan magpandahas.

¹⁸ Nakan inda ti pagsabihun Panginuun tungkul sa kan Hari Hihuyakim sa Huda, kay anak ni Usyas: “Unman may manhimanglaw sa kanya nu mamatay siya. Ti magtal-anakan niya, ti manga may kangaranan hanggan ti iba pag manga tawu unman manhimanglaw sa kanya.

¹⁹ Ilubung siya parihu sa maglubung sa namatay asnu; guyudun kay bangkay ag iyamut sa luwas puwirtahan Hirusalim.”

²⁰ Manga taga Huda, paglumi kamu dahil udyi kamu may manugbaliwa manga nasyun. Hanapun niyu sida sa Libanun. Tawagan niyu sida sa Basan ag Abarim.

²¹ Pinakan-an niku kamu pasandam kaybi sa mayad waya kanyu kahamtangan, dapat unman kamu namatingi. Ungud katunda ti ugali niyu ginan kaybi sa anak waya kamu; unman gid kamu magsunud sa kangku.

²² Nakan wayakun niku ti manga takinan niyu ga upa pag payagun durus, ag bihagun diman kanyu manga manugbaliwa pag nasyun. Ungud mangay-a kamu dahil sa kanyu kadautan.

²³ “Kamu pag manga mag-uli sa balay hari sa Hirusalim binuwat sa kayu sidru ginan sa Libanun, kaawaawa kamu nu rumas-ug yi sa kanyu ti kakurian, ga babayi magkakurian sa magpanganak,

Ti Tultulanun tungkul sa kan Hihuyakin

²⁴ “Aku, ti buhi pag Panginuun magsumpa kuntay dayuun niku kawu, Hari Hihuyakin sa Huda, kay anak ni Hihuyakim. Una kawu ga singsing sa kang sikun pag kamang tanda niku kamaskihan, lapsuun gid niku kawu sa kang ituturu.

²⁵ Ipakaun niku kawu sa manga magkaibug mumatay sa kanmu, ti pagkadalaan nimu. Ipakaun niku kawu sa kan Hari Nabukudunusur sa Babilunya hanggan sa kay manga sundalu.

²⁶ Kawu hanggan kanmu ina ipayamut niku sa iba pag nasyun, ag ati kamu pag mamatay.

²⁷ Udyi gid kamu makabalik sa daga pagkaibgan niyu balikan.

²⁸ Hihuyakin, kawu ga gipak anglit udyi magkakinabangan. Nakan iyamut niku kamu hanggan kanmu manga anak sa nasyun balaw niyu alam.”

²⁹ Daga Huda, patingihi nimu ti bagaw Panginuun.

³⁰ Dahil inda ti pagsabihun niya, “Isurat nimu kuntay inda pag tawu si Hihuyakin ga unman may anak, dahil una di usa sa kay manga anak unman may tumukaw sa tukawan hari ni Dabid bilang hari sa Huda. Bag-u unman diman manalu sa kay pangabuhi niya.”