Hibriyu 4 - Hanunuu

¹ Hanggan taynguna tugka imaw diman pag taratu Diyus sa kanta, kita makaslud hampay may kaariwayahan sa kay arani. Inda ti dapat nita ingatan gid, bagay may tawu sa kanyu unman makahimu makaslud.

² Dahil ti Mayad pag Barita itinultul diman sa kanta parihu ga sa kanda kaybi. Dapat unman nida napakinabangan tunda pag barita kanda nadnugan, dahil pagka nadnugan nida, unman sida nagsarig sa kanda tagipusuun.

³ Kita bay manga magsarig sa Diyus nakan kita makaslud ngani hampay may kaariwayahan sa kay arani. Dahil inda kay sinabi Diyus magkun, “Nakan ngani sa kang pangagalit sinaadan niku sida magkun, dayu gid sida makaslud sa kang ihinanda pag daga may kaariwayahan.” Nu sa ungud natapus kay manga buwat Diyus pagka linalang yi niya ti kalibutan.

⁴ Dahil sa usa ka bahagi sa Banal Kasuratan kay sabi kainda tungkul sa ikapitu pag sirang magkun, “Pagka sa ikapitu pag sirang tapus yi ti tanan binwat Diyus. Nagpahari siya sa ikapitu pag sirang sa tanan kay binwat.”

⁵ Dapat kay diman sabi sa Banal Kasuratan magkun, “Dayu gid sida makaslud sa kang ihinanda pag daga may kaariwayahan.”

⁶ Ti manga un-an waya gid nakadnug sa Mayad pag Barita, unman nakaslud unman nakasamit kaariwayahan sa kay arani Diyus dahil sa kanda naglaban. Dapat ay may imaw waya sumulud sumamit sa kaariwayahan sa kay arani Diyus.

⁷ Nakan nag-utru ti Diyus nag-alistu usa maan ka sirang kay pagkumnun, “Taynguna.” Pagka lawuy dugay pag timpu imaw diman ti ipinadakit ni Dabid pag binagaw Diyus magkun, “Taynguna nu madnugan niyu kay magbagaw, danga pagpaganita niyu kanyu manga tagipusuun.”

⁸ Dahil nu abi dinara ni Huswi ti manga tawu tabug sa lubus kaariwayahan, udyi mana may bagawun ti Diyus tungkul sa usa waya ka kaudasan kaariwayahan.

⁹ May nasawad waya ngani usa ka kaudasan kaariwayahan para sa nasyun Diyus parihu sa kay nagpahari ti Diyus sa ikapitu pag sirang.

¹⁰ Dahil ti tawu nu nakaslud nakasamit sa kaariwayahan sa kay arani Diyus, maariwaya yi waydi sa kay manga buwat parihu sa Diyus nakapahari sa kay manga buwat.

¹¹ Hangadun nita, manga patar-ari ti makaslud makasamit sa kaariwayahan sa kay arani Diyus. Danga kita maglaban, barang kita hanggan unman diman makasamit sa kaariwayahan ga nangyari sa kanda kaybi.

¹² Dahil buhi gid ngani ti Bagaw Diyus ag mamaski, matarum man sa una hintay pag baladaw baliw-baliw may urup. Ti Bagaw Diyus magtuduk magpisang sa karadwa ag sa tagipusuun tawu, hanggan sa kal-asan ag sa utuk. Pag-ipakilala waydi Bagaw Diyus ti daut ti mayad sa kagustuhan hanggan pag-iisip tawu sa kay tagipusuun.

¹³ Unman may milihim sa Diyus. Ti tanan nabulwat ag niburayhaw sa kay magbantay, ag sa kanya kita may saragtun.

Si Hisus ti Pangulu Manughandug sa Balay Diyus

¹⁴ Pagpakarig-un kita sa kanta pagsarig. Dahil kita may pangulu manughandug sa Balay Diyus sinmulud sa langit atag sa atubangan Diyus, si Hisus yi ngani, ti Anak Diyus.

¹⁵ Kanta pangulu manughandug sa Balay Diyus makapasunaid di gid sa kanta kalumuyan. Dahil sinubukan siya sa tanan paraan parihu diman ga kanta, dapat unman gid siya nagkasala.

¹⁶ Pagpakarani kita sa Diyus sa may puun pakaun kaayadan, pagmatutum kanta naisipan, hampay kita pagkaawaan niya ag hampay nu katpung kita may kailangan sa kanya, kita awatan diman angay sa kay pangaawa.