Hirimyas 10 - Hanunuu

Kaparusahan ti Burak Pagsamba sa manga Diyus-diyusan

¹ Nasakupan Israil, patingihi niyu ti pagsabihun Panginuun.

² Pagsabihun niya, “Danga niyu paghuwada ti pag-ugaliun iba nasyun. Maghanap sida manga tanda mag-akitan sa langit. Dapat magkadala sida sa tunda pag manga tanda kanda mag-akitan. Danga niyu inda paghuwada.

³ Unman may pulus kanda pag-ugaliun. Magpukan sida manga puun kayu sa puru bag-u pagpalahaban nida sa antigu pag manuglahab.

⁴ Pagparinuan nida manga pilak ag gintu, bag-u pagpakuan kaayad hampay balaw magpu.

⁵ Inda pag manga diyus-diyusan ga tawu-tawu pamadala manuk sa tanman unman makabagaw. Kailangan waya inda kabyawun dahil balaw makalakaw. Danga kamu magkadala sa inda pag manga diyus-diyusan dahil unman sida makabuwat daut ag unman diman makabuwat mayad.”

⁶ Panginuun, unman duy kawu may kaparihu. Makamaskihan kawu ag may kadayawan kanmu ngaran.

⁷ Si unu duy ti unman madala sa kanmu, Hari manga nasyun? Dapat lang galangun kawu. Unman duy kawu may kaparihu sa tanan matinudukun ginan sa tuhay-tuhay pag nasyun, aw ngatay sa tanan hari.

⁸ Tanan sida maraganit kay ulu ag manga busal. Unman duy may pulus ti manga tudlu tungkul sa kanda manga diyus-diyusan binwat sa kayu.

⁹ Namabuwat duy sida sa manga manugpanday hanggan sa panday-pilak diyus-diyusan pinahaklupan pilak ginan sa Tarsis ag gintu ginan sa Upas. Bag-u pinasulungan duy nida rutay malatuy bag-u kulay dungun tinahi madunung pag manga manugtahi.

¹⁰ Dapat ti Panginuun imaw ti tutuu pag Diyus. Siya ti buhi pag Diyus ag Hari unman may katapusan. Nu magkagalit siya magkatandug ti kalibutan, unman may nasyun makapadugay sa masyadu gid pag galit niya.

¹¹ Sabihun niyu sa manga magsamba sa tuhay pag diyus, “Kanyu manga diyus balaw naglalang langit ag daga pihu madura di sa kalibutan.”

¹² Dapat Diyus ti naglalang langit ag daga sa panab-anan niya kamaskihan ag kadunungan.

¹³ Sa kay sugu magpaywas ti danum sa langit. Magpaluwang siya manga rurum hanggan manga kilat sa kalangitan ag mag-ibuhus ti mabisug pag uran. Pag-ipalwang niya ti durus ginan sa kay palaulian.

¹⁴ Manga busal ag unman may namuangan ti manga magsamba sa manga diyus-diyusan. Mangay-a lang ti manga panday-pilak magbuwat manga diyus-diyusan, dahil balaw waydi tunda tutuu pag manga diyus. Balaw sida may buhi.

¹⁵ Unman sida may pulus ag kailangan kadat-an sida. Rumas-ug ti sirang dautun tunda tanan.

¹⁶ Dapat kay Diyus ni Hakub balaw parihu sa kanda. Siya ti nagbuwat tanan pag manga bagay, hanggan Israil, kay sadili pag nasakupan. Panginuun Makamaskihan kay ngaran.

Ti Rumas-ug pag Kadamhakan

¹⁷ Manga taga Hirusalim, tipuna yi niyu kanyu manga kasiyunan pag-ighit yi, dahil arani yi girahun kanyu banwa.

¹⁸ Dahil inda ti pagsabihun Panginuun, “Pagpatingi kamu! Paighitun niku kamu sitay ginan pag daga. Pakurianan niku kamu tugka sa masamitan niyu ti pangagalit niku.”

¹⁹ Magkun ti manga taga Hirusalim, “Kaawaawa gid kita dahil sa kadamhakan nita. Masyadu gid kanta kahamtangan, dapat kailangan nita inda agwantahun.

²⁰ Nawasak yi kanta manga pag-ulianan; nabugtas yi kay manga higut. Udyi kanta manga kasimanwa. Udyi may nasawad mangawat mamatindug uman kanta manga pag-ulianan.”

²¹ Sinmagut aku, “Nangyari inda sa kanta dahil busal ti manga takinan nita. Unman sida nagpakarani sa Panginuun hampay mamaingana. Nakan ngani unman sida nanalu, bag-u nagkaralat kanda manga nasakupan.

²² Patingihi niyu ti matnug pag iringayan manga sundalu magras-ug ginan sa kanaway! Wasakun nida ti manga banwa Huda ag ulianan wadi inda manga talun idu.”

Kay Darangin ni Hirimyas

²³ Panginuun, alam niku ti buhi tawu balaw sadili niya. Balaw siya ti may hiyaput sa kay aratubangun.

²⁴ Itadlung duy nimu kami Panginuun, angay lang sa kanmi kaya. Danga duy nimu inda pagbuwata sa kanmi dahil sa kanmu pangagalit, barang udyi may masawad sa kanmi.

²⁵ Ipasamit duy nimu kanmu pangagalit sa manga nasyun balaw magkilala sa kanmu hanggan sa manga tawu balaw magdulud sa kanmu. Dahil tinabu duy nida ti linahi ni Hakub, ag pinandaut kay manga ulian nida.