Hirimyas 12 - Hanunuu

Kan Hirimyas Riklamu

¹ Panginuun nu aku magriklamu sa kanmu pirmi duy matadlung kanmu sagut. Dapat aku taynguna may manga ipaingana duy tungkul sa kanmu katadlungan: Hayga duy ti daut pag tawu mag-abunda? Hayga ti manga tawu madaya sa kanmu may kahusayan kay buhi?

² Kanmu sida pagpapaladan ga puun kayu magpan-gamut, maglangba, ag magburak. Pagdayawun nida kawu sa panab-anan lang bibig nida, balaw ginan sa kanda tagipusuun.

³ Dapat aku kilala duy nimu Panginuun. Mag-akitan nimu kang manga pagbuwatun hanggan alam nimu kang basad tagipusuun. Guyuda nimu inda pag manga tawu ga manga karanidu atag sa iriyawan. Ipablag duy nimu sida hampay iyawun.

⁴ Kapira duy nguna tugka ti pagkauga daga ag pagkarubay manga ilamnun? Magkaramatay yi duy ti manga hayup hanggan manga manuk dahil sa kadautan manga tawu mag-uli sa inda pag daga. Pagsabihun waya nida, “Unman may labut ti Diyus sa kanta malakawan.”

Kay Sagut Panginuun

⁵ Magkun ti Panginuun, “Hirimyas, nu magkagasa kawu magpakaburukadan sa manga tawu, lalu waya sa manga kabayu. Nu mag-idapa kawu sa ratag pag rugar, lalu yi nu sa kapuruan arani sa Sapa Hurdan.

⁶ Una kanmu manga patar-ari hanggan katawuhan nagdaya sa kanmu. Maggayak daut sida laban sa kanmu. Danga kawu magpaniwala sa kanda una mayad kanda pagsabihun.

⁷ “Dayuun niku kang manga nasakupan, ti magkaapu niku pag nasyun. Ipakaun niku kang pagmahalun pag manga nasakupan sa manga kalaban nida.

⁸ Naglaban sida sa kangku ga liyun mag-ungal sa kapuruan. Nakan nangisug aku sa kanda.

⁹ Nagbaliw sida mayagting sa kangku ga manuk manugdagit. Ag sida ngapu magkasangputan manga manuk manugdagit. Tipunun niku ti maraisug pag hayup hampay kan-un sida.

¹⁰ Dautun kayamuan takinan kang ubasan, hanggan kang tanman kanda tatatataan. Bumaliw pangawakawaan ti marinu niku pag daga.

¹¹ Buwatun nida inda mapung-aw pag rugar ag bumaliw unman may pulus sa kangku. Bumaliw pangawakawaan inda pag daga, dahil udyi may magkaawa siyun.

¹² Rumas-ug ti manga manugdaut sa tanan arabwat pag rugar sa pangawakawaan. Gamitun niku sida pinagkabaladaw mandaut sa buu daga, ag unman may makapalagiw.

¹³ Kang manga nasakupan mamamgas tirigu, dapat mangani sida dugi. Mangungud sida sa tarabahu dapat unman sida may pakinabangun. Mangani sida kakay-ahan dahil sa kang masyadu pangagalit.”

¹⁴ Magkun waya ti Panginuun, “Inda ti buwatun niku sa tanan daut pag nasyun sa sangput Israil ti nagdaut daga ipinakaun niku sa kang nasakupan: Palayasun niku sida sa kanda daga parihu sa pagpalayas niku sa manga taga Huda sa inda ginan pag daga.

¹⁵ Dapat aban sa uryan, kaawaan di maan niku tunda pag manga nasyun bag-u ibalik di niku sida sa sadili nida ulian.

¹⁶ Basta nu tanggapun nida buu tagipusuun ti pagsarig niku manga nasakupan ag nu manumpa sida sa ngaran niku, parihu sa itinudlu nida sa manga nasakupan niku kuntay pagsumpa sa ngaran ni Baal, mahimu miminsan diman sida sa nasakupan niku.

¹⁷ Dapat ay una naan pag nasyun nu balaw sumunud sa kangku palayasun niku sida ginan sa kanda manga daga bag-u rurisun. Aku, ti Panginuun ti magsabi inda.”