Gimpuunan 39 - Hanunuu

Si Husi ag ti Asawa ni Putipar

¹ Igu dinara yi si Husi manga Ismailita sa Ihiptu, ipinabili siya sa kan Putipar usa sa manga takinan hari Ihiptu. (Si Putipar kapitan manga guwardiya sa balay hari.)

² Giniyahan Panginuun si Husi, nakan marapanalu siya. Ati siya pag mag-uli sa balay niya amu Ihipsiyu si Putipar.

³ Nakitan ni Putipar paggiyahan Panginuun si Husi ag pagpapaladan sa tanan niya buruwatun,

⁴ nakan mayad kay magpakiusa niya sa kan Husi. Binwat niya siya katiwala ag manugpamahala niya magtal-anakan hanggan tanan niya kasiyunan.

⁵ Ginan sa umpisa si Husi ti magpamahala, pinapaladan Panginuun ti magtal-anakan niya amu, si Putipar taga Ihiptu hanggan ti tanan kasiyunan niya sa kay balay ag tanman. Binwat inda Panginuun dahil sa kan Husi.

⁶ Ikinatiwala ni Putipar ti tanan sa kan Husi ag unman siya may tuhay irintindihun purya wadi sa kay magpili kay kan-un. Makurasug si Husi ag marinu kay bilug.

⁷ Balaw nagdugay, naibug sa kanya ti asawa niya amu. Paggaryahun niya si Husi hampay man-ululidan.

⁸ Dapat unman nagpasnu si Husi. Magkun siya sa babayi, “Patingihi duy nimu aku! Ikinatiwala duy sa kangku niku amu ti tanan niya kasiyunan, nakan udyi siya nag-alinlangan sa manga butang atay sa kay magtal-anakan.

⁹ Unman yi duy may tumupung sa kangku sa inda pag magtal-anakan. Ikinatiwala niya sa kangku ti tanan purya lang sa kanmu dahil asawa niya kawu. Nakan balaw duy niku mabuwat tunda sa kang amu ag magkasala sa Diyus.”

¹⁰ Una sirang-sirang ti maggarya babayi sa kan Husi hampay man-ululidan, unman diman gid magpasnu si Husi.

¹¹ Sa usa ka sirang, sinmaka si Husi sa balay hampay mantarabahu. Nitaun unman may suruguun sa sulud balay.

¹² Hiniyaptan siya asawa niya amu sa balukas ag magkun, “Pag-ulid kawu sa kangku!” Dapat nalagiw si Husi tag sa luwas balay, ag natayak kay balukas sa babayi.

¹³ Pagka nakitan babayi nakalwas yi si Husi ag hiyaput niya kay balukas,

¹⁴ tinawagan niya kay manga suruguun ag magkun, “Bantayi niyu inda! Dinarahan kita niku asawa usa ka Hibriyu hampay ipakay-a kita. Alam aw niyu sinmaka siya sa kang sulud-sulud hampay lugusun aku, dapat nagringgit aku.

¹⁵ Nakan nalagiw siya tag sa luwas, ag natayak kay balukas.”

¹⁶ Itinagu babayi ti balukas ni Husi tugka sa rinmas-ug kay asawa.

¹⁷ Itinultul niya rargu inda sa kay asawa. Magkun siya, “Ti dinara nimu sitay tag pag suruguun Hibriyu magkaibug pumakay-a sa kangku dahil nagsaka siya sa kang sulud-sulud hampay lugusun aku.

¹⁸ Dapat nalagiw siya tag sa luwas pagka nanringgit aku, ag natayak waya ngani kay balukas.”

¹⁹ Igu nasaydan ni Putipar ti tultulanun niya asawa tungkul sa binwat ni Husi, nangisug gid siya.

²⁰ Nakan ipinadakup niya si Husi ag ipinaslud sa pirisuhan manga piririsuhan hari. Dapat una sa pirisuhan si Husi,

²¹ paggiyahan di siya Panginuun. Ag dahil sa kaayadan Panginuun, mayad di kay magpakiusa manugpamahala pirisuhan sa kan Husi.

²² Nakan ikinatiwala niya sa kan Husi ti pagpamahala sa tanan pirisu hanggan sa tanan buruwatun sa pirisuhan.

²³ Unman nag-alinlangan ti manugpamahala pirisuhan sa manga ikinatiwala niya pag butang sa kan Husi, dahil paggiyahan Panginuun si Husi ag pagpapaladan sa tanan pagbuwatun niya.