Hibriyu 13 - Hanunuu

Pag-angay sa Kagustuhan Diyus Kanta Magsirbi

¹ Kamu magtar-arian sa kan Kiristu, danga apasan niyu kanyu magmalahalan sa usa kag sa usa.

² Danga duy pag-irangi niyu kanyu manga balay sa manga tawu taga iba daga. Tanggapun di niyu, imaw diman ti binwat manga iba. May tinanggap sida manga tawu sa kanda balay unman nida alam kuntay manga anghil maaw.

³ Pagpadamay kamu sa manga napirisu ga kamu diman napirisu kaibahan nida. Pagpasunaid kamu sa kanyu sadili bilug tungkul sa manga pag-unuunuhun.

⁴ Kailangan galangun tanan tawu ti pag asawa. Kailangan magtupad ti mag-asawa sa usa kag sa usa. Dahil ti manga mahalay hanggan ti magpanguragin pasay sintinsiyahan Diyus.

⁵ Danga kamu mag-ugali maraibgun sa kuwarta. Pagmasulung yi lang kanyu naisipan sa kanyu kahamtangan. Dahil Diyus diman ti may sabi magkun, “Una sa hintay ngarana balaw pakurangan niku kawu, una sa hintay ngarana unman gid pabay-anan niku kawu.”

⁶ Nakan ngani matutum kanta naisipan magsabi magkun, “Ti Panginuun kang kaawat, unman aku magkadala. Hintay ti mabuwat tawu sa kangku?”

⁷ Isipun niyu ti nangatungkulan sa kanyu kaybi, sida ti nagpaliwanag kay Bagaw Diyus sa kanyu. Isip-isipun niyu nu kabitay kanda nangugali sitay sa babaw daga hanggan kanda ikinamatay. Huwada niyu kanda pagsarig sa Diyus.

⁸ Nu kabitay si Kiristu Hisus kaaldaw, hanggan taynguna, balaw mauman siya hanggan waya aban.

⁹ Danga ngani kamu magpadara sa manga tuhay-tuhay pag manga adal tawu nu balaw angay sa kanta pagsarig sa kan Kiristu. Mayad ngani nu parig-unun nita kanta naisipan sa karibrihan kay pag-ipakaun Diyus sa kay mayad nabubut-un kaysa kanta pagtupad sa manga bilin tungkul sa karan-unun. Ti manga tawu nu magtupad sa tunda pag manga bilin, unman diman nida mapakinabangan tunda.

¹⁰ Kita may tuhay pag surunugan tungkul sa handug sa Diyus. Ag ti manga manughandug magsirbi sa tiripnan unman may karampatan magsaru sa kanta.

¹¹ Ti pangulu manughandug magdara dugu hayup atag sa Pinakabanal pag Sulud-sulud hampay kay pag-isagda sa Diyus tungkul sa kasalanan. Dapat ti manga bilug hayup ati pagsunugun sa luwas kabalayan.

¹² Nakan una si Hisus nag-agwanta namatay sa luwas diman puwirtahan alad batu, hampay paglumpiyuhun ti manga tawu sa kanda manga kasalanan dahil sa kay dugu.

¹³ Nakan pag-ati ngani kita sa kanya, sa luwas kabalayan. Pagtiis kita una surugun ga kanya diman nagtiis.

¹⁴ Dahil sitay sa babaw daga kita unman may pirmaminti ulian dapat paghingabtun nita kanta banwa ulian aban.

¹⁵ Magdayaw kita pirmi sa Diyus bilang kanta handug sa kanya. Mabuwat nita inda sa pagpahayag kuntay kilala nita si Hisus.

¹⁶ Danga nita pagkalimti ti pagbuwat mayad hanggan ti pag-awat sa iba, dahil inda pag handug ti pagbayaun Diyus.

¹⁷ Pagsunud kamu ag pagpasakup sa kanyu manga manug-asiwa iglisya, dahil sida ti may panagutan sa atubangan Diyus tungkul sa kanyu. Mag-alaga sida sa kanyu, dahil sida may panagutan sa atubangan Diyus tungkul sa kanyu. Nu kanyu sundun sida, masulung sida sa kanda magtupad sa buruwatun. Dapat nu unman, manruku sida ag balaw inda ikamayad niyu.

¹⁸ Daranginan niyu kami, dahil tutuu kami unman may pag-isipun daut sa kanmi tagipusuun una sa kanmi naisipan. Gustu lang nimi pagmarinu kanmi ugali sa tanan nimi buruwatun.

¹⁹ Lalu gid aku magpaawat duy sa kanyu sa darangin, hampay udyi dumugay aku makauli maan sa kanyu.

Usa ka Darangin

²⁰ Diyus ti gimpuunan kahusayan. Binuhi niya uman kanta Panginuun Hisus. Nakan si Hisus ti makamaskihan pag manug-alaga sa manga karanidu. Dahil sa kanya pag dugu pag itinalaghut ti unman may katapusan pag taratu.

²¹ Mana ipakaun niya sa kanyu ti tanan niyu kailangan agud matupad niyu kay kagustuhan. Mana buwatun ni Hisu-Kiristu sa kanta ti angay sa atubangan Diyus. Sa kan Hisus ti kadayawan hanggan aban. Amin.

Katapusan Surat

²² Daka kang gustu, kamu manga patar-ari, pag-agwanta sa kang manga iinadal. Dahil kamu kang sinuratan balaw sa mayamu pag hampang.

²³ Kang pag-ibarita sa kanyu si Timutiyu balaw yi ati sa pirisuhan. Nu muli siya madali, kumuyug aku sa kanya asan tag.

²⁴ Ipadakit waydi niyu kang kamusta sa manga may katungkulan sa kanyu hanggan sa tanan patar-ari. Pagkamustahun diman kamu nita manga patar-ari taga Italya.

²⁵ Pagsa kanyu tanan ti papalad Diyus.