Hirimyas 21 - Hanunuu

Hinulaan ti Kadamhakan Hirusalim

¹ Taynguna, nagbagaw sa kangku ti Panginuun pagka isinugu sa kangku ni Hari Sidikyas si Pasur kay anak ni Malkiyas hanggan si Sipanyas kay anak ni Maasiyas. Magkun sida sa kangku,

² “Ipakihampang nimu sa Panginuun kuntay awati kami, dahil ginira kami ni Hari Nabukudunusur taga Babilunya. Barang abi bumuwat makadululaw ti Panginuun parihu sa kay binuwat kaybi, hampay maampara kay maggira ni Nabukudunusur.”

³ Dapat nagsagut aku sa kanda,

⁴ “Sabihun niyu sa kan Sidikyas kuntay inda ti pagsabihun Panginuun, ti Diyus Israil, ‘Bumaliw unman may pulus kanyu manga armas paggamitun sa paggira sa kan Nabukudunusur hanggan sa kay manga sundalu nagsangput yi sa kanyu. Tipunun niku sida sa karaw-an inda pag banwa.

⁵ Aku ngapu ti lumaban sa kanyu sa panab-anan kapangyarihan niku dahil sa masyadu pag pangagalit niku.

⁶ Matyun niku ti tanan mag-uli sa inda pag banwa, tawu man ngatay hayup. Mamatay sida sa masyadu pag sarut.

⁷ Ag kawu Sidikyas, hari sa Huda, kanmu manga takinan, hanggan ti manga nasakupan nasawad balaw namatay sa sarut, sa girahan, ngatay sa lun-us ipakaun niku sa kan Hari Nabukudunusur sa Babilunya ag sa kanyu iba manga kalaban. Bag-u panmatyun niya kamu unman may pangaawa. Aku, ti Panginuun, ti magsabi inda.’

⁸ “Sabihun diman niyu sa manga nasakupan Hirusalim kuntay inda ti pag-ipasabi Panginuun, ‘Pagpatingi kamu! Pamili kamu, buhi aw ngatay kamatayan.

⁹ Una si unu ti pumirmaminti buhi sa inda pag banwa mamatay sa girahan, lun-us, ngatay sa sakit. Dapat ti manga umampu sa manga taga Babilunya magsangput sa banwa niyu ay mabuhi. Hu, maribri di kay buhi ti umampu.

¹⁰ Nakadisisyun yi aku padarahan kadamhakan inda pag banwa balaw kaayadan. Ipasakup niku inda sa hari Babilunya, ag kay irubun niya inda. Aku, ti Panginuun, ti magsabi inda.’

^11-12 “Sabihun diman niyu sa magtal-anakan hari sa Huda, kay manga linahi ni Dabid, kuntay patingihi inda pag itinultul Panginuun: Ilantag niyu pirmi ti katadlungan. Awati niyu ti manga tinakawan; iribri niyu sida sa manga mag-api sa kanda. Dahil nu unman, lumabdab ti pangagalit niku ga apuy balaw magkapsa dahil sa daut niyu pagbuwatun.

¹³ Kalaban niku kamu manga taga Hirusalim, kamu pag manga mag-uli sa mapag-un pag rugar sa babaw maratag pag bantud. Magpalabaw-labaw kamu magkumun, ‘Ribri kita sitay! Unman may manggira sa kanta, sa mapag-un pag rugar atay sa babaw maratag pag bantud!’

¹⁴ Dapat parusahan niku kamu angay sa manga pagbuwatun niyu. Irubun niku kanyu manga katalunan tugka ti tanan sa kanyu sangput mairub. Aku, ti Panginuun, ti magsabi inda.”