Gimpuunan 50 - Hanunuu

¹ Hinagkung ni Husi kay ama ag inarkan habang maglumi.

² Bag-u sinugu niya ti manga manugbulung pag suruguun niya kuntay balsamuha kay ama. Nakan binalsamu ngani nida inda.

³ Abut 40 ka sirang kay ka dugay ti pagbalsamu, angay sa tun-anun manga Ihipsiyu. Nanhimanglaw ti manga Ihipsiyu sa sulud pitumpulu ka sirang.

⁴ Pagka natapus kanda maghimanglaw, magkun si Husi sa manga takinan hari Ihiptu, “Nu mahimu sabiha niyu sa hari

⁵ pasnui niya aku ilbung kang ama sa Kanaan. Dahil bag-u siya namatay, pinasumpa niya aku ilbung siya sa ipinabwat niya sa Kanaan pag lulubngan. Bumalik di aku matapus ti paglubung.”

⁶ Pagka naalaman tunda hari, magkun siya sa kan Husi, “Tupada kanmu itinaratu sa kanmu ama. Paglakaw kawu ag lubngan siya.”

⁷ Nakan linmakaw ngani si Husi kaibahan ti kayamuan takinan hari: ti manga manugpamahala balay hari hanggan ti manga manugpamahala Ihiptu.

⁸ Kaibahan diman ti magtal-anakan ni Husi, ti magtal-anakan niya manga patar-ari, hanggan ti buu magtal-anakan ni Hakub. Ti natayak sa Gusin kanda wadi manga dariit anak hanggan kanda manga hayup.

⁹ Kaibahan diman nida ti manga manugkalisa hanggan manga manugkabayu. Mayamu gid ungud sida.

¹⁰ Pagras-ug nida sa giriukan sa Atad, arani sa Sapa Hurdan, nanhimanglaw sida ati para sa kan Hakub ag masyadu gid sida nanlulumian. Nanhimanglaw si Husi sa sulud pitu ka sirang para sa kay ama.

¹¹ Pagka nakitan manga Kananiyu ti paghimanglaw nida sa may giriukan sa Atad, magkun sida, “Subra gid ti kapanglawan manga Ihipsiyu.” Nakan tunda pag rugar sa may arani Sapa Hurdan iningarnan Abil Misraim.

¹² Tinupad manga anak ni Hakub kay bilin sa kanda.

¹³ Dahil dinara nida kay bangkay sa Kanaan ag ilinbung sa lukib ati sa tanman Makpila, sa butlakan Mamri. Binili ni Abraham tunda pag tanman sa kan Iprun usa ka Hitiyu hampay buwatun lulubngan.

¹⁴ Pagkatapus lubung, nagbalik si Husi sa Ihiptu kaibahan kay manga patar-ari hanggan ti tanan kinmuyug sa paglubung.

Ti Pangaku ni Husi sa Kay manga Patar-ari

¹⁵ Taynguna tigbak yi kanda ama, magkun kay manga patar-ari ni Husi, “Barang magtanum waya galit si Husi sa kanta ag manbalus siya sa kanta binwat sa kanya.”

¹⁶ Nakan namabilin sida tag sa kan Husi magkumun, “Magbilin kanta ama bag-u siya namatay

¹⁷ kuntay sabiha sa kanmu patawada nimu kami sa daut pag binwat nimi sa kanmu. Nakan taynguna, mana patawadun nimu kami pag manga suruguun diman Diyus nita ama.” Pagka nakaras-ug ti pabilin nida sa kan Husi, nanlumi siya.

¹⁸ Balaw nagdugay, nag-ati ngap kay manga patar-ari sa kanya. Pagras-ug nida, nagyuk-ub sida sa atubangan niya bilang paggalang. Bag-u magkun sida, “Atay kami, mahimu nimu buwatun suruguun.”

¹⁹ Dapat sinmagut si Husi sa kanda, “Danga kamu magkadala. Balaw aku Diyus.

²⁰ Ungud gid kamu naggayak daut sa kangku, dapat gayak yi Diyus tunda bumurak kaayadan imaw ti nagribri taynguna sa mayamu tawu sa taglun-us.

²¹ Nakan danga kamu magkadala. Aku ti bahala sa kanyu hanggan sa kanyu manga anak.” Tinaratuhan ni Husi sida ag may kahusayan yi kanda nalub-anan.

Ti Kamatayan ni Husi

²² Nangulian si Husi sa Ihiptu kaibahan ti buu magtal-anakan niya ama. Nabuhi siya 110 ka timpu,

²³ ag nakitan waya niya kay manga umput sa kay anak sa kan Ipraim hanggan sa kay laki sa kan Makir kay anak ni Manasis. Pag-ibilang niya ga kay diman manga anak ti manga anak ni Makir.

²⁴ Taynguna, magkun si Husi sa kay manga patar-ari, “Arani yi aku mamatay, dapat balaw kamu pabay-anan Diyus. Bul-un niya kamu sitay ginan pag rugar ag darahun sa rugar itinaratu niya sa kan Abraham, sa kan Isaak ag sa kan Hakub.”

²⁵ Bag-u pinasumpa ni Husi ti manga Israilita. Magkun siya, “Itaratu niyu nu paighitun yi kamu Diyus sitay ginan, daraha di niyu kang manga but-ul sa pagginan niyu sa inda pag daga.”

²⁶ Namatay si Husi ati sa Ihiptu sa idad 110 ka timpu. Binalsamu siya ag ipinauli sa kabaung ati sa Ihiptu.