Gimpuunan 5 - Hanunuu

Kay manga Linahi ni Adam

¹ Inda ti isinurat pag tultulanun tungkul sa linahi ni Adam. Pagka linalang Diyus ti tawu, binwat niya inda ga kay histuda.

² Linalang niya ti lalaki hanggan ti babayi, pinapaladan niya sida ag iningarnan “tawu”.

³ Pagka 130 ka timpu yi si Adam, ainanak kay anak ga kay histuda. Pinaingarnan niya inda Sit.

⁴ Pagka ainanak si Sit, nabuhi waya si Adam 800 timpu ag nadugangan waya kay manga anak.

⁵ Namatay siya sa idad 930 ka timpu.

⁶ Pagka 105 ka timpu yi si Sit, ainanak kay anak lalaki si Inus.

⁷ Ati ginan sa kay pagkaanak sa kan Inus, nabuhi waya si Sit 807 ka timpu ag nadugangan waya kay manga anak.

⁸ Namatay siya sa idad 912 ka timpu.

⁹ Pagka 90 ka timpu yi si Inus, ainanak kay anak lalaki si Kinan.

¹⁰ Pagka nianak si Kinan, nabuhi waya si Inus 815 ka timpu ag nadugangan waya kay manga anak.

¹¹ Namatay siya sa idad 905 ka timpu.

¹² Pagka 70 ka timpu yi si Kinan, ainanak kay anak lalaki si Mahalalil.

¹³ Pagka nianak si Mahalalil, nabuhi waya si Kinan 840 ka timpu ag nadugangan waya kay manga anak.

¹⁴ Namatay siya sa idad 910 ka timpu.

¹⁵ Pagka 65 ka timpu yi si Mahalalil, ainanak kay anak lalaki si Harid.

¹⁶ Pagka nianak si Harid, nabuhi waya si Mahalalil 830 ka timpu ag nadugangan waya kay manga anak.

¹⁷ Namatay siya sa idad 895 ka timpu.

¹⁸ Pagka 162 ka timpu yi si Harid, ainanak kay anak lalaki si Inuk.

¹⁹ Pagka nianak si Inuk, nabuhi waya si Harid 800 ka timpu ag nadugangan waya kay manga anak.

²⁰ Namatay siya sa idad 962 ka timpu.

²¹ Pagka 65 ka timpu yi si Inuk, ainanak kay anak lalaki si Matusalim.

^22-24 Pagka nianak si Matusalim, nabuhi waya si Inuk 300 ka timpu ag nadugangan waya kay manga anak. Tunda katpung, marapakiusa si Inuk sa Diyus. Manga 365 ka timpu yi siya kay nadura, dahil bin-ul siya Diyus.

²⁵ Pagka 187 ka timpu yi si Matusalim, ainanak kay anak lalaki si Lamik.

²⁶ Pagka nianak si Lamik, nabuhi waya si Matusalim 782 ka timpu ag nadugangan waya kay manga anak.

²⁷ Namatay siya sa idad 969 ka timpu.

²⁸ Pagka 182 ka timpu yi si Lamik, ainanak kay anak lalaki.

²⁹ Magkun siya, “Inda kang anak makaawat sa kanta sa manga kakurian nita sa magtarabahu sa sinaadan Panginuun pag daga, nakan ingarnan niku siya Nuwi.”

³⁰ Pagka ainanak si Nuwi, nabuhi waya si Lamik 595 ka timpu ag nadugangan waya kay manga anak.

³¹ Namatay siya sa idad 777 ka timpu.

³² Pagka 500 timpu yi si Nuwi, ainanak kay manga anak lalaki sida ni Sim, ni Kam, ag ni Hapit.