Hibriyu 2 - Hanunuu

Ti Mahalaga pag Karibrihan

¹ Nakan kailangan intindihun gid nita ti manga bagay kanta nadnugan, hampay balaw kita tumalang sa katutuuhanan.

² Dahil mahigpit pag Kasuguan ti ipinadakit manga anghil sa manga tawu. Ti kada naglapastangan ag naglaban nakatanggap tama pag parusa bayad sa kay kasalanan.

³ Kabitay kita dayu parusahan gid nu unman intindihun nita ti barita tungkul sa inda pag mahalaga pag karibrihan. Pagka sa kabag-u, Panginuun gid ti nagpaalam bag-u ti manga nakadnug sa kanya nagtultul maan sa kanta, pinatutuuhanan nida ti karibrihan.

⁴ Ipinakakit diman waydi Diyus bilang puruyba ti manga makadululaw ag lilingutan pag manga tanda ag ti tuhay-tuhay pag mamaski buwat hanggan ti may manga pakaun Ispiritu Banal kay ihinuray sa iglisya angay sa kay sadili kagustuhan.

Si Hisus ti Manuggiya tabug sa Karibrihan

⁵ Ti bag-u aban pag daga ti kanmi ipagbarita, unman diman ipinabahala Diyus sa manga anghil.

⁶ Imaw diman ti sinabi usa ka tawu sa Banal Kasuratan magkun, “Hayga duy, Panginuun, kanmu pag-alalahanun ti tawu? Hintay pag kaayadan kanmu nakitan sa kanya? Hintay nguna pag kaayadan kanmu nakitan sa linahi tawu, nakan kanmu pagpahalgaan?

⁷ Sa dag-ud pag udas, binwat nimu mas ababa man sa manga anghil. Dapat pag-ipadayaw nimu siya bilang hari,

⁸ ipinasakup nimu ti tanan manga bagay sa kay kamaskihan.” Ipinasakup Diyus sa tawu ti tanan manga bagay, kay ibug sabihun unman siya may sinawadan. Ipinasakup gid niya ti tanan-tanan sa tawu. Dapat taynguna unman waya mag-akitan nita ti tanan manga bagay apinasakup sa tawu.

⁹ Dapat ay mag-akitan nita si Hisus, ti binwat Diyus ababa man sa manga anghil ngalay-ngalay lang. Taynguna bay pinakan-an siya karampatan sa maghari may kadayawan hanggan kagalangan, dahil nakalakaw siya kamatayan. Sa kay lubus pangaawa Diyus, nakan namatay si Hisus para sa kada tawu.

¹⁰ Linalang Diyus ti tanan bagay angay sa kay gayak niya kagustuhan. Nakan ngani ipinalakaw niya si Hisus sa kakurian kay inagwanta hampay lubus tupadun niya ti kagustuhan Diyus, ag hampay mayamu tawu kay mataban sa kadayawan.

¹¹ Dahil si Hisus tiglumpiyu sa manga tawu kasalanan ag ti manga tawu kay paglumpiyuhun, usa-usa di kanda Ama. Nakan unman diman ikakay-a ni Hisus nu pag-ingarnan niya sida kay manga patar-ari.

¹² Magkun siya sa Diyus, “Itultul niku kanmu ngaran sa kang manga patar-ari, pagka sa kanda tiripun kawu kang pagdayawun.”

¹³ Inda waya kay sinabi magkun, “Ilubus niku kang sarig sa Diyus.” Bag-u inda waya gid magkun, “Inda yi aku hanggan ti manga anak kay ipinakaun Diyus sa kangku.”

¹⁴ Tawu ngani tunda kay pagkumnun manga anak, nakan si Hisus nabilug diman tawu may nayi may dugu ga kanda diman may nayi may dugu. Nakan katida kay binwat, hampay sa kay pagkamatay mamapas siya sa diyablu, sa may kapangyarihan sa kamatayan,

¹⁵ ag hampay iribri niya ti tanan manga tawu ga ginapus nida magkadala sa kamatayan hanggan buhi waya sida.

¹⁶ Dahil kay turunu ni Hisus sa kay sitay tag balaw hampay antabayanan niya ti manga anghil nu unman hampay ngap kay antabayanan ti manga linahi ni Abraham.

¹⁷ Nakan ngani kailangan siya parihu diman waydi sa kay manga patar-ari sa tanan manga bagay hampay siya usa ka pangulu manughandug sa Balay Diyus maawaun ag matinupadun sa kay magsirbi sa Diyus, hampay mapatawad Diyus ti kasalanan manga tawu.

¹⁸ Sinubukan gid siya sa kay nalakawan kakurian. Nakan madunung siya makaawat sa manga tawu maglakaw subuk.