Hibriyu 12 - Hanunuu

Ti Pariga Panginuun

¹ Naglibut sa kanta ti aduk pag tawu manga maghiling. Nakan pagtayaki yi nita tunda pag manga buwat mag-ampara sa kanta pagsunud lalu hanggan una hintay pag kasalanan magsambur. Pangungud yi kita sa kanta maglakaw sa dalan inalistu Panginuun.

² Bantayan nita kanta manuggiya si Hisus. Siya diman ti turunu nita sarig. Dahil kabayaan kay patabgan, nakan inagwanta yi lang niya madi ipinurya siya sa kay pagkamatay sa kurus. Bag-u tinmukaw siya ati sa langit baliwa sa sikun Diyus, minsan sa karampatan Diyus.

³ Isip-isipa niyu si Hisus nu kabitay unman sinmuku siya una linabanan siya manga tawu makasalanan. Nakan danga kamu maglubay sa kanyu naisipan, danga waydi magsuku.

⁴ Sa kanyu maglaban sa kasalanan, udwaya nabuhus kanyu dugu sa kamatayan.

⁵ Nalimtan aw niyu ti itinudlu Diyus sa kanyu sa kay manga anak? Tunda pag manga bagaw ngani tigpabisug sa kanyu naisipan magkun, “Anak niku, danga nimu bul-an halaga ti pariga Panginuun. Danga maglubay kanmu naisipan nu kawu pagtamyawun niya.

⁶ Dahil ti manga pagmahalun Panginuun imaw lang kay pagparig-anan. Pagbakulun diman niya ti kada anak kay tinanggap.”

⁷ Pagmatiniisun kamu nu pagparig-anan Diyus, dahil imaw yi ngani ti puruyba sa kanyu kuntay kamu kay tinanggap kay yi gid manga anak. Hintay nguna pag anak ti unman pinarig-anan niya ama?

⁸ Nu bay kamu unman pagparig-anan Diyus, kay ibug sabihun balaw kamu tutuu manga anak niya, tuhay di kanyu ama, dahil basta anak niya kay pagparig-anan.

⁹ Nu kas-a ginan nu angay sa ugali tawu kita pagparig-anan diman nita manga ama nakan kailangan lalu galangun nita sida. Unman aw lalu waya kita pumasakup sa kanta Ama, sa Diyus hampay kita may buhi?

¹⁰ Sulud usa ka ngalay-ngalay kita pagparig-anan nita manga ama angay sa kanda mayad pag naisipan. Dapat kay pariga Diyus makinabangan nita hampay may kahuray kita sa kay kabanalan.

¹¹ Sa katpung kita pagparig-anan balaw masulung nu unman ikaruku ngap. Dapat pagka lawuy kay magpariga kay burak mayad pag kahusayan hanggan katadlungan sa manga mag-ugali sa kaayadan.

Manga Paanyu hanggan Paalaala

¹² Pabisuga niyu kanyu kamang malumuy hanggan kanyu matudturay tuud.

¹³ “Pagbuwat kamu matadlung pag dalan kanyu lakawan,” hampay dayu madayaan ti manga pilay, nu unman lalu ngap mahulian di gid sida.

¹⁴ Tupadun niyu ti kahusayan sa tanan tawu ag pag-ugali kamu sa unman may kasalanan. Ti tawu nu unman mag-ugali sa lubus marapasakup sa Diyus dayu siya kumakit sa Panginuun.

¹⁵ Pagdahan kamu hampay unman may pumatlikud sa kanyu tanan sa kay pakaun Diyus karibrihan. Barang may magtubu ga ilamnun mapait sa kanyu bag-u miabay ti mayamu ngap pag patar-ari sumimray sa katutuuhanan.

¹⁶ Pagdahan kamu hampay unman may mag-uragin sa kanyu ag hampay unman may tawu asan ga kan Isaw. Unman pinahalgaan niya ti kaayadan Panginuun. Ibinalyu kabay niya kay karampatan bilang panganay sa usa ka pinggan karan-unun.

¹⁷ Dahil alam niyu, pagka dugay kay gustu gid ni Isaw papaladan gid mana siya niya ama angay sa kay pagkapanganay, dapat binugyahan siya. Madi nanlumi siya ag daka kay gustu bawiun waya mana niya kay karampatan bilang panganay, udyi gid nabawi.

¹⁸ Balaw kamu ga manga Israilita kaybi sa kanda nagpakarani sa Bantud Sinai. Nakitan gid nida ati ti apuy maglabdab sa pingit pag kadudulman, nadnugan nida kay hagunung untug.

¹⁹ Nakadnug sida kay tunug budyung, hanggan kay magbagaw Diyus. Pagka nadnugan nida kay manga sinabi nanuyu sida danga yi mana siya magbagaw sa kanda.

²⁰ Unman maagwanta nida kay sugu magkun, “Una tawu una hayup nu makatata sa bantud kailangan bintukun niyu matyun.”

²¹ Tutuu madala gid masyadu kanda binantayan ati. Si Muysis hanggan magkun, “Pagtakigan gid aku sa dala.”

²² Dapat ay kamu nagpakarani sa bantud Siun ag sa banwa Diyus buhi, imaw ti Hirusalim sa langit, sa may udyi mabilang pag kadamlan manga anghil. Magpakiusa yi kamu sa masulung pag katipunan,

²³ hanggan sa iglisya manga anak panganay Diyus. Kanda manga ngaran inilista ati sa langit. Nagpakarani kamu sa Diyus, imaw ti pumihu aban kay daut kay mayad tanan-tanan tawu hanggan manga anghil. Nagpausa kamu sa manga tawu matadlung, sa manga udyi may kakurangan una di.

²⁴ Ag kamu nagpakarani sa kan Hisus. Sa kanya pag itinalaghut ti bag-u taratu. Kay dugu ni Hisus ti magtudlu sa kanta mayad man pag manga katutuuhanan, balaw lang ga kay dugu ni Abil.

²⁵ Nakan pagpatingi kamu kaayad-ayad sa kan Hisus magbagaw sa kanyu. Ti manga tawu kaybi unman nakaiwas sa kaparusahan nu sida nagbugya mamatingi sa kan Muysis namadakit sa kanda sitay sa babaw daga sa kay manga pagsabihun Diyus. Mas lalu kita dayu makaribri nu patlikudan nita ti magbagaw ginan sa langit.

²⁶ Pagka kaybi nagbagaw ti Diyus, natandug ti daga. Dapat taynguna nangaku siya magkun, “Kas-a waya tandugun niku balaw lang ti daga hanggan ti langit.”

²⁷ Pagka kay sinabi magkun, “kas-a waya,” kay ibug sabihun ti manga natandug pag manga linalang Diyus bul-un yi niya aban. Ti unman matandug balaw ngap duraun.

²⁸ Nakan pagpasalamat gid kita dahil dayu gid matandug ti kaharian kanta tinanggap sa Diyus. Pagsamba kita sa Diyus, pagdahan kita paggalang hampay pagbayaun niya kita.

²⁹ Dahil kanta Diyus ga apuy maghirut.