Hibriyu 8 - Hanunuu

Si Hisus Kanta Pangulu Manughandug sa Balay Diyus

¹ Inda yi ngani ti katutuuhanan sa tanan kanmi sinabi. Kita ungud may pangulu manughandug matukawan ati sa langit baliwa sa sikun Diyus minsan sa Karampatan Diyus sa maghari.

² Manughandug siya sa Banal pag Sulud-sulud sa tutuu pag Turda, kay ibinungsud Panginuun, balaw binwat tawu.

³ Dahil ti kada pangulu manughandug sa Balay Diyus binugtangan katungkulan hampay kay ihandug niya sa Diyus manga pagkaun hanggan manga hayup pagmatyun pagsunugun. Nakan kailangan diman waydi may alistu siya manga handug sa Diyus.

⁴ Nu abi si Hisus sitay sa babaw daga, balaw makahandug siya sa Balay Diyus dahil may manga maghandug yi waydi manga handug sa Diyus angay sa Kasuguan.

⁵ Sida magsirbi ga sa anyu aninu Balay Diyus sa langit. Dahil pagka buwatun yi ni Muysis ti Turda, binilinan siya Diyus magkun, “Pag-ingat kawu, buwata nimu ti tanan manga bagay angay gid sa kay tutuu pag mustara ga kang ipinakakit sa kanmu sa bantud.”

⁶ Lalu gid mahalaga kay natanggap ni Hisus pag katungkulan sa manughandug balaw lang ga kanda ni Aarun pag katungkulan. Dahil ti taratu kay pagpamahalaan ni Hisus lalu diman waydi mahalaga, inda pag taratu kay pinagkapuun lalu mayad pag manga itinaratu.

⁷ Dahil nu abi kang-ud yi ti un-an pag taratu, udyi waydi kailangan paghanapun waya Diyus rugar para kay ikadwa.

⁸ Pagka nakitan Panginuun may kakurangan sa kay nasyun, sinabi niya magkun, “Nu sa kay kaudasan aban, magkun ti Panginuun, buwatun niku ti bag-u pag taratu sa linahi ni Israil ag sa lahi ni Huda.

⁹ Ti bag-u taratu balaw miparihu sa daan taratu ga kang binwat kaybi sa kanda manga ginurang, sa ati katpung kang naggiya sa kanda hampay ipalwas sida ginan sa daga Ihiptu.” Magkun ti Panginuun, “Unman nagtupad sida sa kang taratu, nakan pinabay-anan niku sida.”

¹⁰ Magkun ti Panginuun, “Pagkatapus ati, buwatun niku inda pag taratu sa nasyun Israil. Ipauli niku kang manga Kasuguan sa kanda naisipan, ag isurat sa kanda manga tagipusuun. Aku kanda yi Diyus aban, sida aban kang yi nasyun.

¹¹ Aban udyi may tawu manudlu waya sa kay kaparihu una sa kay patar-ari magkun, ‘Kilalan-a nimu ti Panginuun.’ Dahil kumilala yi gid sa kangku ti tanan tawu ginan sa pinakaababa hanggan sa pinagkaabwat.

¹² Kaawaan niku sida una sida nagkasala. Kanda kasalanan balaw yi alalahanun niku.”

¹³ Pagka sinabi Diyus magkun, “usa ka bag-u taratu,” linuma niya ti un-an pag taratu. Ag una hintay pag bagay nu daan yi ag udyi mayad balaw madugay madura yi.