Hibriyu 10 - Hanunuu

¹ Ti Kasuguan ga aninu lang tungkul sa manga kaayadan aban ag unman mag-akitan nita malinaw nu kabitay aban ti tutuu. Nu angay sa Kasuguan una pag-isagda tawu timpu-timpu kay hayup sa Diyus kay pagmatyun, unman diman waydi lubus mab-ul kay kasalanan.

² Dahil nu may kamhanan abi, unman aw nguna apasan mana kanda maghandug hayup? Dahil nu tutuu gid linumpiyu ti manga manugsamba udyi mana sida may magkaisipan waya kasalanan sa kanda tagipusuun.

³ Dapat ay tunda pag manga hayup kanda pag-isagda pagmatyun sa Diyus timpu-timpu imaw ngap tigpaalaala sa kanda manga kasalanan.

⁴ Dahil ti dugu manga tudu baka manga kambing dayu gid makab-ul sa kasalanan manga tawu.

⁵ Nakan pagka nagsitay si Kiristu sa kalibutan, magkun siya sa Diyus, “Unman gid gustu nimu ti manga hayup pagmatyun dahil sa kasalanan, hanggan ti manga hayup pagmatyun pag-isagda sa kanmu. Nakan ihinanda nimu kang bilug.

⁶ Unman kawu magbaya sa manga hayup pagsunugun pag-isagda sa kanmu, una sa manga hayup pagmatyun tungkul sa kasalanan manga tawu.

⁷ Bag-u sinabi niku, ‘Diyus, nagsitay yi aku hampay tupadun niku kanmu kagustuhan, angay sa isinurat sa ribru Kasuguan tungkul sa kangku.’ ”

⁸ Kabag-u kay sinabi, “Ti manga hayup pagmatyun pag-isagda sa kanmu, tuhay ti pagsunugun, ti iba tungkul sa kasalanan, dapat unman pagkaibgan nimu, unman diman waydi pagbayaun nimu.” Dapat tunda pag manga bagay nakan pag-isagda sa Diyus angay lang sa Kasuguan.

⁹ Bag-u kay sinabi ni Hisus, “Nagsitay aku hampay tupadun niku kanmu kagustuhan.” Udyi tinanggap Diyus ti manga hayup pagmatyun pag-isagda sa kanya. Lalu ngap lubus pagpahalgaan niya kan Kiristu pakaun kay sadili bilug hampay mamatay.

¹⁰ Tinupad ni Hisu-Kiristu kay kagustuhan Diyus. Pagka ipinakaun niya kas-a lang kay sadili bilug sa Diyus, linumpiyu niya kita sa kasalanan.

¹¹ Tutuu ti kada manughandug sa Balay Diyus sirang-sirang mag-asikasu kanda maghandug hayup pagmatyun paulit-ulit, kanda magpakaun manga kaluub, madi unman diman makalumpiyu tunda sa kasalanan manga tawu.

¹² Dapat si Kiristu kas-a lang nagpakaun kay pakaun sa Diyus hampay mapatawad ti kasalanan manga tawu hanggan waya aban. Bag-u tinmukaw siya sa langit baliwa sa sikun Diyus.

¹³ Siyun ginan mag-alagad siya hanggan sa udwaya kay kalaban binwat ga tarat-an niya manga lulud.

¹⁴ Usa lang ka bisis ihinandug kay sadili sa Diyus, ag inda ti naglumpiyu sa manga binwat banal tugka aban.

¹⁵ Pagpatutuuhanan diman Ispiritu Banal tunda para sa kanta, dahil sinabi niya magkun,

¹⁶ “Magkun ti Panginuun, ‘Pagkatapus ati buwatun niku inda pag taratu sa kanda, ipauli niku kang manga Kasuguan sa kanda manga tagipusuun ag isurat sa kanda manga naisipan.’ ”

¹⁷ Bag-u kay sabi magkun, “Kanda manga kasalanan ag kadautan balaw yi alalahanun niku.”

¹⁸ Nu pinatawad yi tunda udyi kailangan maghandug waya kita hayup sa Diyus, hampay patawadun ti manga kasalanan.

Pagpakarani Kita sa Diyus

¹⁹ Nakan ngani manga patar-ari, unman yi gid may ampara sa kanta magsaka sa Banal pag Sulud-sulud, dahil sa kay dugu ni Hisus.

²⁰ Binukasan niya para sa kanta ti bag-u pag dalan tabug sa kabuhian lakaw sa limbun rutay Balay Diyus, kay kahulugan pag limbun kay ngap bilug ni Kiristu.

²¹ Taynguna kita may makamaskihan pag manughandug magpamahala sa kabuuhan magtal-anakan Diyus.

²² Nakan ngani pagpakarani kita sa Diyus may buu pag kagustuhan hanggan marig-un pag sarig sa kanya. Danga yi may mag-asaydan daut kanta naisipan, dahil ngani linumpiyu yi kanta tagipusuun sa manga buwat unman may kabuluhan, ag inugasan kanta manga bilug sa malinis pag danum.

²³ Pagpakarig-un kita sa kanta inaku pag sarig, danga kita mag-alinlangan. Dahil Diyus ti may taratu ag lubus siya masarigan dayu pumudil.

²⁴ Isipun nita nu kabitay pag mipulaw ti maimbung pagmahal sa usa kag sa usa, hanggan ti pagbuwat mayad.

²⁵ Danga kalimtan nita pagluwang di kita sa kanta pagtiripun. Danga maghuwad sa manga magpalya. Pagparabisugan ngap kita ti kada usa. Lalu ngap taynguna dahil magkaalaman yi nita arani yi ti kaudasan pagras-ug Panginuun.

²⁶ Nu abi kita tikis yi lang magpadayun sa kasalanan madi nakilala yi nita ti katutuuhanan, udyi may iba waya pag ihandug sa Diyus sa ikapatawad nita kasalanan.

²⁷ Udyi may iba paraan nu unman mag-alagad lang kita sa madala gid pag patabgan pag sintinsiya aban, bag-u kay pangagalit Diyus tigpapas ga apuy sa manga kalaban niya.

²⁸ Ti tawu nu naglabag sa Kasuguan ni Muysis udyi pagkaawaan. Nu may duwa una tulu ka kastigus magpatutuu laban sa kanya pihu siya matyun.

²⁹ Pag-isip kamu nu kabitay kay kahigpit pag parusa ti isintinsiya sa tawu nu binul-an niya halaga ti Anak Diyus, ag nu kay linapastangan niya ti dugu ti itinalaghut sa taratu madi imaw ti naglumpiyu sa kanya, ag nu dinayu niya ti Ispiritu imaw tigpakaun kaayadan.

³⁰ Nakilala waydi nita ti may sabi magkun, “Bahala aku magganti, aku ti pumarusa.” Siya diman waydi ti may sabi magkun, “Pihuun Panginuun aban ti daut ti mayad sa kay nasakupan.”

³¹ Madala gid ti malagpak tag sa kamang Diyus buhi.

³² Alalahanun niyu ti manga nangyari kaybi pagka kamu linmakaw yi sa karayawan Panginuun. Ati katpung mahigpit pag kakurian kanyu tiniisan dapat unman kamu nagpatalu.

³³ Nu kas-a kamu minuransa, pinakurianan sa atubangan kadamlan tawu, ag nu kas-a ginan nadamay kamu sa kanyu manga kaibahan pinakurianan.

³⁴ Napadamay kamu sa manga napirisu, balaw diman waydi kamu nagruku una binul-an kamu kasiyunan, dahil alam ngani niyu lalu waya higit mahalaga ag udyi madura ti kayamanan ihinanda para sa kanyu.

³⁵ Nakan ngani danga kamu maiwdan sarig sa Diyus dahil may daka pag pirimyu aban.

³⁶ Kailangan kamu pagmatiniisun, hampay matupad niyu ti kagustuhan Diyus, agud matanggap niyu kay itinaratu.

³⁷ Diyus ti may taratu magkun, “Balaw yi gid dugay, bag-u ti pagkumnum sumitay rumas-ug yi ag dayi dumugay.

³⁸ Dapat ti tawu may buhi di, nu pagkilalan-un niku siya matadlung dahil sa kay pagsarig sa kangku. Nu bay siya umurung, udyi pagbayaun niku siya.”

³⁹ Dapat kita balaw ay ga tunda pag manga mag-urung bag-u ipadamhak. Kita ga tunda ngap pag manga magsarig hampay iribri.