Habakuk 3 - Hanunuu

Ti Darangin ni Habakuk

¹ Inda kay darangin ni Purupita Habakuk:

² Panginuun, nadnugan niku ti tungkul sa kanmu manga binwat, nakan magdayaw aku sa kanmu. Taynguna buwata maan inda sa kanmi pag kaudasan. Sa udas ipakakit nimu kanmu pangagalit, kaawai di kami.

³ “Kawu ti Banal pag Diyus rumas-ug ginan sa Timan ag sa Bantud Paran. Kanmu kamaskihan makitan sa kalangitan, nakan dayawun kawu manga tawu sa kalibutan.

⁴ Rumas-ug kawu masinglaw ga init; magsinglaw kanmu manga kamang nu naan pag mataguan kanmu kamaskihan.

⁵ Rumas-ug kawu may dara manga sarut.

⁶ Nu magtindug kawu magkahalu ti kalibutan, ag nu magbantay kawu pagtakigan sa dala ti manga nasakupan ag magkarup-ag ti dugay yi pag manga bantud. Kanmu manga palakaw pumarargu sa ud may katapusan.

⁷ Nakitan niku nagkaragba ti manga turda sa Kusan hanggan sa Midyan.

^8-9 “Panginuun, parihu kawu sa sundalu masakyan sa kalisa magpakaun panalu sa labanan. Nakaalistu yi kawu pumana. Dapat si unu lugud kanmu pagkagalitan? Ti manga sapa aw ag ti manga dagat? Pinagini nimu ti daga ag nagbulus siyun ti danum.

¹⁰ Ti manga bantud parihu sa manga tawu nangirkirug pagka nakakit sa kanmu. Inmuran mabaskug; magpaywas ti danum sa dagat ag dinmaraka ti manga humbak.

¹¹ Pinmat-ung ti init ag ti bulan sa kanda nahamtangan sa singlaw nimu hagabur manga pamana hanggan sa singlaw nimu kirab bangkaw.

¹² “Dahil sa kanmu masyadu pag pangagalit linakawan nimu ti kalibutan ag tinatatataan ti manga nasyun,

¹³ hampay iribri nimu kanmu pinili pag nasakupan. Minatay nimu ti takinan daut pag kaharian ag ipinadamhak nimu lubus kay nasakupan.

¹⁴ Tinuhug nimu ti ulu kumandir niya manga sundalu, kay pamana mismu kanmu ginamit. Binwat nimu inda katpung ginira nida kami parihu sa bagyu agud wayakun. Dahil kanda kabayaan rurisun kami pag manga kaawaawa magpatagu.

¹⁵ Parihu kawu sa sundalu masakyan sa kabayu, tinatatataan ti dagat tugka sa naglaun ti manga humbak.”

Ti Magkasabi ni Habakuk sa Ipinasandam Diyus sa Kanya

¹⁶ Magkun si Habakuk, “Pagka nadnugan niku inda pag ipinasandam Panginuun sa kangku, nangirkirug kang buu bilug hanggan kang bibig dahil sa kadalaan. Nanlumuy aku ag nangirkirug kang manga tuud. Ag dahil sa inda pag ipinasandam Panginuun, agwantahun niku alagdun ti udas pagparusa niya sa manga naggira sa kanmi.

¹⁷ Una unman bumurak ti igus, ti ubas, ngatay ti ulibu, una unman pumatubas ti daga, una magkaramatay ti manga hayup sa tudiran,

¹⁸ makabaya diman aku dahil ti Panginuun Diyus imaw ti magribri sa kangku.

¹⁹ Siya ti magpakaun sa kangku kabisugan. Pagpabaskugun niya kang manga lulud parihu sa lulud karasyaw, hampay matukad niku ti abwat pag manga rugar.”