Hirimyas 14 - Hanunuu

Masyadu Naglawig ti Init sa Huda

¹ Inda ti sinabi sa kangku Panginuun tungkul sa paglawig init:

² “Maghimanglaw ti Huda; kay manga banwa magpanlubay. Maglumi kay manga nasakupan matukawan sa daga, hanggan diman ti manga mag-ulian sa Hirusalim maglulumian gid.

³ Sinugu manga mayaman kanda manga panawuhun kuntay pagtaas danum. Nag-atag ngani sida sa manga bubun dapat ay unman may danum ati. Nakan nagbalik sida unman may sukad kanda manga sukadan, ag pinatumungan nida kanda ulu dahil sa masyadu pag kay-a.

⁴ Nanggil-ang ti daga dahil unman may uran. Ag dahil sa karukuan, pinatumungan manga manugtanman kanda manga ulu.

⁵ Una karasyaw tinayakan yi kay anak una bag-u lang lusad dahil udyi may malangba ilamnun.

⁶ Ti manga talun asnu matindugan sa arabwat pag rugar mag-alhal ga talun idu. Magdulum yi kanda pamantay dahil sa udyi may hararabun.”

⁷ Magkun ti manga tawu, “Panginuun nagsalan duy kami sa kanmu. Pirmi kami magpakarayu sa kanmu, nakan dapat lang kami parusahan. Dapat awati duy nimu kami, sa ikadayaw nimu ngaran.

⁸ Panginuun, kawu duy ti pag-asahan Israil, ti Manugribri sa udas kakurian. Hayga nagbaliw ga day-uhan lang kawu sitay sa kanmi? Hayga duy kawu ga manuglakaw magpat-ung lang usa ka yabi sa kanmi nasyun?

⁹ Parihu diman aw duy kawu sa tawu unman may magkabwat ag sundalu unman may kakayahan magribri? Kaibahan nimi kawu, Panginuun, ag kami kanmu nasakupan, nakan danga duy nimu kami pagpabay-ani.”

¹⁰ Inda ti sagut Panginuun sa manga tawu: “Ungud magkaibug yi gid kamu pumakarayu sa kangku; sadili lang niyu kagustuhan kanyu pagsundun. Nakan balaw yi niku kamu tanggapun bilang kang manga nasakupan. Balaw niku malimtan kanyu manga kadautan ag parusahan niku kamu.”

¹¹ Bag-u magkun sa kangku ti Panginuun, “Danga kawu magdarangin para sa kaayadan inda pag manga tawu.

¹² Una waya balaw sida manhandum karan-unun, balaw niku patingihan kanda maghagad awat sa kangku. Una manhandug waya sida manga handug pagsunugun ag handug pasalamat sa kangku, balaw niku tunda tanggapun. Bagkus ngap, matyun niku sida sa gira, lun-us, ag sarut.”

¹³ Dapat ay magkun aku, “Panginuun Diyus, alam duy nimu kuntay pirmi pagsabihun sa kanda manga purupita kuntay unman kunu may gira aw ngatay lun-us rumas-ug dahil magkun kunu kawu pakan-an nimu sida kahusayan sa kanda nasyun.”

¹⁴ Sinmagut ti Panginuun, “Tunda pag manga purupita maghula kapudilan sa ngaran niku. Balaw niku sida sinugu ag balaw aku ti magbagaw sa kanda. Balaw ginan sa kangku kanda pagsabihun pag manga pangakakitun sa kanyu; unman may pulus ag pinathaw lang kanda pag ihula.

¹⁵ Nakan aku, ti Panginuun, magkun parusahan niku ti manga pudilun pag manga purupita. Magbagaw sida sa ngaran niku una unman niku sida sinugu. Pagsabihun nida unman may rumas-ug gira ngatay lun-us sa inda pag nasyun, dapat sa gira ag lun-us sida pag midamhak.

¹⁶ Ag tungkul waydi sa manga tawu magpasnu sa kanda pagsabihun, kanda manga bangkay ipanyamut sa manga baklayan Hirusalim. Magkaramatay sida sa gira hanggan lun-us. Unman may manlubung sa kanda, sa kanda manga asawa, hanggan manga anak. Padapatan niku sida parusa angay gid sa kanda.

¹⁷ “Hirimyas, sabihun nimu inda sa manga tawu: Sirang yabi, unman may apas kang maglumi dahil garabi ti biyag niku manga nasakupan kang pagkilalan-un tugnaw pag anak, ag tutuu gid magkasaktan aku.

¹⁸ Nu atabug aku sa manga tanman hanggan sa banwa, mag-akitan niku ti manga bangkay namatay sa girahan ag lun-us. Ti manga purupita hanggan ti manga manughandug parargu di sa buruwatun nida dapat unman nida alam nu hintay ti pagbuwatun nida.”

Nagpakarani ti manga Tawu sa Panginuun

¹⁹ Panginuun, ungud aw dinayu yi nimu ti Huda? Ungud aw magkagalit kawu sa Hirusalim? Hayga duy pinarusahan nimu kami kainda ga udyi kami may pag-asahan maayadan? Magsarig duy kami pakan-an nimu kahusayan, dapat unman waydi inda may rinmas-ug. Magsarig duy kami umayad ti kahamtangan nimi, dapat ay kadalaan ti rinmas-ug sa kanmi.

²⁰ Panginuun, pagkilalahun nimi kanmi kadautan, hanggan ti kasalanan manga ginurang nimi. Nagsalan duy ungud kami sa kanmu.

²¹ Panginuun, sa ikadayaw nimu ngaran, danga duy nimu kami pagbugyahi. Danga duy pagpakay-ahan kanmu kadayaw-dayaw pag tukawan hari. Alalahana duy nimu kanmu kasunduan sa kanmi. Mana danga nimu inda pagdauta.

²² Unman una di usa ka diyus-diyusan manga nasyun ti makapauran ngatay makapaanitay. Una ti langit ngapu unman diman makapauran. Kawu lang, Panginuun kanmi Diyus ti lubus makabuwat inda, nakan sa kanmu duy kami pag magsarig.