Gimpuunan 7 - Hanunuu

Ti Gunaw

¹ Magkun ti Panginuun sa kan Nuwi, “Pagsulud kawu sa barku kaibahan kanmu buu magtal-anakan. Dahil sa tanan tawu sa inda pag sinulput kawu lang ti nakitan niku matadlung.

² Pagdara kawu pitu ka paris sa kada kalasi malumpiyu pag hayup, dapat usa lang ka paris sa kada kalasi balaw malumpiyu pag hayup.

³ Ag pagdara diman kawu pitu ka paris sa kada kalasi manuk. Buwata nimu inda hampay mabuhi sida sa kalibutan.

⁴ Dahil makalawuy ti pitu ka sirang taynguna ginan, pauranan niku ti buu kalibutan sa sulud upatpulu ka sirang ag upatpulu ka yabi, hampay rurisun ti tanan niku linalang.”

⁵ Tinupad ni Nuwi ti tanan isinugu Panginuun sa kanya.

⁶ Si Nuwi 600 timpu yi kay idad pagka rinmas-ug ti gunaw sa kalibutan.

⁷ Sinmaka siya sa barku kaibahan kay asawa, kay manga anak lalaki, hanggan kay manga umagad hampay balaw sida mamatay sa gunaw.

^8-9 Angay sa isinugu Diyus sa kan Nuwi, ipinasaka niya sa barku ti kada paris tanan kalasi hayup, ti malumpiyu ag ti balaw malumpiyu pag manga hayup nagpakarani sa kanya.

¹⁰ Bag-u pagkalawuy pitu ka sirang, ginmunaw sa kalibutan.

¹¹ Ati katpung si Nuwi unum ka gatus ka timpu yi kay idad. Katpung sampulu may pitu pag sirang sa ikadwa pag bulan, inmuran ngani mabaskug ga nabukasan ti manga gaha langit, ag linmapaw ti tanan bulbugan.

¹² Inmuran sa kalibutan sa sulud upatpulu ka sirang ag upatpulu ka yabi.

¹³ Tunda katpung pag sirang sa umpisa uran, sinmaka sa barku si Nuwi, kay asawa hanggan kay tulu ka anak nida sida ni Sim, ni Kam ag ni Hapit kaibahan kanda manga asawa.

¹⁴ Kaibahan diman nida ti tanan pag kalasi hayup: ti maglakaw, ti magyapang ag ti maglayang.

^15-16 Angay sa isinugu Diyus sa kan Nuwi, ipinasaka niya sa barku ti kada paris tanan kalasi hayup nagpakarani sa kanya. Bag-u tinalakpan Panginuun ti sabian barku.

^17-18 Unman may apas ti uran sa kalibutan sa sulud upatpulu ka sirang. Linmapaw ti danum tugka sa yinmataw ti barku.

¹⁹ Nag-amat waya gid ti danum tugka sa nalapawan ti tanan arabwat pag manga bantud,

²⁰ ag tugka sa nag-abwat waya gid ti danum manga 15 ka luk-an siku ginan sa suru pinakaabwat pag bantud.

²¹ Nakan nagkaramatay ti tanan may buhi — ti manga hayup maglayang, ti manga maglakaw, ti manga magyapang hanggan ti tanan tawu.

²² Nagkaramatay ti tanan magkabuhi sa daga.

²³ Rinuris niya ti tanan tawu hanggan ti tanan manga hayup sa kalibutan. Si Nuwi lang hanggan kay manga kaibahan sa sulud barku ti unman namatay.

²⁴ Ginmunaw sa kalibutan sa sulud usa ka gatus may limangpulu ka sirang.