Hirimyas 16 - Hanunuu

Balaw Pinasnuan Mangasawa si Hirimyas

¹ Magkun waya sa kangku ti Panginuun,

² “Danga gid kawu mag-asawa ngatay magkaanak sa inda pag daga.

³ Sabihun niku sa kanmu nu hayga, ag nu hintay ti mangyari sa manga anak ilinusad sa inda pag rugar hanggan sa kanda manga gurang.

⁴ Magkaramatay sida sa mahigpit pag sakit. Unman may manhimanglaw ngatay may manlubung sa kanda manga bangkay. Mangalat kanda manga bangkay sa babaw daga ga manga ugat. May manga magkaramatay sa girahan ag lun-us, kanda manga bangkay kan-un manga manuk ag manga maraisug hayup.”

⁵ Magkun waya ti Panginuun, “Danga kawu magsulud sa manga balay may manga namatay. Danga kawu magpanrukuan sa kanda ngatay pumakakit magkaawa una sa kantapu. Dahil bin-ul yi niku kang pagmahal ag pangaawa sa inda pag manga tawu.

⁶ Magkaramatay sida sa inda pag daga, mayaman man ngatay pugri, ag unman may manlubung sa kanda. Unman may tawu manmiyag sa sadili nida ngatay manpauguy hampay ipakakit kanda maghimanglaw sa manga namatay.

⁷ Unman may mangayaw karan-unun ngatay irinmun hampay pasulungun ti manga magpanruku, una waya ama ngatay ina ti namatay.

⁸ Danga diman kawu magsulud sa manga balay may manga karan-an hampay mangaun hanggan manginum ati.

⁹ Dahil aku, ti Panginuun Makamaskihan, ti Diyus Israil, magkumun, ‘Makitan gid ngap nimu sa kanmu kaudasan amparahun niku ti kasulungan ag pagbarayaan sa inda pag rugar, hanggan ti kasulungan bag-u mag-asawa.’

¹⁰ “Nu sabihun nimu sa manga tawu inda pag manga bagay ag mamaingana sida, ‘Hintay ti nabwat nimi pag kasalanan sa Panginuun nimi Diyus? Hayga kami pinakan-an pasandam Panginuun kuntay rumas-ug sa kanmi ti katida pag kadamhakan?’

¹¹ Sabihun nimu sa kanda inda kang sagut: ‘Binwat niku inda dahil dinayu aku niyu manga kaumputan. Nagsirbi ag nagsamba sida sa manga diyus-diyusan. Dinayu nida aku balaw nida sinunud kang bilin.

¹² Mas subra waya kamu daut kaysa manga kaumputan niyu. Ti kadautan ag kaganitan niyu manga tagipusuun ti sinunud niyu, bagkus aku mana di kanyu sundun.

¹³ Nakan palayasun niku kamu sa inda pag daga atabug sa daga balaw niyu alam, hanggan niyu manga ginurang. Bag-u ati, pumasawa kamu sa pagsirbi sa tuhay pag diyus sirang ag yabi, ag balaw yi niku kamu kaawaan.’

¹⁴ “Rumas-ug ti sirang balaw yi manumpa ti manga tawu kaindaay, ‘Magsumpa aku sa ngaran buhi pag Panginuun ti nagpalpas sa manga taga Israil ginan sa Ihiptu!’

¹⁵ Bagkus ngap sabihun nida, ‘Magsumpa aku sa ngaran buhi pag Panginuun ti nagpalpas sa manga taga Israil ginan sa nasyun baliwa sa kanaway ag sa tanan nasyun nu naan niya sida ikinalat.’ Dahil ibalik niku sida sa daga ipinakaun niku sa kanda manga ginurang.

¹⁶ “Dapat sa taynguna, padaran-an dapu niku sida mayamu kalaban ga manga manug-isda kay manmulay sa kanda. Hanggan manugu diman aku manga mangingidu magligaw sa kanda sa manga bantud, sa manga tagudtud ag manga lukib.

¹⁷ Nakitan niku ti tanan ugali nida. Unman may una hintay ti mag-itagu sa kangku. Nakitan diman niku ti manga kasalanan nida.

¹⁸ Nakan pabayadun niku sida dubli sa kanda kadautan ag kasalanan, dahil inuringan nida kang daga sa panab-anan mayagting ag tigbak pag manga diyus-diyusan nida.”

¹⁹ Magkun aku, “Panginuun, kawu duy ti kabisugan niku ag manug-alaga sa udas may karukuan. Pumakarani duy sa kanmu ti manga nasyun ginan sa buu kalibutan bag-u sumabi sida, ‘Unman may pulus ti manga diyus-diyusan nimi manga ginurang. Unman sida may nabwat una hintay pag kaayadan.

²⁰ Ti tawu lugud makabuwat aw kay diyus? Nu makabuwat siya, balaw tida tutuu pag diyus!’ ”

²¹ Magkun ti Panginuun, “Nakan taynguna, ipakakit niku sa kanda ti kamaskihan ag kakayahan niku hampay maalaman nida kuntay aku ngani ti Panginuun.”