Hirimyas 15 - Hanunuu

Ti Parusa sa manga Taga Huda

¹ Magkun sa kangku ti Panginuun, “Una sida ni Muysis ni Samwil waya ti mamakiawa sa kangku para sa inda pag manga tawu, balaw gid niku sida kaawaan. Nakan pakarayuan nimu sida sa kangku. Paighita nimu sida!

² Nu mamaingana sida nu naan tabug sida, sabihun nimu kuntay inda ti pagsabihun niku: Ti itinigana mamatay pihu magkaramatay. Ti iba itinigana mamatay sa girahan ag ti iba sa lun-us. Ti iba waydi itinigana bihagun.

³ Aku, ti Panginuun, magkun ipadara niku sa kanda ti upat ka kalasi manugpapas: Magkaramatay sida sa girahan, guyudun manga idu kanda manga bangkay, tindukun sida manga manuk ag ti magkasawad pag manga bangkay nida hirutun maraisug pag hayup.

⁴ Kadat-an sida tanan nasyun sa kalibutan dahil sa binwat ni Manasis (kay anak ni Isikyas) sa Hirusalim katpung hari waya siya Huda.

⁵ “Manga taga Hirusalim, si unu nguna ti maawa sa kanyu? Si unu nguna ti manruku para sa kanyu? Ag si unu nguna ti mamaingana tungkul sa kanyu kahamtangan?

⁶ Dinayu niyu aku; pirmi niyu aku pagpatlikudan. Nakan aku, ti Panginuun, magkun ihunat yi niku kang manga kamang hampay rurisun kamu. Pagsawaan yi aku kaawaan kamu.

⁷ Parusahan niku kamu ga upa pagtaphun sa manga puwirtahan banwa. Rurisun niku kamu hanggan kanyu manga anak, dahil unman niyu pagpatlikudan kanyu daut ugali.

⁸ Payamuun niku kanyu manga buranday mas mayamu waya sa baras sa baybay dagat. Sa karaw-an sirang, ipadara niku ti rumuris sa manga ina niyu manga kalay-awan lalaki. Kadaka rumas-ug sa kanyu ti karukuan hanggan kadalaan.

⁹ May ina maduraan pitu ka anak lalaki. Matigbakan siya ag makurian sa mag-arup. Kay manga anak ga init madali mag-isangday. Mangay-a siya dahil udyi siya may anak. Ag ti manga magkasawad buhi ipamatay diman niku sa kanda manga kalaban. Aku, ti Panginuun, ti magsabi inda.”

Dumangup si Hirimyas

¹⁰ Kaawaawa gid aku! Mana balaw yi aku ilinusad niku ina. Pirmi aku pag kalabanun sa buu Huda. Unman aku may utang una sa kantapu, unman diman aku magpautang, dapat pagsaadan aku nida tanan.

¹¹ Magkun sa kangku ti Panginuun, “Sa ungud, bumaliw mayad ti tanan para sa kanmu. Pumakihampang sa kanmu ti manga kalaban nimu kuntay idarangin nimu sida sa udas nida kakurian ag karukuan.

¹² “Nu kabitay unman may makabari sa baul ngatay galang, unman diman may makadaug sa manga kalaban ginan sa kanaway.

¹³ Ipaagaw niku sa manga kalaban niyu ti manga kayamanan hanggan kasiyunan niyu dahil sa kanyu binwat manga kasalanan sa buu nasyun.

¹⁴ Buwatun niku kamu panawuhun niyu manga kalaban sa daga balaw niyu alam, ag ipaagum niku sa kanyu kang pangagalit ga maglabdaban apuy.”

¹⁵ Magkun si Hirimyas, “Panginuun alam duy nimu ti tanan! Alalahana ag awati duy nimu aku. Balusi duy nimu ti manga mag-unuunu sa kangku. Alam niku balaw kawu madali magkagalit, nakan danga duy nimu aku pagpabay-ani mamatay. Alalahana duy nimu ti manga kakurian niku dahil sa kanmu.

¹⁶ Katpung nagbagaw kawu sa kangku, pinatingihan duy niku kawu. Kanmu manga bagaw kang kabayaan, ag aku sa kanmu, Panginuun Diyus Makamaskihan.

¹⁷ Balaw duy aku magkuyug sa manga kasulungan ag kabayaan nida. Usa-usa lang duy aku dahil maghampang kawu sa kangku, ag pagsabihun nimu sa kangku tungkul sa kanmu pangagalit.

¹⁸ Hayga duy unman magkatapus kang kakurian? Hayga unman yi mag-ayad kang manga biyag? Udyi aw duy lugud magkabulung inda? Ibuyu nimu duy aw lugud aku ga sapa magkak-at nu udas turungun?”

¹⁹ Nakan magkun sa kangku ti Panginuun, “Nu umampu kawu, pabalikun maan niku kawu sa arani niku hampay parargu di kawu makasirbi sa kangku. Nu mamagaw kawu manga matadlung pag bagay ag amanan ti manga bagay unman may pulus, buwatun maan niku kawu kang manugbagaw. Kailangan sida ti pumakarani sa kanmu, ag balaw kawu ti pakarani sa kanda.

²⁰ Buwatun niku kawu parihu sa maganit pag alad galang sa inda pag manga tawu. Kalabanun kawu nida dapat unman kawu nida madaug, dahil kaibahan nimu aku. Alagaan niku kawu ag iribri.

²¹ Iribri niku kawu sa kamang daut ag manugdahas pag tawu.”