Hirimyas 2 - Hanunuu

Binugyahan Israil ti Panginuun

¹ Magkun sa kangku ti Panginuun,

² “Pag-ati kawu sa manga taga Hirusalim, sabihun nimu inda sa kanda: ‘Magkatandaan niku kanyu pagkamatinupadun ag pagmahal sa kangku kaybi parihu sa babayi bag-u ipinaasawa. Inusig niyu aku una sa pangawakawaan unman may magtubu manga tanum.

³ Kamu pag manga Israilita ipinablag para sa kangku. Ga kamu ti pinakaun-an burak ipinakaun sa kangku. Pinarusahan niku ti manga nag-unuunu sa kanyu, ag nidamhak sida. Aku, ti Panginuun, ti magsabi inda.’ ”

⁴ Patingihi niyu ti tultulanun Panginuun, kamu pag manga nasakupan Israil, linahi ni Hakub.

⁵ Inda kay pagsabihun: “Hintay pag kasalanan ti nakitan niyu manga ginurang sa kangku nakan aku kanda binugyahan? Sinunud nida ti manga diyus-diyusan unman may pulus, nakan sida hanggan nagbaliw diman unman may pulus.

⁶ Udyi nida aku hinanap una aku yi ti nagpalwas sa kanda sa Ihiptu hanggan ti nag-una sa kanda sa pangawakawaan unman may tanum — tigangan pag daga, may manga tuyungan, mahawag ag unman may mag-uli ngatay maglakaw.

⁷ Ati ginan dinara niku sida sa marinu pag daga hampay makakinabang sa abunda pag patubas. Dapat pagka ati yi sida, inuringan nida ti magkaapu niku pag daga bag-u binuwat nida inda mayagting.

⁸ Una manga manughandug unman naghanap sa kangku. Ti manga manugtudlu Kasuguan unman magkilala sa kangku. Ti manga takinan nagalit laban sa kangku. Ti manga purupita nagpadakit sa ngaran ni Baal ag nagsunud sa manga diyus-diyusan unman may pulus.

⁹ Nakan ngani tamyawun maan niku sida tugka sa kanda linahi. Aku, ti Panginuun, ti magsabi inda.”

¹⁰ “Pagdipay kamu tag sa isalpan, sa manga puru Kitim, pagsugu kamu mayad pag manug-usisa sa butlakan, sa daga Kidar, bag-u bantayi nu may nangyari parihu sa kainda:

¹¹ May nasyun aw nag-ilis kanda diyus una balaw tutuu diyus? Dapat aku, ti makamaskihan pag Diyus, ibinalyu niku manga nasakupan sa manga diyus unman may pulus.

¹² Kinulbaan ti buu kalangitan sa binuwat nida; ag natandug sa daka pag kadiklahan. Aku, ti Panginuun, ti magsabi inda.

¹³ “Nagbuwat ti manga nasakupan niku duwa ka kasalanan: Dinayu nida aku, ti bulbugan magpakaun buhi, ag nagsamba sida sa tuhay pag manga diyus, bilang ga magkali sida bubun magkak-at.

¹⁴ Ti Israil balaw iinanak panawuhun. Hayga pagsibaun siya manga kalaban?

¹⁵ Kay manga kalaban ga manga liyun mag-ngurub sa kanya. Dinaut nida kay daga, inirub kay manga banwa ag balaw yi inda pag-ulian.

¹⁶ Ti manga taga Mimpis ag ti manga taga Tapanis ti nagwayak sa kanya.

¹⁷ “Kamu di waydi manga Israilita ti nagdara inda pag kadamhakan sa kanyu sadili. Dahil dinayu niyu aku, ti Panginuun niyu Diyus, ti naggiya sa kanyu maglakaw.

¹⁸ Taynguna, hintay ti nab-ul niyu sa kanyu nagpakarani sa Ihiptu hanggan sa Asirya? Hayga kamu nag-atag sa Sapa Nilu ag Sapa Iyupratis?

¹⁹ Parusahan niku kamu dahil sa kadautan ag pagdayu niyu sa kangku. Isipun niyu nu kabitay ka daut ag kapait ti binuwat niyu pagdayu ag paglapastangan sa kangku, sa Panginuun niyu Diyus. Aku, ti Panginuun Diyus, ti magsabi inda.

²⁰ “Katpung panawuhun kamu, ga baka kamu nakasingkaw ngatay manga pirisu nakatarikada. Dapat pagka napalpasan yi niku kamu, dayu maan kamu magsirbi sa kangku. Bagkus ngap, nagsamba kamu sa manga diyus-diyusan sa kada arabwat pag tagudtud hanggan sa sirung kada maraybung pag puun kayu. Parihu kamu sa babayi baraydan.

²¹ Parihu kamu sa usa ka pinakamayad pag kalasi ubas kang itinanum. Dapat hayga linmuwang kamu lugu ag unman may pulus pag ubas?

²² Una marigus kamu ag manpakasabun, makitan diman niku ti uring manga kasalanan niyu. Aku, ti Panginuun Diyus ti magsabi inda.

²³ “Kabitay niyu masabi balaw kamu nauringan ag balaw kamu nagsamba sa diyus-diyusan ni Baal? Bantayi niyu nu unu pag kasalanan ti binuwat niyu sa karatagan Hinum. Isipun niyu kanyu binuwat pag kasalanan. Kamu ga babayi kamilyu unman makaagwanta dahil maghanap lalaki.

²⁴ Parihu diman kamu sa usa ka babayi talun asnu masyadu kay ibug magpaama, sa masyadu niya pangaibug unman may makaampara sa kanya. Ti lalaki asnu unman yi makurian maghanap sa kanya. Madali siya hanapun sa udas niya magpaama.

²⁵ “Manga Israilita, nabuslut yi kanyu manga lapak ag namara yi kanyu tululnan sa pagsunud niyu sa tuhay pag manga diyus. Dapat pagsabihun niyu, ‘Balaw nimi mahimu dayuun ti tuhay pag manga diyus. Pagmahalun nimi sida ag sumunud kami sa kanda.’

²⁶ “Parihu sa usa ka mananakaw mangay-a nu madakup, mangay-a diman kamu manga taga Israil. Ungud mangay-a kamu, hanggan kanyu manga hari, manga may kangaranan, manga manughandug ag manga purupita.

²⁷ Pagsabihun niyu kuntay ti kayu kanyu ama ag ti batu kanyu ina. Dinayu niyu aku, dapat nu magkakurian kamu, maghagad awat kamu sa kangku.

²⁸ Hayga? Naan yi ti manga diyus binuwat niyu para sa kanyu sadili? Tawagun niyu sida nu kaya nida kamu iribri sa kakurian niyu. Pagkayamu kanyu manga diyus, parihu kay kayamu sa manga banwa sa Huda.

²⁹ Hayga magriklamu kamu sa kangku? Balaw aw kamu ti naglaban sa kangku?

³⁰ Pinarusahan niku kanyu manga anak, dapat unman sida nagbag-u. Dayu sida magpatudlu. Kamu diman ti nagmatay sa kanyu manga purupita parihu sa pagmatay maisug ag magkalun-us pag liyun sa kay tinkub.

³¹ “Kamu pag manga nasakupan sa inda pag sinulput, patingihi niyu ti pagsabihun niku. Aku aw ga usa ka pangawakawaan para sa kanyu manga taga Israil, aw ngatay ga usa ka rugar masyadu madulum? Hayga pagsabihun niyu kuntay, ‘Bahala yi kami sa gustu nimi buwatun. Dayi kami pakarani sa Diyus.’

³² “Malimtan aw usa ka daraga kay manga ugsung aw ngatay ti rutay niya pankasal? Dapat kamu kang manga nasakupan, dugay yi niyu aku kinalimtan.

³³ Madunung gid kamu maglagas sa pagmahalun niyu pag manga diyus-diyusan. Una ti manga babayi baraydan dumunung waya sa kanyu.

³⁴ Ti manga rutay niyu may dagta dugu manga tawu unman may kasalanan ag manga pugri. Minatay niyu sida una unman niyu sida natakdan sinmulud sa kanyu manga balay hampay manakaw. Dapat ay una binuwat niyu inda,

³⁵ pagsabihun diman niyu, ‘Unman aku may kasalanan. Balaw magkagalit sa kangku ti Panginuun!’ Dapat ungud parusahan gid niku kamu dahil pagsabihun niyu unman kamu may kasalanan.

³⁶ “Madali lang sa kanyu ti magpailis-ilis manga kakampi pag nasyun. Dapat pakay-ahun gid kamu manga taga Ihiptu kanyu kakampi, parihu sa pagpakay-a Asirya sa kanyu.

³⁷ Umighit kamu sa Ihiptu kuntay matakipan kanyu kamang sa uyahun dahil sa kakay-ahan ag karukuan. Dahil dinayu yi niku ti manga nasyun pagpiyaran niyu. Unman yi kamu maawatan tida pag manga nasyun.”