Hirimyas 1 - Hanunuu

¹ Inda ti manga tultulanun ni Hirimyas kay anak ni Hilkiyas. Si Hilkiyas usa sa manga manughandug ati sa Anatut sa daga ni Binhamin.

² Ipinakaun Panginuun sa kan Hirimyas kay tultulanun katpung ika-13 pag timpu sa kay maghari ni Usyas sa Huda. Inda si Usyas kay anak ni Amun.

³ Parargu kay magpakaun tultulanun ti Panginuun sa kan Hirimyas tugka sa panahun maghari ni Hihuyakim kay anak ni Usyas, hanggan waya sa ika-11 pag timpu kay maghari ni Sidikyas kay anak diman ni Usyas. Pagka sa ikalima pag bulan sa ati pag timpu, binihag ti manga taga Hirusalim.

Kay Nagtawag sa kan Hirimyas

⁴ Magkun sa kangku ti Panginuun,

⁵ “Hirimyas, bag-u kawu hinistuda sa tiyan nimu ina, pinili yi niku kawu. Bag-u kawu ilinusad, pinili yi niku kawu hampay mamurupita sa manga nasyun.”

⁶ Sinmagut aku, “Panginuun Diyus, balaw duy aku madunung magbagaw, dahil anak waya baliwa aku.”

⁷ Dapat magkun ti Panginuun sa kangku, “Danga nimu sabihun anak waya kawu. Kailangan umatag kawu una naan tag pag suguun niku, sabihun nimu ti pag ipasabi niku sa kanmu.

⁸ Danga kawu magkadala sa manga tawu dahil kaibahan nimu aku ag awatan niku kawu. Aku, ti Panginuun, ti magsabi inda.”

⁹ Bag-u hinikap Panginuun kang tarip bibig ag magkun, “Ipakaun niku sa kanmu taynguna ti sarabihun nimu pag manga bagaw niku.

¹⁰ Taynguna pag sirang pakan-an niku kawu kapangyarihan magbagaw sa manga nasyun hanggan sa manga kaharian. Sabihun nimu sa kanda kuntay ti iba sa kanda midamhak gid, ti iba bumangun di ag tumindug uman.”

¹¹ Pagkatapus, pinaingana aku Panginuun, “Hirimyas, hintay ti nakitan nimu?” Sinmagut aku, “Sanga duy almindru.”

¹² Magkun ti Panginuun, “Tama kawu, nangahulugan tunda magbantay aku hampay siguraduhun matupad ti manga pagsabihun niku.”

¹³ Utru nagpaingana ti Panginuun sa kangku, “Unu waya ti nakitan nimu?” Sinmagut aku, “Usa ka anglit duy magkulkulu kay sukad, matagilidan inda ginan baliwa sa kanaway.”

¹⁴ Magkun ti Panginuun, “Tama, dahil may rumas-ug dilikadu ginan sa kanaway sa tanan nasakupan sa inda pag daga.

¹⁵ Ipadara niku ti manga sundalu manga kaharian ginan sa kanaway hampay girahun ti Hirusalim. Ipauli nida manga hari kanda manga tukawan sa manga sabian Hirusalim. Dautun nida ti alad batu sa sangput hanggan ti iba waya pag manga banwa sa Huda.

¹⁶ Parusahan niku kang manga nasakupan dahil sa kanda kadautan. Binugyahan nida aku, nagtuub sida kamangyan sa manga diyus-diyusan. Sinamba nida kanda binwat pag manga diyus-diyusan.

¹⁷ Hirimyas, ialistu nimu kanmu sadili. Pag-ati kawu, sabihun nimu sa kanda ti tanan niku pagsabihun sa kanmu. Danga kawu magkadala sa kanda. Dahil nu kawu madala, lalu kawu kang padalaun sa atubangan nida.

¹⁸ Pagpatingi kawu! Parig-unun niku kawu taynguna parihu sa inaladan batu pag banwa ngatay baul pag tulduk ngatay alad galang. Unman tumalu sa kanmu ti manga hari, ti manga may kangaranan, ti manga manughandug, ngatay ti manga nasakupan Huda.

¹⁹ Kalabanun nida kawu, dapat unman nida kawu matalu, dahil ibahan ag awatan niku kawu. Aku, ti Panginuun, ti magsabi inda.”