Hibriyu 6 - Hanunuu

¹ Nakan danga yi kanta pag-adalan ti nalawyan yi pag manga adal tungkul sa kan Kiristu. Pagparargu yi kita ilubus nita kanta tudlu. Danga yi balikan nita ti kabag-u itinudlu tungkul sa pag-ampu sa manga unman may kabuluhan pag tarabahu, hanggan tungkul sa pagsarig sa Diyus,

² tungkul sa tudlu sa manga tulbaw, sa pagkupa manga kamang, ag sa pagkabuhi uman manga namatay, ag tungkul sa pagsintinsiya unman may katapusan.

³ Bagkus pagparargu gid kita sa kanta magtudlu, inda ngani kanta buwatun nu ipahintulut Diyus.

⁴ Dahil dayu yi mauman mataban sa pag-ampu sa kasalanan ti manga tawu nu ginan yi sa karayawan Panginuun bag-u kanda pinatlikudan maan. Pinakan-an sida manga kaayadan ginan sa langit, tinanggap waydi nida ti Ispiritu Banal.

⁵ Nasamitan yi nida ti kaayadan Bagaw Diyus hanggan ti manga kapangyarihan lubus mihayag pagka sa kaudasan aban.

⁶ Dayu yi mauman sida mataban sa pag-ampu sa kasalanan dahil ga kanda ngap pag-ipaku maan ti Anak Diyus sa kurus ag pag-ipasurug maan nida siya sa hayagan.

⁷ Pagpapaladan Diyus ti daga nu hurum dahil uranan bag-u tubuan manga tanum makinabangan niya apu.

⁸ Dapat nu tunda pag daga tubuan manga ilamnun dugihan kay iba, unman may gana tida pag daga ag udyi dugay aban saadan yi Diyus pihu irubun aban apuy.

Pihu ti Taratu Diyus

⁹ Dapat ay duy manga patar-ari, madi katida kanmi pagkumnun, balaw diman kuntay kami mag-alinlangan tungkul sa kanyu. Pihu kaayadan ngap ti kanyu patabgan angay sa kanyu karibrihan.

¹⁰ Dahil ti Diyus matadlung ag unman pagkalimtan niya kanyu kasipagan hanggan kanyu pagmahal sa kay ngaran. Makitan yi waydi kanyu pagmahal sa Diyus dahil sa kanyu magsirbi sa manga magsarig sa kanya una kaybi ginan hanggan taynguna tugka.

¹¹ Daka mana kanmi gustu pagpakakit di gid ti kada usa sa kanyu kay kasipagan, danga magpanlubay hanggan sa katapusan, hampay matanggap niyu ti kanyu paghingabtun.

¹² Nakan danga kamu magbugya. Huwada ngap niyu ti manga matiniisun sa kanda magsarig sa Diyus dahil sida ngani tigtanggap sa kay itinaratu Diyus.

¹³ Sa kay nanaratu ti Diyus sa kan Abraham, nagsumpa siya sinampit niya kay sadili ngaran, dahil udyi may iba sampitun makamaskihan nu unman siya lang.

¹⁴ Magkun siya, “Tutuu gid papaladan niku kawu ag payamuun kanmu linahi aban.”

¹⁵ Nakan ngani pagka nagtiis sa alagad si Abraham, tinanggap niya ti itinaratu Diyus.

¹⁶ Nu abi may manga tawu magtalaluhan bag-u may surumpaan, pagsampitun nida ti lalu makapangyarihan sa kanda hampay parig-unun kanda patutuu, bag-u napda kanda magtalaluhan.

¹⁷ Katunda diman kay gustu Diyus ipakilala sa tawu sa makatanggap kay manga itinaratu niya pihu dayu mauman kay gayak. Nakan nagsumpa waya siya hampay udyi may alinlangan sida.

¹⁸ Ti sumpa kag ti taratu balaw magkauman ag dayu mahimu makapudil ti Diyus. Nakan kita ti manga nagdangup sa kanya, marig-un kita sa kanta maghingabut sa kay itinaratu.

¹⁹ Nu may paghingabtun kita, ga pinunduhan marig-un kanta naisipan ag balaw magkaanggihut, makalawuy di sa limbun rutay Balay Diyus makasulud sa Pinakabanal pag Sulud-sulud.

²⁰ Sinmaka ati si Hisus hampay siya tigpamahala sa kanta. Siya waydi kanta manugpanguna. Ati siya ti pangulu manughandug sa Balay Diyus hanggan waya aban, angay sa karampatan kay minana ginan sa kan Milkisidik.