Gimpuunan 44 - Hanunuu

Ti Nadura Tasa

¹ Sinugu ni Husi ti manugpamahala sa kay balay. Magkun siya, “Pun-a nimu karan-unun ti manga saku magtar-ari angay sa kanda kaya, bag-u paulian sa manga saku ti ibinayad nida pag kuwarta.

² Paulian nimu kang tasa pilak sa saku kap-usan kaibahan ti ibinayad niya pag kuwarta sa karan-unun.” Binwat ngani manugpamahala pag suruguun ti sinabi ni Husi.

³ Kinaaldawan, surip waya nagginan yi ti magtar-arian kaibahan kanda manga asnu.

⁴ Udwaya sida arayu sa banwa pagka magkun si Husi sa kay manugpamahala pag suruguun, “Apura, lagsa ati pag manga tawu! Ag nu matakdan nimu sida sabiha sa kanda, ‘Hayga daut kanyu ibinalus sa mayad pag pakiusa nimi sa kanyu?

⁵ Hayga bin-ul niyu ti tasa irinman niku amu ag garamitun niya sa maghula? Daut gid inda pag binwat niyu.’ ”

⁶ Natakdan ngani manugpamahala pag suruguun ti magtar-arian ag sinabi niya inda sa kanda.

⁷ Magkun sida sa manugpamahala pag suruguun, “Kabitay nimu nasabi tunda? Balaw nimi mabuwat tunda pag bagay.

⁸ Alam diman nimu ginan sa Kanaan dinara di maan nimi ataytag sa kanyu ti nakitan nimi pag kuwarta sa kanmi manga saku. Nakan hayga manakaw waya kami pilak ngatay gintu sa balay nimu amu?

⁹ Nu makitan nimu tunda pag tasa una sa kantapu sa kanmi, matya nimu siya ag buwata kami suruguun nimu.”

¹⁰ Magkun ti manugpamahala pag suruguun, “Hu, nu makitan niku ti tasa una sa kantapu sa kanyu buwatun niku siya suruguun, bag-u ti masawad sa kanyu balaw yi may saragtun.”

¹¹ Nakan daldali nida ipinadna kanda manga saku ag binukasan inda.

¹² Susun hinanap manugpamahala pag suruguun ti tasa, ginan sa panganay tugka sa kap-usan, bag-u ti tasa nakitan sa saku ni Binhamin.

¹³ Pagka nakitan inda magtar-arian, ginitas nida kanda manga rutay sa subra pag karukuan. Ipinasakay maan nida sa asnu kanda manga saku ag binmalik sa banwa.

¹⁴ Pagka magras-ug si Huda hanggan kay manga patar-ari niya sa Ihiptu, ati di si Husi sa kay balay. Sinmulud sida sa balay ag linmuhud sa atubangan ni Husi.

¹⁵ Magkun si Husi sa kanda, “Hintay inda kanyu binwat? Balaw aw lugud niyu alam madunung aku maghula? Nakan unman kamu may mailihus sa kangku.”

¹⁶ Magkun si Huda, “Mahal pag Gubirnadur, unman yi duy kami may riklamu sa kanmu, ag unman nimi masabi kuntay balaw kami nagsalan. Ti Diyus ti magpaburayhaw kanmi kasalanan. Taynguna, tanan duy kami kanmu yi suruguun — kami hanggan ti naapuan tasa.”

¹⁷ Dapat magkun si Husi, “Balaw niku mabuwat tunda. Nu sa kantapu lang pag nakitan ti tasa siya lang ti suruguun niku. Ag mahimu yi kamu makauli sa kanyu ama balaw may mag-ampara.”

Napaawa-awa si Huda para sa kan Binhamin

¹⁸ Napakarani si Huda sa kan Husi ag magkun, “Paghilingun niku sa kanmu Mahal pag Gubirnadur, nu mahimu, patingihi nimu aku. Danga mana kawu magkagalit sa kangku, kawu ti ga ka tupung hari Ihiptu.

¹⁹ Pinaingana nimu kami sitay nu may imaw waya kami ama ag patar-ari,

²⁰ bag-u sinagut duy nimi may ama waya kami gurangun yi, ag may kap-usan kami patar-ari anak niya sa pagkagurangun. Magkun diman kami tigbak yi kay patar-ari ag siya wadi ti nasawad pag anak niya ina, ag pagmahalun gid duy siya nimi ama.

²¹ Magkun kawu daran-a nimi siya hampay makitan diman nimu siya.

²² Magkun kami sa kanmu balaw mahimu tayakan nimi kap-usan patar-ari kanmi ama, dahil barang imaw waya tunda ti pun-an niya kamatayan.

²³ Dapat magkun kawu sa kanmi danga kami magpakakit sa kanmu nu balaw nimi kaibahan kanmi patar-ari kap-usan.

²⁴ Inda tanan-tanan itinultul nimi sa kanmi ama katpung kanmi nuli.

²⁵ “Sa kadugayun, magkun kanmi ama pagbalik maan kami atay ag pagbili karan-unun.

²⁶ Dapat magkun kami sa kanya mahimu lang kami guminan nu kaibahan nimi kanmi patar-ari kap-usan, dahil balaw mahimu kami magpakakit sa kanmu nu balaw nimi kaibahan kanmi kap-usan.

²⁷ Indaay kay sagut niya sa kanmi, ‘Alam diman niyu duwa lang kang anak sa kang asawa si Rakil.

²⁸ Kay usa udyi; mahimu ginutay-gutay siya maisug pag hayup. Ag udyi niku siya nakitan tunda di ginan.

²⁹ Nu ikuyug waya niyu inda pag usa ti nasawad sa kangku, ag nu may mangyari balaw mayad sa kanya, barang mamatay aku dahil sa masyadu pag karukuan niku tagipusuun.’

³⁰ “Nakan ti buhi nimi ama kasugpun nimi kap-usan pag patar-ari. Nu muli kami balaw nimi siya kaibahan,

³¹ pihu mamatay sa karukuan kanmi ama gurangun yi. Ag kami ti sisihun sa kay kamatayan.

³² Ibinuhis niku kang buhi para sa kanmi kap-usan patar-ari. Magkun duy aku sa kang ama nu balaw niku siya maiuli sa kanya, aku ti dapat sisihun tugka aban.

³³ Nakan Mahal pag Gubirnadur, aku yi lang duy ti patayak atay bilang kanmu suruguun sa halip siya, ag pasnui yi lang siya makauli kaibahan niya manga patar-ari.

³⁴ Balaw duy aku mahimu muli nu unman niku siya kaibahan. Balaw duy niku maagwanta makitan ti daut mangyari sa kanmi ama.”