Hirimyas 20 - Hanunuu

Sida ni Hirimyas ni Pasur

¹ Ti manughandug si Pasur kay anak ni Imir, ti may pinakaabwat pag kangaranan bilang takinan sa Balay Diyus Panginuun sa ati katpung pag udas. Pagka nadnugan niya ti manga sinabi ni Hirimyas,

² ipinahampak niya siya ag ipinapirisu sa may sabian Balay Diyus Panginuun pag-ingarnan Puwirtahan ni Binhamin.

³ Pagkasurip, ipinalwas ni Pasur si Hirimyas. Magkun si Hirimyas sa kanya, “Pasur, inilisan yi Panginuun kanmu ngaran. Ingarnan yi kawu taynguna Magur Misabib.

⁴ Dahil inda ti pagsabihun Panginuun: Kadalaan nimu kanmu kahamtangan hanggan ti kahamtangan nimu manga kakilala. Makitan nimu sida matyun nida manga kalaban sa girahan. Ipakaun niku ti buu Huda sa hari Babilunya. Kay iba nasakupan matyun, ag ti iba waydi bihagun.

⁵ Ipaagaw niku sa manga kalaban ti tanan kayamanan sa inda pag banwa Hirusalim — ti tanan nida binudlayan, ti tanan manga mahalaga pag bagay hanggan ti tanan kayamanan hari sa Huda. Darahun nida tanan tida sa Babilunya.

⁶ Hanggan kawu, Pasur, ag kanmu buu magtal-anakan ay bihagun ag daran-un sa Babilunya. Ati kawu pag mamatay ag ilbung, hanggan ti tanan nimu manga kakilala hinulaan nimu kapudilan.”

Nagriklamu si Hirimyas sa Panginuun

⁷ Panginuun, dinaya nimu aku ag nanalu kawu sa kangku. Nagbaliw karasarin-an aku manga tawu ag parargu nida aku pagsurugun.

⁸ Nu magbagaw aku, pag-ihuyaw niku ti itinultul nimu Panginuun tungkul sa karansa ag pagkawayak. Dahil sa ipagpasabi nimu inda, pagkasarin-an duy nida aku ag pagsurugun.

⁹ Nu kas-a, mag-isip aku dayi lang aku manultul tungkul sa kanmu manga bagaw. Dapat balaw duy niku maampara, dahil kanmu bagaw ga apuy maglabdab sa kang tagipusuun hanggan but-ul. Udyi niku inda kaya maampara.

¹⁰ Nasaydan niku ti magpuya manga tawu. Pag-ulitun nida kang manga pagsabihun magkumun, “Madala ti nakasangput sa kanta! Isumbung nita siya!” Una kang manga kakilala mag-alagad sa kang kadamhakan. Pagsabihun nida, “Barang abi madaya nita siya. Nu mangyari tida, manalu kita ag mabalusan nita siya.”

¹¹ Dapat kaibahan duy niku kawu, Panginuun. Kawu ga sundalu maisug ag makamaskihan, nakan matalu ti manga mag-unuunu sa kangku. Midamhak sida ag mangay-a, una kapira, unman malimtan ti kakay-ahan nida.

¹² Panginuun Makamaskihan, magkaalaman duy nimu nu si unu ti matadlung dahil alam nimu ti tagipusuun ag isip tawu. Ipakakit duy nimu sa kangku kanmu pagbalus sa kanda dahil ipinabahala yi duy niku sa kanmu inda pagharampangan.

¹³ Panginuun, mandayaw ag manganta duy aku sa kanmu taynguna dahil irinibri nimu ti manga may kailangan ginan sa kamang daut pag tawu.

¹⁴ Dapat pagsaadan niku ti sirang pagka aku ilinusad! Balaw niku pag-ikabaya ti sirang pagka iinanak aku niku ina.

¹⁵ Pagsaadan niku ti nagbarita sa kang ama kuntay, “Lalaki kanmu anak!” Imaw ti ikinabaya gid niku ama.

¹⁶ Mana ati pag tawu miparihu sa manga banwa winayak Panginuun ag balaw kinaawaan. Mana buu sirang mapatingihan niya ti ringgit ag arunghung manga tawu sa girahan.

¹⁷ Dahil balaw niya aku minatay katpung sa tiyan di waya aku niku ina. Mana nagbaliw kalubngan yi lang niku ti tiyan niku ina, ngatay ibinuduy yi lang aku hanggan aban.

¹⁸ Hayga waya aku ilinusad? Hampay lang aw makitan ti kalaguluhan ag kakurian, ag mamatay sa kakay-ahan?