Hirimyas 17 - Hanunuu

Ti Parusa sa Kadautan Huda

¹ Magkun ti Panginuun, “Manga taga Huda, nakaukit sa maganit niyu tagipusuun kanyu manga kasalanan ga manga bagaw nakaukit sa batu ngatay sa sungay ati sa suuk manga harandugan niyu.

² Una kanyu manga anak magsamba sa manga harandugan niyu hanggan sa manga tulduk tanda diyusa si Asira sa sirung maraybung pag puun kayu ag sa manga babaw tagudtud.

³ Nakan ipab-ul niku sa manga kalaban niyu kanyu manga kayamanan ag kasiyunan, hanggan manga simbahan niyu sa arabwat pag manga rugar, dahil sa binwat kasalanan niyu buu nasyun.

⁴ Madura sa kanyu kang ipinakaun pag daga. Buwatun niku kamu suruguun niyu manga kalaban ati sa balaw niyu alam pag rugar, dahil ginalit niyu aku parihu sa maglabdaban apuy balaw magkapsa hanggan aban.”

⁵ Magkun waya ti Panginuun, “Saadan niku ti magpakarayu sa kangku ag magsarig lang sa tawu.

⁶ Miparihu siya sa usa ka diit pag puun kayu sa tigangan pag daga, unman may marinu patabgan. Mangulian siya sa mamara ag maasin pag daga unman may iba mag-uli.

⁷ Dapat mapalad ti tawu magsarig sa kangku.

⁸ Miparihu siya sa puun kayu itinanum sa saruy sapa kay manga gamut mag-aput sa danum. Inda pag puun kayu balaw maunu una rumas-ug ti tag-init ngatay ti turungun. Pirmi malangba kay manga labung ag unman may apas kay magburak.

⁹ “Ti tagipusuun tawu madaya subra sa tanan, ag lubus gid daut; si unu ti makaalam inda?

¹⁰ Aku, ti Panginuun, mag-usisa sa tagipusuun ag isip tawu. Balusan niku ti kada usa angay sa kay pag-ugaliun ag manga buwat.

¹¹ Ti tawu nagyaman sa daut pag paraan parihu sa manuk mag-ukub sa balaw kanya pag itlug. Aban sa uryan, sa pangatungaan niya buhi, madura kay kayamanan ag mapatutuuhanan siya busal.”

¹² Panginuun, kanmu Balay duy ti marinu tukawan hari ginan waya kaybi.

¹³ Kawu duy Panginuun, ti pagsarigan Israil. Mangay-a gid ti tanan magdayu sa kanmu. Milbung gid sida sa sirung daga dahil dinayu nida kawu, ti bulbugan magpakaun buhi.

¹⁴ Panginuun, paayada duy nimu aku hampay maayadan; iribri duy nimu aku ag maribri aku. Kawu lang gid kang dayawun.

¹⁵ Magkun duy sa kangku ti manga tawu, “Naan yi ti manga pagsabihun Panginuun? Hayga unman waya inda magpangyari taynguna?”

¹⁶ Panginuun, balaw duy aku magpabaya sa buruwatun bilang manugbantay manga nasakupan nimu. Balaw duy niku gustu kuntay ipadamhak nimu sida. Alam duy nimu ti manga pagsabihun niku.

¹⁷ Danga duy pagpadalaa nimu aku, dahil kawu ti palalan-iban niku sa udas kadamhakan.

¹⁸ Padalaun duy nimu ag pakay-ahun ti manga mag-unuunu sa kangku. Dapat ay danga nimu inda buwatun sa kangku. Padarahi duy nimu sida kadamhakan hampay maruris sida lubus.

Ti Sirang Pamahari

¹⁹ Magkun sa kangku ti Panginuun, “Pag-atag kawu sa manga puwirtahan Hirusalim. Pagtindug kawu sa puwirtahan paglakawan manga hari Huda bag-u sa iba waya pag manga puwirtahan.

²⁰ Ag sabihun nimu sa manga tawu, ‘Patingihi niyu ti tultulanun Panginuun, kamu pag manga hari hanggan manga taga Huda, ag kamu pag manga mag-uli sa Hirusalim maglawuy sa inda pag puwirtahan.

²¹ Inda ti pagsabihun Panginuun: Nu pagpahalgaan niyu kanyu sadili, danga kamu magdara una hintay pag manga paninda sa puwirtahan Hirusalim sa Sirang Pamahari.

²² Tutuu ungud tunda, danga kamu magtarabahu ngatay magdara manga paninda ginan sa kanyu manga balay sa inda pag sirang. Kilalan-un niyu inda ipinablag pag sirang. Pag-isugu niku inda sa kanyu manga ginurang,

²³ dapat balaw sida nagpatingi sa kangku. Maganit gid kanda ulu! Balaw nida pagtanggapun kang manga pag-itudlu sa kanda.

²⁴ Dapat nu sumunud lang kamu sa kangku, balaw kamu manarabahu ngatay mandara manga paninda sa puwirtahan Hirusalim sa Sirang Pamahari, bagkus ngap kilalan-un niyu inda ipinablag pag sirang,

²⁵ papaladan niku kamu. Pirmi kamu magkaimaw hari sitay sa Hirusalim ginan sa linahi ni Dabid. Sida hanggan ti manga pinunu manparada masakyan sa manga kalisa hanggan manga kabayu pasulud sa puwirtahan banwa kaibahan ti manga taga Huda hanggan taga Hirusalim. Inda pag banwa Hirusalim pumirmaminti hanggan aban.

²⁶ Rumas-ug ti manga tawu mansamba sa Balay Diyus Panginuun ginan sa manga rugar sa sangput Hirusalim, sa manga banwa Huda, hanggan Binhamin, hanggan ginan sa manga tagudtud sa isalpan, sa manga kabantudan, ag Nigib. Mandara sida manga handug pagsunugun ag iba waya pag manga handug, parihu sa handug pagdayaw, handug pasalamat, hanggan manga kamangyan.

²⁷ Dapat nu balaw kamu sumunud sa kangku, ag balaw niyu kilalan-un ipinablag ti Sirang Pamahari, ag mandara kamu manga paninda sa manga puwirtahan Hirusalim sa tida pag sirang, irubun niku ti manga puwirtahan Hirusalim hanggan ti manga mapag-un pag manga bahagi banwa, unman gid may pumusa tunda pag apuy!’ ”