Hirimyas 19 - Hanunuu

Ti Gipak Tapayan

¹ Magkun ti Panginuun sa kangku, “Pagbili kawu tapayan sa manugpanday anglit. Bag-u ibahun nimu ti manga paggurangunun banwa hanggan ti paggurangunun manga manughandug,

² pag-atag kamu sa Luung Bin Hinum, arani sa puwirtahan Rayamtan manga Gipak Anglit. Ati nimu pag sabihun kang sinabi sa kanmu.

³ Sumabi kawu, ‘Manga hari sa Huda ag nasakupan Hirusalim, patingihi niyu ti tultulanun Panginuun Makamaskihan, ti Diyus Israil. Inda ti pagsabihun niya: Mamadara aku kadamhakan sa inda pag rugar, una si unu ti makadnug inda dalaun gid.

⁴ Buwatun niku inda, dahil dinayu aku niku nasakupan. Inda pag luung binwat nida harandugan manga handug pagsunugun para sa iba manga diyus. Inda pag manga diyus balaw nida magkakilala, unman diman kilala nida manga ginurang, ngatay nida manga hari sa Huda. Magmatay waya sida siyun pag rugar manga ud may namuangan.

⁵ Nagpatindug sida manga simbahan para sa kan Baal, ati nida pagsunugun kanda manga anak bilang handug sa kanya. Balaw gid inda pag-isugu niku sa kanda; balaw diman inda sinmulud sa kang isip.

⁶ Nakan pag-aman kamu, dahil aku, ti Panginuun, magsabi rumas-ug ti udas inda pag rugar balaw yi ingarnan Tupit ngatay Luung Bin Hinum, nu unman Luung Maratyan.

⁷ Dautun niku sa inda pag rugar ti gayak manga taga Huda hanggan taga Hirusalim. Ipamatay niku sida sa kanda manga kalaban sa panab-anan girahan, ag ipakaun niku kanda manga bangkay sa manga manuk hanggan sa manga hayup sa talun.

⁸ Wasakun niku inda pag banwa ag bumaliw puruyaun. Ti manga maglawuy manhikrab gid ag managutsut dahil sa nangyari sitay.

⁹ Sangputun manga kalaban inda pag banwa tugka sa kay manga nasakupan siyun matabwan karan-unun. Nakan kan-un nida kanda kaparihu hanggan kanda sadili anak.’ ”

¹⁰ Bag-u magkun sa kangku ti Panginuun, “Basaga nimu ti tapayan sa atubangan manga tawu nagkuyug sa kanmu.

¹¹ Sabihun nimu sa kanda aku, ti Panginuun Makamaskihan, magkumun, ‘Rurisun niku ti nasyun Huda hanggan ti banwa Hirusalim parihu sa kang nagbasag sa inda pag tapayan, udyi mahiwat. Ilbung nida ti mayamu pag bangkay sa Tupit tugka sa udyi may malubngan.

¹² Inda ti buwatun niku sa Hirusalim hanggan sa kay nasakupan. Inda pag banwa kilalan-un mauring parihu sa Tupit.

¹³ Ti tanan balay sa Hirusalim, hanggan ti manga balay hari sa Huda kilalan-un mauring parihu sa Tupit. Dahil sa babaw atup manga balay magtuub sida manga kamangyan para sa kanda diyus manga pamgasan, ag maghandug manga irinmun para sa iba waya pag manga diyus.’ ”

¹⁴ Pagka nasabi yi ni Hirimyas ti pag sabihun Panginuun, nighit siya ginan sa Tupit bag-u nag-atag sa sarakahan balay Panginuun Diyus hampay isabi sa manga tawu,

¹⁵ “Pagpatingi kamu, dahil inda ti pagsabihun Panginuun Makamaskihan, ti Diyus Israil: Ipadara niku sa inda pag banwa hanggan sa manga baryu sa kay kalibut ti pagsabihun niku pag parusa dahil maganit kanda ulu ag dayu sida mamatingi sa manga pagsabihun niku.”