Hirimyas 13 - Hanunuu

Ti Pahalimbawa sa Huragkus Linu pag Tila

¹ Magkun sa kangku ti Panginuun, “Paglakaw kawu ag pagbili huragkus pisahan linu. Ihigut nimu inda sa kanmu awak, dapat danga nimu pagpipii.”

² Nakan namili ngani aku huragkus, bag-u ihinigut niku inda sa kang awak angay sa sinabi Panginuun.

³ Bag-u magkun maan sa kangku ti Panginuun,

⁴ “Lubada kanmu binili huragkus ag pag-ati kawu sa may arani Sapa Iyupratis bag-u taguan nimu ati ti huragkus sa gil-ang batu.”

⁵ Nakan nag-ati ngani aku sa Sapa Iyupratis ag itinagu niku ati ti huragkus angay sa sinabi Panginuun.

⁶ Pagkadugay, magkun maan sa kangku ti Panginuun, “Pag-atag kawu sa Sapa Iyupratis, bag-u bul-a nimu ti ipinatagu niku sa kanmu ati pag huragkus.”

⁷ Nakan nag-atag ngani aku sa Sapa Iyupratis ag bin-ul niku ti huragkus sa kang nagtaguan, dapat daut yi ag udyi makinabangan.

^8-9 Bag-u magkun sa kangku ti Panginuun, “Katunda diman ti mangyari sa Huda marapalabaw hanggan sa subra pagpalabaw Hirusalim.

¹⁰ Dayu magsunud inda pag manga daut tawu sa manga pagsabihun niku. Pagsundun nida ti kagustuhan maganit nida tagipusuun magsirbi ag magsamba sa manga diyus-diyusan. Nakan miparihu sida sa tunda pag huragkus udyi mapakinabangan.

¹¹ Nu kabitay mana ti huragkus mahawudan maghut sa awak tawu, gustu diman mana niku ti tanan nasakupan Israil hanggan Huda mihawud maghut sa kangku. Pinili niku sida hampay dayawun nida aku ag galangun, dapat dayu sida mamatingi sa kangku. Aku, ti Panginuun ti magsabi inda.”

Ti Pahalimbawa tungkul sa Sukadan Intus

¹² “Hirimyas, sabihun nimu sa nasakupan Israil kuntay aku, ti Panginuun, ti Diyus Israil magkun, ‘Ti tanan sukadan niyu intus mapnu intus.’ Ag nu sumabi sida sa kanmu, ‘Alam yi nimi mapnu intus ti tanan sukadan nimi.’

¹³ Sabihun nimu sa kanda kuntay inda ti ibug niku sabihun: ‘Parusahan niku ti tanan nasakupan sa inda pag daga, parihu ga linangu niku sida intus. Parusahan niku ti manga hari kay linahi ni Dabid, ti manga manughandug, manga purupita, hanggan ti tanan nasakupan Hirusalim.

¹⁴ Panlintugun niku sida sa usa kag usa, ti gurang ag ti anak. Balaw gid aku maawa sa pagmatay sa kanda. Aku, ti Panginuun ti magsabi inda.’ ”

Pasandam tungkul sa Magpadayaw

¹⁵ Pagpatingi kamu kaayad, danga kamu marapadayaw, dahil nagbagaw ti Panginuun.

¹⁶ Dayawa niyu ti Panginuun niyu Diyus habang udwaya niya pag-ipadara ti kadudulman, ag habang udwaya kamu mag-italakpa sa madlum pag manga bantud. Ti rayaw pagsarigan niyu buwatun niya pingit pag kadudulman.

¹⁷ Dapat nu dayu waya gid mamatingi kamu, manlumi aku sa lihim dahil sa kanyu magpadayaw. Manlumi aku kabisug bumulus kang manga luwa dahil bihagun ti manga pinili Panginuun.

¹⁸ Sinugu aku Panginuun kuntay sabihun sa hari hanggan sa kay ina rayna pagdugsun sida gin sa kanda tukawan hari dahil arani yi bul-un sa kanda ulu ti marinu nida pag kuruna.

¹⁹ Talakpan ti manga sabian manga banwa sa Nigib. Udyi may makasulud ngatay makaluwas ati. Bihagun ti tanan taga Huda.

²⁰ Bantayi niyu ti manga kalaban magpatangad ginan sa kanaway. Hirusalim, naan yi kanmu nasakupan kanmu pag-ipadayaw, ipiniyar niku sa kanmu hampay alagaan nimu?

²¹ Hintay ti maramdaman nimu nu ti kakampi nimu pag nasyun ti sumakup sa kanmu? Unman aw manrukuan kawu ga usa ka babayi magkaanak yi?

²² Nu paingan-un nimu kanmu sadili nu hayga kawu nipadamhak ga babayi ginitas kay rutay ag ginahus, dahil sa kaadukun nimu kasalanan.

²³ Mailisan aw tawu mabiru kay kulay niya lukub? Mab-ul aw liyupardu kay riruk sa kay bilug? Unman gid! Katunda diman kamu pag manga taga Hirusalim, balaw kamu makabuwat mayad dahil ugali yi niyu ti magbuwat daut.

^24-25 Magkun ti Panginuun, “Wayakun niku kamu parihu sa upa pag-ipayag durus ginan sa pangawakawaan. Tunda ti patabgan niyu. Buwatun niku inda sa kanyu dahil kinalimtan niyu aku ag nagsarig kamu sa manga diyus-diyusan.

²⁶ Ibulad niku kamu sa kauyaan parihu sa babayi inubahan.

²⁷ Nakitan niku kanyu manga binwat mayagting magsamba sa manga diyus-diyusan sa kabantudan hanggan sa karatagan. Parihu kamu sa babayi baraydan subra yi sa pangaibug, ngatay ga manga magpanguragin. Kaawaawa kamu, manga taga Hirusalim! Tugka kapira kamu mamirmaminti sa mayagting?”