Hirimyas 11 - Hanunuu

Ti Huda Balaw Nagtupad sa Kasunduan

¹ Magkun ti Panginuun sa kan Hirimyas,

² “Paalalahanan nimu sa manga taga Huda hanggan sa manga taga Hirusalim ti manga kailangan sundun sa kanmi kasunduan.

³ Sabihun nimu sa kanda, aku ti Panginuun, ti Diyus Israil, magkumun saadan niku ti dayu magsunud sa manga pagsabihun sa inda pag kasunduan.

⁴ Isinugu niku inda sa kanyu manga ginurang pagka sa sirang ipinalwas niku sida sa Ihiptu, sa rugar ga maglabdaban pugun turunawan baul. Magkun aku sa kanda, ‘Nu sundun niyu aku hanggan ti tanan niku pag-isugu, kamu kang yi nasakupan ag aku yi kanyu Diyus.

⁵ Hampay tupadun niku kang itinaratu sa kanyu manga ginurang kuntay pakan-an niku sida marinu ag abunda pag daga — ti ulianan niyu pag daga taynguna.’ ” Bag-u sinabi niku magkun, “Katida ngani mana, Panginuun.”

⁶ Bag-u magkun maan sa kangku ti Panginuun, “Sabihun nimu inda tanan kang manga bagaw sa manga banwa Huda hanggan sa manga baklayan Hirusalim: ‘Alalahana niyu ag tupada ti manga pagsabihun sa inda pag kasunduan.

⁷ Sa udas ipinalwas niku kanyu manga ginurang sa daga Ihiptu taynguna tugka pag sirang, paulit-ulit niku sida pagbilinan kuntay kailangan nida aku sundun.

⁸ Dapat ay balaw sida namatingi ag balaw nida binati ti pagsabihun niku. Bagkus ngap, napaangay sida sa kanda kaganitan ag kadautan tagipusuun. Pagsabihun niku sa kanda sunda nida inda pag kasunduan, dapat unman nida sinunud. Nakan ipinadara niku sa kanda ti tanan saad pagsabihun sa kasunduan.’ ”

⁹ Magkun maan ti Panginuun sa kangku, “Ti manga taga Huda hanggan manga taga Hirusalim may daut gayak laban sa kangku.

¹⁰ Hinuwad nida ti manga binwat kasalanan nida manga ginurang balaw gid nagpaniwala sa kang manga bagaw. Nagsamba diman sida sa manga diyus-diyusan. Ti nasakupan Israil hanggan Huda parihu naglabag sa binwat niku kasunduan sa kanda manga ginurang.

¹¹ Nakan aku, ti Panginuun magsabi, mamadara aku sa kanda kaparusahan kuntay unman nida makapaiwas. Una manhagad sida awat sa kangku, balaw niku sida patingihan.

¹² Nakan manhagad yi lang sida awat sa manga diyus-diyusan kanda pagsagdahan kamangyan, dapat unman diman sida maawatan tunda pag manga diyus-diyusan nu rumas-ug yi ti parusa.

¹³ “Kamu pag manga taga Huda, pagkayamu kanyu manga diyus-diyusan, parihu kay kayamu sa kanyu manga banwa. Ag nu kabitay kayamu ti manga baklayan sa Hirusalim, katida diman kay kayamu ti harandugan ipinatindug niyu hampay sunugan kamangyan para sa mayagting pag diyus-diyusan ni Baal.

¹⁴ “Nakan Hirimyas, danga yi kawu magdarangin para sa inda pag manga tawu. Danga yi kawu magpaawa-awa sa kangku para sa kanda, dahil balaw niku sida sagtun nu manawag sida sa kangku sa udas nida kakurian.

¹⁵ Nagbuwat aduk pag kadautan kang pagmahalun pag manga nasakupan. Udyi sida may karampatan umatag sa Balay Diyus niku. Balaw maampara manga handug nida ti kaparusahan rumas-ug sa kanda. Magbaya waya sida sa pagbuwat daut.”

¹⁶ Kaybi sa un-an ipinaparihu sida Panginuun sa usa ka malangba pag puun ulibu mayamu kay burak. Dapat sa bigla lang paglawuy maglabdaban apuy, mawayak sida ga tinutdan manga sanga udyi may makinabangan.

¹⁷ Ti Panginuun Makamaskihan ti nagpatindug sa Huda hanggan sa Israil, dapat ay taynguna pag-isugu niya wasakun inda, dahil daut ti pagbuwatun nida. Ginalit nida ti Panginuun sa panab-anan pagsagda kamangyan sa kan Baal.

Ti Gayak Matyun si Hirimyas

¹⁸ Magkun sa kangku ti Panginuun tungkul sa gayak manga kalaban maglaban sa kangku.

¹⁹ Aku parihu sa karanidu marignuk pagdaran-un sa iriyawan balaw niku magkaalaman. Unman alam niku kuntay pag gayakun maaw aku nida matyun. Magkun sida, “Matyun nita siya parihu sa magpukan puun kayu may manga burak, hampay madura siya sa kalibutan ag malimtan yi.”

²⁰ Dapat nandarangin aku, “Panginuun Makamaskihan, matadlung duy kawu nu magsintinsiya. Magkaalaman duy nimu ti isip hanggan ti tagipusuun tawu. Pakakitan duy nimu sa kangku kanmu pagbalus sa kanda, dahil ipinabahala niku sa kanmu kang riklamu.”

^21-22 Pagkaibgan matyun aku taga Anatut nu balaw aku umapas sa pagtultul bagaw Panginuun. Nakan inda ti pagsabihun Panginuun Makamaskihan, “Parusahan niku sida. Mamatay sa gira kanda manga kalay-awan lalaki, ag mamatay sa lun-us kanda manga anak.

²³ Unman gid may masawad buhi sa manga taga Anatut, dahil maruris sida sa udas parusahan yi niku sida.”