Hagay 1 - Hanunuu

Ti Panawagan Diyus sa Pagpatindug Uman sa Balay Niya

¹ Katpung sa un-an pag sirang sa ikan-um pag bulan, sa ikadwa pag timpu kay maghari ni Daryu sa Pirsiya, may sinabi ti Panginuun sa kanda ni Surubabil ag ni Huswi sa panab-anan ni Purupita Hagay. Si Surubabil kay anak ni Salatyil ti Gubirnadur sa Huda, ag si Huswi kay anak ni Hihusadak ti pangulu manughandug.

^2-3 Kaindaay kay sinabi Panginuun Makamaskihan sa panab-anan ni Purupita Hagay: “Pagsabihun niyu udwaya panahun hampay ipatindug uman kang Balay Diyus.

⁴ Maagwanta aw niyu mangulian kamu sa mararinu pag manga balay dapat daut kang Balay Diyus?

⁵ Isip-isipa niyu ti manga magpangyari sa kanyu.

⁶ Mayamu kanyu ipinamgas, dapat pira-pira kay tubas. May karan-unun kamu, dapat kurang. May irinmun kamu, dapat unman kang-ud. May rutay kamu, dapat pagramigun di kamu. May pagtanggapun kamu upa, dapat madali magkatabu.

⁷ Nakan isip-isipa niyu ti manga magpangyari sa kanyu.

⁸ Taynguna, pagtukad kamu sa bantud bag-u pagramu, ag patindugan maan niyu kang Balay. Sa katunda lang pag paraan aku pag makabaya ag madayaw niyu. Aku, ti Panginuun, ti magsabi inda.”

⁹ Magkun waya gid ti Panginuun Makamaskihan, “Magsarig kamu mauya pag tubas dapat pira-pira wata kanyu naani. Ag dinaut waya niku inda pagka dinara niyu tabug sa kanyu balay. Binwat niku inda dahil kangku pag Balay daut, dapat ti kada usa sa kanyu balaw may pahuyang sa pagbuwat kanyu balay.

¹⁰ Nakan dahil sa kanyu, ti langit unman yi magpakaun tun-ug, ag ti daga unman yi magpakaun tubas.

¹¹ Pinamara niku ti manga katanmanan hanggan ti manga kabantudan. Nakan naapiktuhan ti manga ani, ti irinmun ubas, ti lana ulibu, hanggan ti iba waya pag manga tubas, una ti manga tawu, hanggan kanda manga hayup ag ti tanan nida manga binudlayan.”

¹² Sinunud ngani nida ni Surubabil, ni Huswi, hanggan tanan Israilita nakabalik sa Israil ginan sa pagkabihag sa Babilunya ti sinabi Panginuun nida Diyus sa panab-anan ni Purupita Hagay kay suruguun. Sa panab-anan inda, ipinakakit nida kanda maggalang sa Panginuun.

¹³ Magkun si Hagay imaw ti manugbarita Panginuun sa manga taga Israilita, “Magkun ti Panginuun kaibahan niyu siya.”

¹⁴ Pinabisug Panginuun ti tagipusuun nida ni Surubabil, ni Huswi, hanggan tanan nakabalik sa Israil pag manga Israilita, hampay ipatindug ti Balay Diyus, kanda Panginuun Makamaskihan.

¹⁵ Inumpisahan nida ipinatindug ti Balay Diyus katpung ika-24 pag sirang sa ikan-um pag bulan, sa ikadwa pag timpu sa kay maghari si Daryu.