Hibriyu 9 - Hanunuu

Ti Duwa ka Turda

¹ Ti un-an pag taratu may bilin diman waydi tungkul sa pagsamba sa Diyus hanggan tungkul sa balay sambahan sitay sa babaw daga.

² Binwat nida ti usa ka Turda. Kay sanggaan iningarnan Banal pag Sulud-sulud. Ati kay palaulian sulu, kay lamisa, hanggan kay tinapay pag-ibugtang sa atubangan Diyus.

³ Ti ikadwa pag sulud limbun iningarnan Pinakabanal pag Sulud-sulud.

⁴ May gintu pag harandugan turuuban kamangyan hanggan Kaban Kasunduan, pinababawan gintu sa sulud hanggan sa luwas. Tunda pag Kaban palaulian gintu pag sukadan mana pag karan-unun hanggan kan Aarun sugkud imaw ti namsang. Siyun diman sa Kaban ti manga tinabla batu sinuratan taratu.

⁵ Sa kay babaw Kaban may manga kirubin pag anghil magpakilala siyun ti kadayawan Diyus, kanda manga pakpak maghamuy sa taklub Kaban, imaw ti Ulian Pangaawa. Dayu nita matigus-a sa harampangan inda pag manga bagay taynguna.

⁶ Pagka katida yi kay kaayusan, ti manga manughandug sa Balay Diyus pirmi magsaka sa kay sanggaan Turda hampay magtupad sa kanda katungkulan.

⁷ Dapat nu sa kay Pinakabanal pag Sulud-sulud ti pangulu lang manughandug sa Balay Diyus tigsaka kas-a lang sulud usa ka timpu. Kailangan siya may dara dugu hampay kay pag-isagda sa Diyus, panlukat sa kay sadili manga kasalanan hanggan sa manga iba kanda binwat balaw tikis pag kasalanan.

⁸ Sa tunda yi ngani pag buruwatun pag-ipakilala yi Ispiritu Banal udwaya mabukasan ti Pinakabanal pag Sulud-sulud hanggan sa udwaya mab-ul ti Banal pag Turda.

⁹ Usa ka pahalimbawa tunda sa taynguna pag udas. Kay gustu sabihun ti manga kaluub hanggan manga hayup pagmatyun pag-isagda sa Diyus balaw lubus makalumpiyu sa tagipusuun hanggan sa naisipan manga tawu magsamba sa Diyus.

¹⁰ Dahil tunda pag manga bilin tungkul lang sa manga karan-unun tawu, sa kanda pag-inmun hanggan sa kanda tun-anun sa mag-ugas. Nakan may kahulugan lang pag manga bilin hanggan sa udwaya binag-u Diyus ti tanan pag manga bagay.

¹¹ Dapat ay nagsitay yi si Kiristu. Siya yi ti pangulu manughandug tungkul sa kaayadan kay itinaratu Diyus. Manughandug siya sa mas mayad yi pag Turda unman gid may kakurangan. Dahil tunda pag Turda unman binwat tawu kamang, unman diman waydi para sitay sa babaw daga.

¹² Kas-a lang gid pag nagsaka si Kiristu ati sa Pinakabanal pag Sulud-sulud, udyi kailangan ulitun. Sa kay nagsaka may dara diman siya dugu hampay siya makaatubang sa Diyus, dapat balaw dugu kambing, balaw diman dugu ibun baka nu unman kay ngap sadili pag dugu. Nakan unman may katapusan kay kinamhan ati pag karibrihan sa kanta manga kasalanan.

¹³ Dahil ti dugu manga kambing manga tudu baka hanggan kay ayum tarnida baka iwinidwisik sa manga tawu, naglumpiyu diman sa kanda nu sida nagkasala sa manga ibinilin sa Kasuguan.

¹⁴ Lalu gid waya daka kay namhan dahil sa dugu ni Kiristu. Dahil sa kamaskihan Ispiritu unman may katapusan ipinakaun niya kay sadili sa Diyus unman may huput kasalanan. Kay dugu ni Kiristu tiglumpiyu sa kanta tagipusuun hanggan naisipan sa manga buwat unman may kabuluhan hampay kita magsirbi sa Diyus buhi.

¹⁵ Sa kay pagkamatay linukat ni Kiristu ti manga tawu ginan sa manga kasalanan kanda binwat sa kanda di waya sakup sa un-an pag taratu. Nakan si Kiristu ngani tigpamahala sa bag-u pag taratu hampay ti manga pinili Diyus makatanggap sa kay itinaratu pag papalad unman may katapusan.

¹⁶ Dahil nu may taratu pamana kailangan ngani mamatay dapu kay manugtaratu, bag-u di matupad ti taratu.

¹⁷ Ti taratu pamana kabay dayu waya matupad hanggan sa udwaya mamatay kay apu.

¹⁸ Nakan ti un-an pag taratu pinarig-un diman nida sa dugu manga hayup kanda minatay ihinandug sa Diyus.

¹⁹ Ipinaliwanag dapu ni Muysis sa manga tawu ti tanan buruwatun angay sa Kasuguan. Bag-u bin-ul niya ti dugu baka manga kambing, linakayan danum ti dugu, bag-u isinawsaw niya sa dugu ti marara pag bulbul karanidu hanggan ti sanga isupu bag-u kay winidwisikan ti ribru Kasuguan hanggan ti tanan tawu.

²⁰ Bag-u magkun siya, “Inda yi gid pag dugu ti itinalaghut sa taratu kay ibinilin Diyus sa kanyu.”

²¹ Katunda diman winidwisikan diman niya dugu ti Turda ag ti tanan kanda kagamitan sa kanda magsamba.

²² Angay sa Kasuguan harus ngani ti tanan bagay paglumpiyuhun sa dugu, ag nu unman may nabuhus dugu, unman waydi may kapatawadan sa kasalanan.

May Kapatawadan sa Kasalanan dahil sa kan Kiristu Kamatayan

²³ Kailangan lumpiyuhun sa katunda pag paraan ti manga bagay kanda paggamitun sa kanda magsamba, kanda hinuwad ginan sa manga kagamitan sa langit. Dapat ay lalu mahalaga pag ihandug sa Diyus ti kailangan tungkul sa manga kagamitan sa langit.

²⁴ Dahil si Kiristu nagsaka sa banal pag rugar balaw binwat tawu kamang ag unman hinuwad ginan sa kay tutuu. Siyun ngap siya sa langit gid sa atubangan Diyus hampay magpamahala sa kanta.

²⁵ Ti pangulu manughandug sa Balay Diyus magsaka timpu-timpu sa Pinakabanal pag Sulud-sulud may dara dugu manga hayup. Dapat si Kiristu kas-a lang sinmaka hampay kay ipakaun niya kay sadili kang-ud yi gid, udyi ulitun.

²⁶ Nu abi balaw katida, kailangan mana paulit-ulit si Kiristu mamatay ginan waya sa umpisa pagkalalang kalibutan. Dapat pagka kainda arani yi ti katapusan kalibutan ipinaburayhaw siya kas-a lang bag-u ipinakaun niya kay sadili sa Diyus hampay mab-ul yi ti kasalanan kalibutan.

²⁷ Ti kada tawu kas-a lang gid mamatay, bag-u sintinsiyahan yi siya Diyus.

²⁸ Katunda diman waydi si Kiristu kas-a lang namatay, ipinakaun niya kay buhi sa Diyus ag inaku niya ti kasalanan kalibutan. Bumalik siya aban, balaw yi hampay mamatay maan tungkul sa manga kasalanan tawu, nu unman hampay iribri niya ti manga magpatigagad sa kanya.