Hirimyas 18 - Hanunuu

¹ Magkun waya sa kangku ti Panginuun,

² “Pag-atag kawu sa balay manugpanday anglit, ag ati pagsabihun niku sa kanmu ti ibug niku sabihun.”

³ Nakan nag-atag ngani aku sa balay manugpanday anglit nakitan niku magbuwat siya anglit.

⁴ Nu balaw marinu kay kalasi pag anglit kay pagbuwatun, pag-umanun maan niya inda tugka sa magustuhan niya kay kalasi.

⁵ Bag-u magkun sa kangku ti Panginuun,

⁶ “Malu, nasakupan Israil, balaw aw mabwat niku sa kanyu ti pagbuwatun manugpanday anglit sa inda pag pinkul daga? Nu kabitay ti pinkul daga sa kamang manugpanday anglit, kamu sa manga kamang diman niku.

⁷ Nu sabihun niku ti usa ka nasyun ngatay kaharian marangga ngatay mawayak,

⁸ bag-u tunda pag nasyun ngatay kaharian umapas sa pagbuwat daut, balaw yi niku iparargu kang gayak daut sa kanda.

⁹ Ag nu sabihun waydi niku bumangun ag mitindug ti usa ka nasyun ngatay kaharian,

¹⁰ bag-u tunda pag nasyun ngatay kaharian bumuwat kadautan ag balaw sinmunud sa kangku, balaw yi lang niku iparargu kang gayak kaayadan sa kanda.

¹¹ “Nakan sabihun nimu sa manga taga Huda hanggan sa manga taga Hirusalim kuntay inda ti pagsabihun niku, ‘Pagpatingi kamu! May paggayakun aku parusa para sa kanyu. Nakan pag-apas yi kamu sa kanyu daut pag ugali. Ti kada usa sa kanyu pagbag-u yi kay pagbuwatun hanggan ugali.’

¹² Dapat sumagut ti manga tawu, ‘Balaw mahimu! Iparargu diman nimi kanmi gustu; sundun nimi ti daut ag kaganitan nimi tagipusuun.’ ”

¹³ Nakan inda ti pagsabihun Panginuun: “Pagpaingana kamu sa iba nasyun nu may nasaydan aw sida parihu sa inda pag nangyari. Ti Israil parihu sa tugnaw pag babayi nagbuwat mayagting pag buwat!

¹⁴ Magkatunas aw ti yilu sa bantud Libanun? Magkak-at aw ti maramig pag bulbugan ati? Unman!

¹⁵ Dapat kang manga nasakupan magkalimut yi sa kangku. Magsunug sida kamangyan sa manga diyus-diyusan unman may pulus. Nagpatlikud sida sa insaktu ag daan pag dalan, linmakaw sida sa balaw mayad pag dalan nu naan nitalakpa sida.

¹⁶ Bumaliw mapanglaw kanda daga ag puyaan hanggan aban. Ti tanan maglawuy mangil-ilung ag manhikrab.

¹⁷ Panwayakun niku sida sa atubangan nida manga kalaban ga galbuk pag-ipayag durus ginan sa butlakan. Patlikudan niku sida, balaw niku awatan sa sirang rurisun sida.”

¹⁸ Bag-u magkun ti manga tawu, “Abala kamu, mamuwat kita paraan hampay maampara nita si Hirimyas! May manga manughandug diman manudlu kasuguan sa kanta, ag may mamaanyu diman manga madunung pag tawu sa kanta, hanggan may manga purupita diman magpaliwanag bagaw Diyus sa kanta. Nakan mamuwat kita manga tultulanun laban sa kanya, danga yi kita magpatingi sa kay manga pagsabihun.”

¹⁹ Nakan nandarangin aku, “Panginuun, awati duy nimu aku! Mag-adnugan nimu ti gayak niku manga kalaban sa kangku.

²⁰ Mayad duy ti pagbuwatun niku sa kanda dapat daut ti pag-ibalus nida sa kangku. Nangali sida hampay malagpak aku sa kanda kali, una yi nandangup aku sa kanmu ag nandarangin kuntay danga nimu sida pagparusahi dahil sa pangagalit nimu sa kanda.

²¹ Dapat taynguna, pabay-ani duy nimu mamatay kanda manga anak sa lun-us hanggan sa girahan. Pabay-ani nimu maburanday ti manga babayi ag madura kanda manga anak. Pabay-ani duy nimu mamatay kanda manga lalaki sa sakit hanggan ti manga kalay-awan lalaki sa girahan.

²² Pabay-ani nimu sida manhuyaw sa kadalaan nu ipagira nimu sa manga kalaban kanda manga balay. Dahil nagkutkut sida kali hampay malagpak aku ati, ag nagpauli sida dit-ag hampay mablay aku.

²³ Dapat alam duy nimu Panginuun ti tanan nida gayak manmatay sa kangku. Nakan danga duy nimu sida pagpatawada sa manga kasalanan ag kadautan nida. Pabay-ani sida matalu nida manga kalaban habang mabantayan lang kawu. Ipasamit nimu sa kanda kanmu pangagalit.”