Gimpuunan 9 - Hanunuu

Ti Kasunduan Diyus sa kan Nuwi

¹ Pinapaladan Diyus si Nuwi hanggan kay manga anak ag sinabi, “Pagpakayamu kamu hampay umaduk ag mangalat sa buu kalibutan.

² Madala sa kanyu ti tanan hayup: ti maglakaw, ti maglayang, ti magyapang, hanggan ti maglanguy. Kamu ti manpamahala sa kanda tanan.

³ Pag-ipakaun niku inda pag manga hayup sa kanyu bilang kanyu karan-unun, parihu diman ipinakaun niku sa kanyu ti manga halaman hampay kanyu makaun.

⁴ Dapat danga niyu pagkan-a ti hayup balaw linmuwas kay dugu sa kay pagkamatay, dahil ti dugu pahalimbawa buhi.

⁵ Ag pihu suktun niku ti una si unu ti manmatay sa kanyu, una ti manga hayup. Suktun gid ngani niku ti una si unu ti manmatay sa kay kaparihu.

⁶ Una si unu ti manmatay sa kay kaparihu kailangan matyun diman siya niya kaparihu. Dahil ti tawu binwat Diyus ga kay histuda.

⁷ Taynguna, pagpakayamu kamu hampay umaduk ag mangalat sa buu kalibutan.”

⁸ Magkun waya ti Diyus sa kan Nuwi hanggan sa kay manga anak,

^9-11 “Inda kang kasunduan sa kanyu hanggan sa manga lahi niyu, ag sa tanan hayup kanyu nakaibahan sa barku hanggan sa tanan hayup magkabuhi sa kalibutan: Balaw yi niku umanun rurisun sa panab-anan gunaw ti tanan pag magkabuhi. Udyi may gunaw mangyari hampay maruris ti kalibutan.”

^12-13 Ag magkun waya ti Diyus, “Bilang tanda kasunduan niku sa kanyu hanggan sa tanan hayup, ag sa lahi niyu sa aratubangun, ipauli niku kang balangaw sa manga rurum.

¹⁴ Nu ipalwas niku ti manga rurum bag-u pumakakit ti balangaw,

¹⁵ alalahanun niku kang kasunduan sa kanyu hanggan sa tanan hayup, balaw yi gid gunawun uman hampay rumuris sa tanan magkabuhi.

¹⁶ Nu lumuwang ti balangaw sa manga rurum, alalahanun niku kang unman may katapusan pag kasunduan sa tanan magkabuhi sa kalibutan.

¹⁷ Ti balangaw ti tanda niku kasunduan sa tanan magkabuhi sa kalibutan.”

Kay manga Anak ni Nuwi

¹⁸ Inda kay manga anak ni Nuwi, kay manga nakaibahan ati sa barku: si Sim, si Kam ag si Hapit. (Si Kam kay ama ni Kanaan.)

¹⁹ Sida tulu ti gimpuunan tanan tawu sa kalibutan.

²⁰ Si Nuwi usa ka manugtanman ag siya ti un-an nagtanum ubas.

²¹ Pagka sa usa ka sirang, inminum siya irinmun makalangu ag nalangu siya. Naturug siya uba-uba sa sulud niya turda.

²² Taynguna, si Kam kay ama ni Kanaan sinmulud sa turda, ag nakitan niya uba kay ama. Nakan linmuwas siya ag sinabihan niya kay duwa ka patar-ari.

²³ Binmuul rutay sida ni Sim ni Hapit bag-u ipinauli nida sa kanda labay, pagkatapus, pinmausun sida atabug sa sulud turda hampay takipan kanda ama. Balaw sida nag-aliwliw dahil dayu nida makitan kanda ama uba.

²⁴ Pagka nahumpawan yi si Nuwi sa kalanguhan, ag naalaman niya nu hintay ti binwat niya kap-usan pag anak,

²⁵ magkun siya: “Saadan kawu Kanaan! Bumaliw pinakaababa kawu pag suruguun nimu manga patar-ari.”

²⁶ Ag magkun diman siya, “Dayawun ti Panginuun, ti Diyus ni Sim. Mana suruguun wadi ni Sim si Kanaan.

²⁷ Mana paluangun Diyus kay saklaw daga ni Hapit, ag marinu mana ti pakiusahan manga linahi niya hanggan ti manga linahi ni Sim. Mana suruguun diman ni Hapit si Kanaan.”

²⁸ Ginan sa nakalawuy gunaw, nabuhi waya si Nuwi manga 350 ka timpu.

²⁹ Namatay siya sa idad 950 ka timpu.