Gimpuunan 46 - Hanunuu

Nag-atag sa Ihiptu si Hakub

¹ Ginminan si Hakub atabug sa Ihiptu kaibahan kay magtal-anakan dara ti tanan niya kasiyunan. Pagras-ug niya sa Biirsiba, naghandug siya sa Diyus niya ama, ni Isaak.

² Igu yabi, nanhampang ti Diyus sa kanya sa panab-anan usa ka pangakakitun. Tinawagan niya, “Hakub, Hakub,” ag sinmagut sa kanya, “Inda di duy aku.”

³ Pagkatapus, magkun siya, “Aku ti Diyus nimu ama. Danga kawu magkadala mag-atag sa Ihiptu, dahil buwatun niku kamu usa ka bantug pag nasyun ati.

⁴ Aku gid ngap kanmu kaibahan sa pag-atag sa Ihiptu ag ibalik di maan niku kawu sitay sa Kanaan. Ag nu mamatay yi kawu, sa kanmu di arani si Husi.”

⁵ Ipinasakay si Hakub niya manga anak sa ipinadara hari Ihiptu pag kalisa hampay kay sakyan. Ipinasakay diman nida kanda manga asawa hanggan anak, bag-u ginminan sida sa Biirsiba.

^6-7 Dinara nida kanda natipun sa Kanaan pag manga hayup hanggan manga kasiyunan. Tinaban diman ni Hakub sa Ihiptu ti tanan niya linahi: kay manga anak hanggan manga umput.

⁸ Inda ti manga ngaran manga Israilita, ti nag-ati sa Ihiptu pag linahi ni Hakub: si Rubin kay anak panganay ni Hakub,

⁹ ag kay manga anak sida ni Hanuk, ni Palu, ni Hisrun ag ni Karmi;

¹⁰ si Simyun hanggan kay manga anak sida ni Yimwil, ni Hamin, ni Uhad, ni Hakin, ni Suhar, ag ni Shaul kay anak ni Simyun sa babayi taga Kanaan;

¹¹ si Libi hanggan kay manga anak sida ni Girsun, ni Kuhat ag ni Mirari;

¹² si Huda hanggan kay manga anak sida ni Ir, ni Unan, ni Sila, ni Paris ag ni Sira (dapat si Ir hanggan si Unan namatay sa Kanaan), bag-u kay manga anak ni Paris sida ni Hisrun ni Hamul;

¹³ si Isakar hanggan kay manga anak sida ni Tula, ni Puwa, ni Hasub ag ni Simrun;

¹⁴ si Sabulun hanggan kay manga anak sida ni Sirid, ni Ilun ag ni Yalil.

¹⁵ Sida ti 33 ka anak ag umput ni Hakub sa kan Liya ti iinanak sa Padan Aram, ag balaw kabilang kay anak babayi, si Dina.

¹⁶ Kaibahan diman sa Ihiptu: si Gad hanggan kay manga anak sida ni Sipyun, ni Hagi, ni Suni, ni Isbun, ni Iri, ni Arudi ag ni Arili;

¹⁷ si Asir hanggan kay manga anak sida ni Imna, ni Isba, ni Isbi, ni Birya ag kanda patar-ari babayi si Sira, hanggan kay manga anak ni Birya sida ni Hibir ni Malkiyil.

¹⁸ Sida ti 16 ka anak ag umput ni Hakub sa kan Silpa, ti ipinakaun ni Laban pag suruguun sa kan Liya.

¹⁹ Kay manga anak ni Hakub sa kan Rakil sida ni Husi ni Binhamin.

²⁰ Kay manga anak ni Husi sa kan Asinat iinanak sa Ihiptu sida ni Manasis ni Ipraim. (Si Asinat kay anak ni Putipira manughandug sa banwa Un.)

²¹ Kaibahan diman sa Ihiptu: si Binhamin hanggan kay manga anak sida ni Bila, ni Bikir, ni Asbil, ni Gira, ni Naaman, ni Ihi, ni Rus, ni Mupim, ni Hupim ag ni Ard.

²² Sida ti 14 ka anak ag umput ni Hakub sa kan Rakil.

²³ Kaibahan diman sa Ihiptu: si Dan hanggan kay anak si Husim;

²⁴ si Niptali hanggan kay manga anak sida ni Hasiil, ni Guni, ni Hisir ag ni Silim.

²⁵ Sida ti pitu ka anak ag laki ni Hakub sa kan Bilha, ti ipinakaun ni Laban sa kan Rakil pag suruguun.

²⁶ 66 ti bilang tanan anak hanggan umput ni Hakub nagkuyug sa Ihiptu, ag balaw waya nibilang siyun ti manga asawa niya manga anak.

²⁷ Kaibahan ti duwa ka anak ni Husi ipinanganak sa Ihiptu, 70 kay kabuuhan magtal-anakan ni Hakub sa kay nag-atag sa daga Ihiptu.

²⁸ Pagka udwaya sida magras-ug sa Ihiptu, sinugu ni Hakub si Huda pag-una atabug sa kan Husi hampay itudlu sa kanda ti rugar Gusin. Pagka nagras-ug yi sida ni Hakub sa Gusin,

²⁹ sinmakay si Husi sa kalisa niya hampay salubungun kay ama. Pagka nagsampak sida, hinagkung ni Husi kay ama ag nanlumi gid dugay.

³⁰ Magkun si Hakub sa kan Husi, “Taynguna, nakaalistu yi aku mamatay dahil nakitan yi niku kawu buhi.”

³¹ Ag magkun si Husi sa kay manga patar-ari hanggan sa buu magtal-anakan niya ama, “Guminan dap aku ag sabihun sa hari Ihiptu kuntay rinmas-ug yi kang manga patar-ari hanggan ti buu magtal-anakan niku ama mag-ulian sa Kanaan.

³² Sabihun diman niku sa kanya magpastur kamu kanyu hayup, bag-u dinara niyu kanyu manga hayup hanggan ti tanan niyu kasiyunan.

³³ Nakan nu patawagun niya kamu ag paingan-un nu hintay kanyu tarabahu,

³⁴ sabiha niyu magpastur kamu manga hayup ginan di waya sa anak parihu sa kanyu manga gurang, hampay patahanun niya kamu sa Gusin. Dahil magkadaut ti manga Ihipsiyu sa manga magpastur hayup.”