Hibriyu 1 - Hanunuu

Nagbagaw ti Diyus sa manga Tawu

¹ Kaybi waya ginan ipinadakit manga purupita ti manga binagaw Diyus sa kanta manga ginurang sa tuhay-tuhay pag udas ag sa tuhay-tuhay pag paraan.

² Pagka kainda arani yi ti katapusan kalibutan, kay Anak ngap ti nagpadakit sa kay manga binagaw Diyus sa kanta. Ti Anak ti pinili pag manugkarubut sa tanan manga bagay, dahil ginan lang sa kanya pag binwat Diyus ti kalibutan.

³ Ti Anak ti duag kadayawan Diyus. Parihu siya sa Diyus sa tanan bagay. Ti Anak diman ti mag-alaga sa tanan bagay sa kamaskihan niya bagaw. Pagka ihinanda niya kay kapatawadan sa manga tawu kasalanan bag-u tinmukaw siya ati sa langit baliwa sa sikun Diyus, minsan sa karampatan Diyus makamaskihan sa tanan.

Ti Anak Mayad man sa manga Anghil

⁴ Lalu gid mayad pag ngaran ti ipinakaun Diyus sa kay Anak, balaw lang ga sa manga anghil, nakan lalu gid mayad siya sa manga anghil.

⁵ Nakan unman gid may anghil sinabihan Diyus una kapira magkun, “Kawu kang Anak, taynguna aku kanmu yi Ama.” Inda waya kay sinabi magkun, “Aku ti Ama tumupad sa kang Anak, kang Anak tumupad waydi sa kangku.”

⁶ Kainda waya kay sinabi Diyus, pagka arani yi suguun niya ti panganay tag sa kalibutan, magkun siya, “Kailangan siya sambahun tanan manga anghil.”

⁷ Sinabi waydi Diyus tungkul sa manga anghil magkun, “Pagbuwatun Diyus kay manga anghil manga durus, kay manga suruguun pagbuwatun niya manga labdab apuy.”

⁸ Dapat nu tungkul sa Anak kay sinabi, “Diyus, kanmu katungkulan sa maghari unman may katapusan hanggan waya aban. Ti kamaskihan sa kanmu maghari imaw ti matadlung pag kamaskihan.

⁹ Minayad nimu ti katadlungan ag kinagalitan nimu ti kadautan, nakan ti Diyus, kanmu ngani Diyus, ti nagpili sa kanmu ag balaw sa kanmu manga kaibahan. Binuhusan kawu lana hampay kawu maghari yi may kabayaan.”

¹⁰ Bag-u inda waya kay sabi sa Bagaw magkun, “Panginuun, sa kabag-u nikana nimu ti daga, hanggan ti langit binwat waydi nimu manga kamang.

¹¹ Ti daga ag ti langit mipadamhak di aban. Dapat kawu unman may katapusan. Sida tanan maluma di parihu sa rutay.

¹² Parihu sa usa ka kulimpay sida kanmu luhutun aban bag-u sida mailsan parihu sa bisti. Dapat kawu balaw mauman, kanmu timpu balaw may katapusan.”

¹³ Unman diman sinabi Diyus sa una hintay sa kay manga anghil magkun, “Pagtukaw kawu sitay baliwa sa kang sikun, pagpaminsan sa kang karampatan sa maghari hanggan sa udwaya mabuwat niku kanmu manga kalaban ga tarat-an lang nimu manga lulud.”

¹⁴ Ti tanan manga anghil manga ispiritu magsirbi sa Diyus, kay manga suruguun hampay mag-alaga sa manga tawu mumana karibrihan.