Hibriyu 11 - Hanunuu

Ti Pagsarig sa Diyus

¹ Nu may pagsarig kita, maniwala diman kita pihu gid mangyari aban ti kanta pag-alagdun, ag may puruyba kita sa kanta tagipusuun tungkul sa katutuuhanan manga bagay una unman mag-akitan.

² Kaybi pag manga ginurang pagbayaun Diyus dahil sa kanda pagsarig.

³ Dahil sa kanta pagsarig sa Diyus nakan naintindihan nita ti kalibutan namhan dahil sa kay Bagaw Diyus. Ti manga mag-akitan nita, binwat Diyus ginan sa unman may mag-akitan sa mata.

⁴ Dahil sa kay pagsarig ni Abil, nakan mayad man kay ihinandug sa Diyus balaw lang ngap ga kan Kain pag ihinandug. Dahil diman sa kan Abil pagsarig nakan binaya Diyus kay ihinandug sa kanya ag kinilala Diyus si Abil kuntay siya matadlung. Dahil una taynguna tigbak yi si Abil, nagmustara waya siya sa kanta dahil sa kay pagsarig.

⁵ Dahil sa kay pagsarig ni Inuk, bin-ul siya hampay dayu niya malakawan ti kamatayan. Unman yi siya nakitan, dahil siya bin-ul yi Diyus. Alam nita inda ti nangyari sa kanya dahil sa kay pagsarig. Dahil lubus pagbayaun Diyus si Inuk bag-u siya bin-ul.

⁶ Nu unman may sarig ti tawu, dayu mahimu siya lubus pagbayaun Diyus. Dahil nu ti tawu magpakarani sa Diyus kailangan siya magsarig kuntay may Diyus ag unman siya magpabaya sa manga maghanap sa kanya.

⁷ Dahil sa kay pagsarig ni Nuwi, nakan naniwala siya sa kay ipinasandam Diyus tungkul sa manga bagay udwaya mag-akitan. Nag-alistu si Nuwi usa ka sakayan hampay makaribri kay buu magtal-anakan. Dahil sa kay sarig ipinurya ni Nuwi ti manga taga kalibutan, ag kinilala Diyus siya matadlung dahil sa kay sarig.

⁸ Dahil sa kay pagsarig naniwala si Abraham, pagka siya tinawag. Diyus hampay atabug sa usa ka rugar imaw kay tanggapun aban pag maranahun. Linmakaw si Abraham madi unman niya alam nu naan tag.

⁹ Dahil diman sa kay pagsarig nagpakapahalin-halin lang siya kay turda, bilang nangus ga balaw kanya pag daga madi imaw kay itinaratu Diyus sa kanya. Katida diman waydi sida ni Isaak ni Hakub, dahil minsan kanda maranahun pag taratu.

¹⁰ Dahil pagpatigagadun ngap ni Abraham ti Banwa marig-un kay burungsudan, kay gayak Diyus kay ipakana.

¹¹ Dahil sa kay pagsarig ni Abraham, nakatanggap siya kabisugan hampay magpabuduy sa kan Sara madi lipas yi kay idad ni Abraham, ag unman mag-anak si Sara. Sinarigan niya lubus ti Diyus ti nangaku ag ti dayu pumalya.

¹² Nakan madi malumuy yi gid si Abraham pag lalaki, may linahi di parihu sa pamgasan sa langit kay kayamu ag unman mabilang ga baras sa dagat.

¹³ Sida tanan ti manga sinmarig tugka sa kamatayan, unman nakamtan nida ti itinaratu, dapat bilang ga kanda di nabantay ginan sa arayu, sida nakabaya di. Naisipan nida sida pasay manga nanday-u lang, ag balaw may kapunduhan sitay sa babaw daga.

¹⁴ Nu katunda ti pagbuwatun manga tawu, pag-ipakilala nida sida maghingabut sa kanda sadili gid pag banwa.

¹⁵ Ag tutuu nu abi kanda naala-ala ati pag daga kanda inighitan, may imaw mana sida rugar hampay bumalik atag.

¹⁶ Dapat taynguna paghingabtun nida ti lalu mayad pag ulian, kay ibug sabihun sa langit yi ngap pag ulian. Nakan ti Diyus unman mangay-a una pag-ingarnan nida siya kanda Diyus, dahil kay inalistuhan sida usa ka banwa.

¹⁷ Si Abraham ti pinangakuan Diyus. Sinubukan siya Diyus, dapat dahil sa kay pagsarig, alistu siya hampay matyun niya ipakaun sa Diyus kay anak madi usa-usa, kay ngaran si Isaak.

¹⁸ Sinabi diman Diyus sa kan Abraham magkun, “Ginan sa kan Isaak pag linahi ti pinangakuan Diyus.”

¹⁹ Kay isip ni Abraham una mamatay si Isaak mahimu buhiun siya uman Diyus. Nakan tinanggap maan ni Abraham kay anak bilang ga ginan yi sa kamatayan.

²⁰ Dahil sa kay pagsarig ni Isaak, pinapaladan niya sida ni Hakub ni Isaw sa Diyus hampay papaladan sida sa kanda patabgan.

²¹ Dahil sa kay pagsarig ni Hakub, pagka atabug yi magkamatay, pinapaladan niya kay duwa ka anak ni Husi sa Diyus hampay papaladan, nagsamba siya sa Diyus mahiyaptan sa kay pudpud sugkud.

²² Dahil sa kay pagsarig ni Husi, pagka arani yi siya mamatay, kay ipinaalam niya ti pag-ighit manga linahi ni Israil aban ginan sa Ihiptu. Nagbilin siya sa kanda tungkul sa kay manga but-ul magkun, “Daran-a di niyu nu kamu mighit yi.”

²³ Dahil kay manga gurang ni Muysis nagsarig sa Diyus nakan pagka may anak sida kanda itinagu sa sulud tulu ka bulan, dahil sa kanda magbantay marinu pag anak, ag unman sida nadala sa sugu hari.

²⁴ Dahil sa kay pagsarig ni Muysis, pagka daka yi siya, unman siya nagpasnu kuntay kan Paraun anak babayi kay ina.

²⁵ Pinahalgaan di ngap niya ti magpausa sa nasyun Diyus madi pag-unuunuhun. Dinayu di niya ti magkupas pag kasayahan tungkul sa kasalanan.

²⁶ Kay isip ni Muysis daka man pag kayamanan nu pag-unuunuhun siya dahil sa kay Pinili Diyus Manugribri pag Hari, balaw di ga manga kayamanan sa Ihiptu, dahil paghingabtun niya kay patabgan pag pirimyu.

²⁷ Dahil sa kay pagsarig, nighit si Muysis ginan sa Ihiptu ag unman siya nadala sa kay pangagalit hari. Balaw siya mag-urung sa kay sarig, nakan bilang ga mag-akitan niya ti Diyus, langmadi unman mag-akitan sa mata.

²⁸ Dahil sa kay pagsarig, itinudlu ni Muysis ti Pag-alaala sa Karibrihan ag nagbilin siya sa manga tawu magkun, wisikan nida dugu ti bakalan hampay lumawuy di ti manugpapas sa manga panganay manga taga Israil agud sida dayu mapapas niya.

²⁹ Dahil sa kanda pagsarig, nagdipay ti manga Israilita sa Dagat Marara parihu sa mamara pag daga. Pagka sinubukan binwat inda manga taga Ihiptu ay pasay nalimus sida.

³⁰ Dahil sa kanda pagsarig, linibut manga taga Israil ti banwa Hiriku sa sulud pitu ka sirang, bag-u nangatumpag ti manga alad batu.

³¹ Dahil si Rahab pag babayi uragin may pagsarig sa Diyus, pinasaka niya mayad ti manga manugtiid, nakan unman siya nidamhak minsan sa manga unman magpasakup sa Diyus.

³² Kabitay waya pag masabi niku, dahil udyi aku may rugar tumultul waya tungkul sa kan Gidyun, sa kan Barak, sa kan Samsun, sa kan Hipti, ag sa kan Dabid, sa kan Samwil hanggan sa manga purupita.

³³ Dahil sa kanda pagsarig nanalu sida sa manga kaharian, namwat sida katadlungan, ti itinaratu Panginuun nipakaun yi sa kanda, nagpahirum sida manga bibig liyun, nagpusa di sida sa labdaban apuy.

³⁴ Madi sida libunun mana baladaw nakaribri di. Madi naglumuy sida pinabisug maan hampay maglaban sa gira ag hampay pumaurung sa manga gurupu sundalu taga iba daga.

³⁵ Dahil sa kanda pagsarig manga babayi nakan kanda maan tinanggap kanda manga kasunu balay madi namatay, dapat nabuhi maan. Ti iba namatay sa pakuri manga tawu, balaw may gustu sida kaariwayahan hampay lalu mayad kanda matanggap sa ikadwa pag kinabuhi.

³⁶ Inagwanta manga iba ti libak, ti hampak, hanggan ti tarikada sa kanda pagkapirisu.

³⁷ Sida binatu, rinagari ag minatay baladaw. Sida nagpakapalibut-libut kanda rutay paknul manga karanidu hanggan kambing, sida manga pugri, inunu-unu ag nakurian.

³⁸ Sida nagpakapalibut-libut lang sa pangawakawaan, sa manga kabantudan, sa manga lukib hanggan sa lingkaung daga. Balaw angay kanda ulianan inda pag kalibutan dahil sa kanda katadlungan.

³⁹ Sida tanan pagbayaun Diyus dahil mayad kanda magsarig dapat unman nida natanggap ti itinaratu Diyus.

⁴⁰ Inalistu Diyus ti lalu mayad pag bagay para sa kanta, nakan unman waya kinamhan Diyus kay turunu sa kanda hanggan sa udwaya miusa kita sa kanda.