Hibriyu 3 - Hanunuu

Si Hisus Mayad man sa kan Muysis

¹ Manga patar-ari niku, kamu manga ipinablag Diyus hampay kamu kay tanggapun niya. Parihu kita pinili Diyus hampay mabuhi aban sa langit. Nakan ngani isipa niyu si Hisus. Siya ti sinugu gid Diyus. Siya diman ti pangulu manughandug nita pagsarig.

² Matinupadun siya sa Diyus sa nagpili sa kanya sa inda pag buruwatun, parihu ga kan Muysis matinupadun diman sa tanan niya buruwatun tungkul sa kay magtal-anakan Diyus.

³ Dapat pinakan-an Diyus karampatan si Hisus balaw lang ga kan Muysis, dahil nu pagdayawun ti balay, lalu waya pagdayawun ti nagpatindug balay.

⁴ Dahil sa kada balay may nagpatindug. Dapat Diyus ti naglalang sa tanan manga bagay.

⁵ Masarigan ngani si Muysis sa tanan niya buruwatun sa magtal-anakan Diyus dahil siya suruguun Diyus, hampay ipasandam niya ti manga katutuuhanan kay ipaburayhaw Diyus aban.

⁶ Si Kiristu waydi masarigan dahil siya ngani ti Anak. Siya ngap tigpangulu sa kay magtal-anakan Diyus. Kita yi ngani ti magtal-anakan Diyus nu kanta pagpahalgaan kanta pagsarig hanggan sa katapusan.

May Kaariwayahan ti Nasyun Diyus

⁷ Parihu ngani sa sinabi Ispiritu Banal magkun, “Taynguna nu madnugan niyu kay magbagaw,

⁸ danga pagpaganita niyu kanyu manga tagipusuun, parihu sa binwat niyu manga ginurang. Danga ga kaybi pagka kanda linabanan aku sa udas pagsubuk ati sa pangawakawaan tawu.

⁹ Ati sinubukan aku niyu manga ginurang. Sinulay nida aku sa sulud upatpulu ka timpu madi nakitan nida kang manga buwat.

¹⁰ Nakan ngani nagalit aku sa ati pag manga sinulput tawu. Sinabi niku magkun, pirmi gid magsimray kanda manga tagipusuun. Unman natandaan nida kang manga dalan.

¹¹ Nakan ngani sa kang pangagalit sinaadan niku sida magkun, dayu gid sida makaslud sa kang ihinanda pag daga, sa may kaariwayahan.”

¹² Pagdahan kamu, manga patar-ari, barang una si unu sa kanyu may daut naisipan imaw ti magpalumuy sa kanyu pagsarig hanggan di sa magpablag yi ngap sa Diyus buhi.

¹³ Kailangan kamu magpararig-unan sirang-sirang hanggan may udas waya masabi taynguna. Barang una si unu sa kanyu dayaun di kasalanan ag gumanit kay tagipusuun laban sa Diyus.

¹⁴ Kita kaibahan yi ni Kiristu nu marig-un kita pag magsarig ginan sa umpisa ag nu unman kita bumul-iw hanggan tugka sa katapusan.

¹⁵ Una kainda magkun ti Kasuratan, “Taynguna, nu madnugan niyu kay magbagaw, danga pagpaganita niyu kanyu manga tagipusuun parihu sa binwat niyu manga ginurang. Danga ga kaybi pagka kanyu linabanan aku.”

¹⁶ Dahil hintay pag manga tawu ti naglaban sa Panginuun madi nadnugan nida kay magbagaw? Tunda yi ngani kabay pag manga tawu ti nagkuyug sa kan Muysis ginan sa Ihiptu.

¹⁷ Ag hintay pag manga tawu ti kinagalitan Diyus sa sulud upatpulu ka timpu? Tunda yi ngani pag manga nagkasala, nakan sida nagkaramatay sa pangawakawaan.

¹⁸ Ag hintay pag manga tawu kay sinaadan magkun, “Dayu gid sida makaslud sa kang ihinanda pag daga, sa may kaariwayahan.” Tunda yi ngani pag manga tawu ti balaw nagsunud.

¹⁹ Nakan alam nita sida unman nakahimu nakaslud sa daga ihinanda Diyus dahil unman sida nagsarig.