Habakuk 1 - Hanunuu

¹ Inda ti tultulanun ni Purupita Habakuk ipinadakit Panginuun sa kanya.

Ti Un-an Riklamu ni Habakuk

² Magkun si Habakuk, “Panginuun, tugka waya lugud kapira aku pag manhagad awat sa kanmu bag-u nimu aku patingihan? Kapira waya lugud nimu kami pag-iribri sa manga mag-unuunu sa kanmi?

³ Hayga duy pag-ipakakit nimu sa kangku inda pag kadautan ag kaguluhan? Una naan mag-akitan niku ti magmaratyan, magpuruyaan, mag-arawayan ag mag-aratwan.

⁴ Nakan nagbaliw unman may pulus ti kasuguan. Ag unman diman pag-ipatupad ti katadlungan dahil ti manga tawu may kasalanan imaw ti magpanalu sa atubangan husgadu balaw ti unman may kasalanan. Nakan nadura ti katadlungan.”

Ti Sagut Diyus sa kan Habakuk

⁵ Magkun ti Diyus, “Bantayi niyu kaayad ti magpangyari sa manga nasyun ag madulaw gid kamu sa kanyu makitan. Dahil may buwatun aku sa kanyu pag kaudasan unman gid kamu maniwala una may manbarita waya inda sa kanyu.

⁶ Dahil pamahalaun niku ti manga taga Babilunya. Inda kay manga nasakupan subra maisug ag maliksi sa paggira sa iba manga nasyun hampay agawun ti manga balaw kanda pag rugar.

⁷ Pagkadalaan gid sida manga tawu. Pagbuwatun nida kanda pagkaibgan buwatun ag unman may makaampara sa kanda.

⁸ Kanda manga kabayu mas mabisug waya sa hayup liyupardu ag mas maisug waya sa talun idu maghanap kay karan-unun nu yabi. Magpalagiw inda ginan sa arayu pag manga rugar, ga maglayang agila magsayab sa kay daragitun.

⁹ Magras-ug ti kadamlan nida manga sundalu alistu umunu-unu. Parihu inda sa mabisug pag durus ginan sa butlakan. Kanda manga bihag parihu ga baras kay kayamu.

¹⁰ Pagpuyaan lang nida ti manga hari hanggan manga takinan. Pagkasarin-an lang nida ti manga banwa sangput alad batu, dahil kaya inda nida daykun sa panab-anan pagtumpuk daga sa saruy alad batu, bag-u maagaw nida ti banwa.

¹¹ Pagkatapus mighit sida ga durus lang linmawuy. Inda sida nagsalan, dahil unman sida may pagkilalan-un diyus nu ud kanda sadili kakayahan.”

Ti Ikadwa Riklamu ni Habakuk

¹² Magkun si Habakuk, “Panginuun, kawu ti Diyus ginan sa kabag-u. Kawu kang banal pag Diyus ag unman kawu may kamatayan. Panginuun, palalan-iban pag batu, pinili nimu ti manga taga Babilunya hampay pumarusa sa kanmi.

¹³ Dahil matadlung kawu, unman kawu makaagwanta bumantay sa kadautan ag kaguluhan. Dapat hayga pinabay-anan lang nimu ti manga maradaya pag taga Babilunya? Hayga nimu pagpahintulutan pakurianan ti manga tawu balaw ga kanda kay ka daut?

¹⁴ Kanda manga kalaban binwat nimu ga manga isda unman may takinan mangampi sa kanda.

¹⁵ Masulung magdaus ti manga taga Babilunya sa kanda pagbihag sa kanda manga kalaban, ga isda nablay sa banwit ngatay sa lambat.

¹⁶ Ag dahil mayamu kanda nabihag, pagdayawun nida kanda sadili kakayahan parihu sa manug-isda magdayaw sa kay banwit ngatay sa kay lambat sa panab-anan pagsunug kamangyan bilang handug sa inda pag manga bagay. Dahil sa panab-anan niya banwit ngatay lambat nagyaman siya ag nagkaimaw abunda pag karan-unun.

¹⁷ Nakan Panginuun, iparargu yi lang aw lugud nida kanda unman may pangaawa magbihag ag magruris sa manga nasyun?”