Hagay 2 - Hanunuu

Ti Karinuan Bag-u pag Balay Diyus

^1-2 Katpung ika-21 pag sirang sa sunud pag bulan, sinugu Panginuun si Purupita Hagay kuntay sabiha inda sa kan Surubabil hanggan sa kan Huswi, ag sa manga iba waya Israilita nakabalik sa Israil:

³ “Sitapu sa kanyu ti nakakit sa kay karinuan inda pag Balay Diyus kaybi? Hintay taynguna kanyu magbantay nu kanyu ipaparihu sa kaybi? Mahimu unman may pulus taynguna sa kanyu magbantay.

⁴ Dapat pag matutum kamu! Iparargu niyu ti pagbuwat sa Balay Diyus dahil kaibahan niyu aku, ti Panginuun Makamaskihan.

⁵ Katunda diman kang itinaratu sa kanyu manga ginurang pagka ipinaluwas niku sida sa Ihiptu. Ag taynguna ginan kaibahan niyu kang Ispiritu. Nakan danga yi kamu magkadala.

⁶ “Aku, ti Panginuun Makamaskihan, ti magsabi udyi dugay kas-a waya maan niku tandugun ti langit hanggan ti kalibutan, ti daga hanggan ti dagat.

⁷ Tandugun niku ti tanan nasyun hampay daran-un nida kanda manga kasiyunan sa kang Balay. Nakan mapnu inda pag Balay niku manga mahalaga pag bagay.

⁸ Dahil ti manga pilak ag gintu kangku di.

⁹ Nakan lalu waya ruminu ti bag-u pag Balay niku kaysa kabag-u. Ipakaun waya niku sa inda pag rugar ti kaariwayahan. Aku, ti Panginuun Makamaskihan, ti magsabi inda.”

Ti Pangaku Diyus pag Papalad

¹⁰ Pagka ika-24 pag sirang sa ikasiyam pag bulan sa ikadwa pag timpu kay maghari ni Daryu, magkun ti Panginuun sa kan Purupita Hagay,

¹¹ “Paingan-a nimu ti manga manughandug nu hintay ti pagsabihun kasuguan tungkul sa inda pag bagay:

¹² ‘Halimbawa, may usa ka tawu may dara banal pag taguban handug masaputan sa kay rutay, ag nisaghid inda sa tinapay, sabakan, intus, lana ulibu, una hintay pag karan-unun, bumaliw aw waydi nguna banal inda?’ Nagsagut ti manga manughandug, ‘Unman duy!’

¹³ Nakan nagpaingana waya si Hagay, ‘Nu abi, ti manga sinampit pag karan-unun nu nasaghidan tawu mauring dahil nakahiyaput siya bangkay, mayagting yi aw waydi nguna tunda pag manga karan-unun?’ Nagsagut ti manga manughandug, ‘Hu!’

¹⁴ Sinabi ni Hagay, ‘Katunda diman kaybi ti nasyun Israil sa atubangan niku, magkun ti Panginuun. Kaybi una hintay kanda pag buwatun ag pag-isagda, mauring gid sa magbantay Panginuun.’

¹⁵ Taynguna ginan, isipa niyu kaayad ti manga nangyari sa kanyu bag-u niyu umpisahan ti pagpatindug Balay Diyus Panginuun.

¹⁶ Dahil kaybi, nu mag-atag kamu sa kanyu tumpuk manga tirigu magsarig kamu makatipun 20 ka takal, dapat kanyu magkab-ul 10 wadi. Nu mag-atag kamu sa kanyu pirigsan ubas magsarig kamu makapigis 50 ka galun, dapat kanyu magkab-ul 20 wadi ka galun.

¹⁷ Dinaut Panginuun kanyu manga pananum sa panab-anan mainit pag durus, sarut, ag pagpauran manga yilu bilang yi manga batu. Dapat udwaya gid kamu magdangup sa kanya.

¹⁸ Ika-24 pag sirang taynguna sa ikasiyam pag bulan, ag taynguna pag sirang pag natapus ti patakinan batu Balay Diyus. Bantayi nu hintay ti mangyari taynguna ginan pag sirang.

¹⁹ Una udyi may nasawad tirigu, ag udyi ti burak manga ubas, igus, pumigranata, hanggan ulibu, dapat taynguna ginan papaladan yi kamu Panginuun.”

Ti Pangaku Diyus sa kan Surubabil

²⁰ Sa tunda diman pag sirang, nagbagaw maan ti Panginuun sa kan Hagay.

²¹ Magkun siya, “Sabihun nimu sa kan Surubabil tandugun niku ti langit hanggan ti kalibutan.

²² Duraun niku ti manga kaharian hanggan kanda kapangyarihan. Magkaragpu kanda manga kalisa hanggan kay manga sakay. Magkaramatay kanda manga kabayu ag manmaratyan kanda manugkabayu.

²³ Sabiha diman nimu sa kan Surubabil sa kang suruguun kuntay sa tunda pag sirang, pamahalaun niku siya sa panab-anan niku kamaskihan dahil siya yi kang pinili. Aku, ti Panginuun Makamaskihan, ti may sabi inda.”