Habakuk 2 - Hanunuu

¹ Magkun si Habakuk, “Mandayik aku sa bantayaw, sa kang barantayan, ag alagdun niku nu unu ti sabihun Panginuun sa kangku ag nu unu kay isagut sa kang riklamu.”

Ti Sagut Diyus sa kan Habakuk

² Kaindaay ti sagut Panginuun sa kan Habakuk: “Suratan kalinaw sa batu malapad ti pagsabihun niku sa kanmu hampay madali inda basahun.

³ Suratan dapu nimu inda dahil balaw waya magras-ug kay kaudasan mangyari inda. Dapat pihu gid mangyari inda udyi dumugay ag balaw pumalya. Nu dumugay waya alagda lang ngalay, dahil pihu gid mangyari inda sa kay kaudasan.

⁴ Kaindaay kanmu isurat: “Bantayi ti manga tawu palabi-labihun! Manga daut sida pag tawu. Dapat ti matadlung pag manga tawu mangabuhi dahil sa kanda pagsarig.

⁵ Sa kay tutuu, balaw masarigan ti kayamanan. Ag ti manga tawu magpadayaw-dayaw maramuun sa kayamanan pirmi magkaarimputu ag unman may kahusayan. Parihu sida sa kamatayan unman may kabusugan. Imaw ngani inda nakan pagbihagun nida ti mayamu pag manga nasyun.

⁶ Dapat puyaan sida manga binihag nida pag nasyun magkumun, “ ‘Kaawaawa kamu pag magbuul manga bagay balaw kanyu, ag magtipun kayamanan sa panab-anan pagdaya. Tugka waya lugud kapira niyu inda buwatun?

⁷ Dapat kadaka lang kamu balusan manga binihag niyu pag nasyun, ag kamu waydi ti takigan sa dala bag-u sida waydi ti umagaw kanyu manga kasiyunan.

⁸ Dahil mayamu pag manga nasyun kanyu inagawan manga kasiyunan, kamu waydi ti agawan manga tawu nasawad sa inda pag manga nasyun. Mangyari inda sa kanyu dahil sa pagmatay niyu sa manga tawu ag dinaut niyu kanda manga daga hanggan manga banwa.

⁹ “ ‘Kaawaawa kamu pag manga magpatindug manga balay ginan sa kuwarta nab-ul niyu sa daut pag buwat. Pagpatibayun waya niyu kanyu manga balay hampay balaw kamu maunu nu rumas-ug ti kadautan.

¹⁰ Dahil sa kanyu pagmatay sa mayamu pag manga tawu, kamu matyun diman hanggan kanyu manga balay wayakun.

¹¹ Ti manga lingub batu hanggan ti manga balayan niyu manga balay ga magringgit maghagad awat dahil mawayak yi ti balay.

¹² “ ‘Kaawaawa kamu pag manga magpatindug banwa sa mahigpit pag palakaw. Handa kamu manmatay mitindug lang inda.

¹³ Dapat tunda kanyu ipinabwat sa binihag niyu pag manga tawu sunugun lang waydi, nakan unman diman may pulus kanda binudlayan. Itinagka yi inda Panginuun Makamaskihan.

¹⁴ Dahil nu kabitay ti dagat punu danum, ti tanan tawu sa kalibutan mapnu diman kinaalman tungkul sa kamaskihan Panginuun.

¹⁵ “ ‘Kaawaawa kamu! Sa kanyu pangagalit pagpakay-ahun niyu kanyu manga kaarani pag nasyun. Ga paglanguhun niyu sida hampay makitan niyu sida uba-uba.

¹⁶ Taynguna kamu maan ti ipakay-a sa halip dayawun, dahil parusahan gid kamu Panginuun. Parihu lang sa painmun niya kamu irinmun makalangu hampay nu langu yi makitan uba-uba ag mangay-a gid kamu.

¹⁷ Binungul niyu ti manga kayu sa Libanun, ag dahil siyun nagkaramatay ti manga hayup ati. Nakan dautun diman kamu ag takigan sa kadalaan. Mangyari inda sa kanyu dahil sa pagmatay niyu sa manga tawu ag sa pagdaut niyu sa kanda manga daga hanggan manga banwa.

¹⁸ “ ‘Unu kay kabuluhan manga diyus-diyusan? Binwat lang waydi inda tawu ginan sa kayu ngatay sa baul, ag balaw diman makasabi kay tutuu. Hayga lugud pagpaniwalaan gid inda manga tawu nagbuwat tunda? Unman ngani inda makabagaw.

¹⁹ Kaawaawa kamu pag manga magsabi sa diyus-diyusan kayu ngatay batu, “Pag-ipulaw kawu ag awati kami.” Unman ngani inda makatudlu sa kanyu. Una pinahaklupan inda gintu ag pilak, unman waydi may buhi.

²⁰ Dapat ti Panginuun ati sa kay banal pag ulian sa langit. Nakan ti tanan sa kalibutan pagpatingi sa kay atubangan.’ ”