Hibriyu 5 - Hanunuu

¹ Ti kada pangulu manughandug sa Balay Diyus pinili ginan sa manga tawu hampay sumirbi sa Diyus para sa kanda. Siya tig handug manga kaluub sa Diyus ag manga hayup pagmatyun panlukat sa kasalanan.

² Madunung siya magpasunaid sa manga unman nakatau ag sa manga magsimray dahil una siya may manga kalumuyan diman waydi.

³ Nakan kailangan siya maghandug sa Diyus manga hayup minatay dahil sa manga kasalanan balaw lang tungkul sa manga iba tawu nu unman hanggan tungkul diman sa kay sadili bilug.

⁴ Una si unu pag tawu unman umapu lang tunda pag katungkulan. Diyus lang tigpili sa tawu hampay siya pangulu manughandug sa Balay Diyus ga kay diman nagpili sa kan Aarun.

⁵ Katunda diman waydi si Kiristu unman siya nagpalabi-labi, ag unman inapu lang niya tunda pag karampatan, nu unman Diyus diman ngap ti nagpili sa kanya hampay siya yi ti pangulu manughandug. Magkun ti Diyus, “Kawu kang Anak, taynguna ibarita yi niku aku kanmu Ama.”

⁶ May sinabi waya ti Diyus sa tuhay pag bahagi Kasuratan magkun, “Kawu ti manughandug hanggan aban. Sa kanmu kay pamana karampatan ni Milkisidik.”

⁷ Pagka sa babaw waya daga si Hisus, nandarangin siya, ainalsa kay busis, nanlumi nagdangup sa Diyus sa may kamaskihan makaribri sa kanya sa kamatayan. Ag nadnugan diman kay darangin dahil sa kay nagpakumbaba nagpasakup sa Diyus.

⁸ Madi siya Anak, sa kay mag-agwanta kakurian naanad siya sa magpasakup sa Diyus.

⁹ Natupad yi niya ti buu kagustuhan Diyus. Nakan ginan sa kanya pag makatanggap karibrihan unman may katapusan ti manga tawu nu magpaniwala sa kanya;

¹⁰ dahil siya ti pinili Diyus bilang pangulu manughandug parihu sa pagkamanughandug ni Milkisidik.

May Paanyu ti Diyus sa manga Niblag

¹¹ Mayamu waya mana kanmi sabihun tungkul sa inda dapat makuri mipaliwanag dahil naglumuy kamu sa kanyu intindi.

¹² Dahil mana kamu kainda madunung yi magtudlu, dapat kailangan ngap may magtudlu waya maan sa kanyu tungkul sa kabag-u ginan pag umpisa adal Bagaw Diyus. Gatas maan kanyu kailangan, bukun maaw maganit pag karan-unun.

¹³ Ti magkabuhi sa gatas lapsag waya, udwaya may intindi sa daut ag sa mayad.

¹⁴ Dapat ti may manga idad yi, magkaun maganit karan-unun, dahil sida nagpaanad yi naantigu magkilala sa daut sa mayad.