Gimpuunan 47 - Hanunuu

¹ Bag-u nagginan si Husi ag nag-ati sa hari Ihiptu kaibahan kay lima ka patar-ari. Magkun si Husi sa hari, “Rinmas-ug yi duy kang ama hanggan kang manga patar-ari ginan sa Kanaan, ag dara duy nida kanda manga hayup hanggan ti tanan nida kasiyunan. Ati duy sida taynguna sa Gusin.”

² Ipinakilala rargu niya sa hari kay lima ka patar-ari.

³ Pinaingana sida hari, “Hintay kanyu tarabahu?” Nagsagut sida, “Manga pastur duy kami hayup, parihu sa kanmi manga gurang.

⁴ Nag-ataytag kami hampay atay dap kami pag mangulian dahil sa masyadu pag kalun-usan sa Kanaan, ag unman yi kami may mapasturan manga hayup nimi. Paghagadun duy nimi sa kanmu nu mahimu pasnui nimu kami mangulian sa Gusin.”

⁵ Magkun ti hari sa kan Husi, “Taynguna atay yi kanmu ama hanggan manga patar-ari,

⁶ bukas ti Ihiptu para sa kanyu magtal-anakan. Patahana sida sa Gusin, usa sa marinu pag daga sa Ihiptu. Nu may mapili kawu makatiwalaan sa kanda, buwata sida manugbantay niku manga hayup.”

⁷ Dinara ni Husi kay ama sa hari ag ipinakilala. Bag-u pinapaladan ni Hakub ti hari.

⁸ Pinaingana siya hari, “Pira yi kawu ka timpu?”

⁹ Nagsagut siya, “130 yi duy ka timpu. Dag-ud ag makuri duy kang buhi sitay sa daga; unman inda nag-aput sa kadugayun buhi niku manga ginurang.”

¹⁰ Bag-u pinapaladan maan niya ti hari, ag ginminan siya sa atubangan hari.

¹¹ Angay sa sugu hari, ipinatahan ni Husi kay ama hanggan kay manga patar-ari sa Ihiptu; ipinakaun niya sa kanda ti rugar Ramisis, usa sa pinakamarinu pag daga sa Ihiptu.

¹² Tinustusan karan-unun ni Husi kay ama, hanggan kay manga patar-ari ag ti buu magtal-anakan niya ama, angay sa kayamuun nida manga anak.

¹³ Taynguna, masyadu yi ti taglun-us nakan unman yi may karan-unun una naan. Magpanlumuy yi ti manga tawu sa Ihiptu hanggan sa Kanaan dahil sa lun-us.

¹⁴ Tinipun ni Husi ti tanan ibinayad pag kuwarta manga taga Ihiptu hanggan taga Kanaan sa kanda ibinili karan-unun, bag-u dinara inda sa balay hari.

¹⁵ Nagras-ug ti udas natabu yi ti kuwarta panbili manga taga Ihiptu hanggan manga taga Kanaan. Nag-ati ti manga taga Ihiptu sa kan Husi ag magkun, “Udyi duy kami may kuwarta. Nu mahimu pakan-i yi lang nimu kami karan-unun dahil magkamatay yi kami sa lun-us.”

¹⁶ Magkun si Husi, “Nu unman yi ungud kamu may kuwarta, daran-a niyu ataytag kanyu manga hayup ag imaw kanyu panbayad sa karan-unun.”

¹⁷ Nakan dinara nida sa kan Husi kanda manga kabayu, karanidu, baka ag asnu, bag-u ibinalyu sa karan-unun. Sa sulud usa ka timpu, tinustusan sida ni Husi karan-unun kabalyuhan nida manga hayup.

¹⁸ Pagkalawuy usa ka timpu, nag-ati yi maan ti manga tawu sa kan Husi ag magkun, “Balaw duy milihus sa kanmu udyi kami may kuwarta ag kanmi manga hayup asan yi sa kanmu. Udyi duy may nasawad sa kanmi, purya wadi kanmi sadili hanggan manga daga.

¹⁹ Nakan awati duy nimu kami hampay balaw kami mamatay ag balaw mapabay-anan kanmi manga daga. Pasnu duy kami buwatun nimu suruguun hari ag kanya yi kanmi manga daga hampay may makaun lang kami. Pakan-i duy nimu kami manga uyas pananum hampay balaw kami mamatay ag balaw mapabay-anan ti daga.”

²⁰ Ipinabili ngani tanan taga Ihiptu kanda manga daga sa kan Husi dahil masyadu yi ti taglun-us. Binili ni Husi inda tanan para sa hari, nakan kanda manga daga hari yi ti may apu.

²¹ Binuwat ni Husi suruguun hari ti manga tawu sa buu Ihiptu.

²² Ti daga lang manga manughandug ti balaw nabili ni Husi. Balaw nida kailangan ipabili kanda manga daga dahil pagtustusan sida karan-unun hari hanggan manga pangailangan nida.

²³ Magkun si Husi sa manga tawu, “Taynguna nabili yi niku kamu hanggan kanyu manga daga para sa hari, indaay ti uyas hampay makatanum kamu.

²⁴ Nu man-ani kamu, pakan-an niyu sa hari ti ika-20 pag bahagi niyu ani. Ag kay sawad kanyu yi, hampay may maitanum kamu ag may kan-un kanyu buu magtal-anakan.”

²⁵ Magkun ti manga tawu, “Mayad gid duy kawu pag amu para sa kanmi; irinibri nimu kanmi buhi. Magpasnu duy kami buwatun panawuhun hari.”

²⁶ Nakan binwat ni Husi ti kasuguan sa daga Ihiptu ti kada ika-20 pag bahagi ani para sa hari. Inda pag kasuguan tugka kainda pagtupadun di. Ti manga daga lang manughandug ti balaw naapu hari.

²⁷ Nangulian ti manga Israilita sa Gusin sakup Ihiptu. Nagkaimaw sida ati daga ag nagyamu waya kanda lahi.

²⁸ Nangulian si Hakub sa Ihiptu sa sulud sampulu may pitu ka timpu; nabuhi siya tugka sa 147 ka timpu.

²⁹ Pagka magkaramdaman niya arani yi siya mamatay, tinawagan niya si Husi ag magkun, “Nu mahimu, paulian nimu kanmu kamang sa tab-anan niku duwa ka balangbang ag pagsumpa kawu iparargu nimu kanmu mayad pag nabubut-un sa kangku. Danga aku paglubngan atay sa Ihiptu.

³⁰ Nu mamatay yi aku, lubngan nimu aku sa lulubngan niku manga ginurang.” Nagsagut si Husi, “Tupadun duy niku kanmu pagsabihun.”

³¹ Magkun si Hakub, “Pagsumpa kawu sa kangku tupadun gid nimu inda.” Nakan nagsumpa ngani si Husi sa kanya, ag linmuhud si Hakub sa kay igyaan hampay manpasalamat sa Diyus.