Gimpuunan 38 - Hanunuu

Si Huda ag si Tamar

¹ Ati katpung, napablag si Huda sa kay manga patar-ari ag nangulian kaibahan ni Hira taga Adulam.

² Ati pag nakilala ni Huda kay anak ni Suwa taga Kanaan ag kay inasawa.

³ Nagras-ug ti udas, namuduy kay asawa ag nanganak lalaki, pinaingarnan Ir ni Huda ti lapsag.

⁴ Namuduy maan kay asawa ag nanganak lalaki ag pinaingarnan niya Unan.

⁵ Namuduy waya gid kay asawa ag nanganak lalaki ag pinaingarnan niya Sila. Ainanak si Sila sa Kisib.

⁶ Si Tamar ti napili ni Huda hampay asawan-un niya anak panganay ni Ir.

⁷ Dapat si Ir daut gid sa magbantay Panginuun, nakan minatay siya Panginuun.

⁸ Nakan magkun si Huda sa kan Unan, “Asawan-a kanmu bayaw dahil katungdanan nimu tunda bilang patar-ari niya asawa namatay, hampay sa panab-anan nimu magkaimaw diman anak kanmu patar-ari.”

⁹ Dapat alam ni Unan balaw bumaliw kanya ti mianak nida pag anak, nakan kada mag-ululidan sida ni Tamar, balaw niya pag-islud kay similya hampay unman sida magkaanak para sa kay patar-ari.

¹⁰ Daut kay binwat ni Unan sa magbantay Panginuun, nakan minatay diman siya Panginuun.

¹¹ Magkun si Huda sa kay umagad sa kan Tamar, “Pag-uli dap kawu sa kanmu ama, ag danga dap kawu mag-asawa hanggan sa udwaya magkalay-awan si Sila.” Sinabi tunda ni Huda dahil magkadala siya barang mamatay diman si Sila parihu sa kay manga patar-ari. Nakan nuli dap ngani si Tamar sa kay ama.

¹² Sa kadugayun, namatay kay asawa ni Huda. Igu natapus kay magpanrukuan, nag-ati siya sa kay manga manug-uguy bulbul manga karanidu ati sa Timna. Kaibahan niya nag-ati kay suud kakilala si Hira taga Adulam.

¹³ May nagtultul sa kan Tamar kuntay kay manugang atabug sa Timna hampay uguyan ati kay manga karanidu.

¹⁴ Igu nasaydan tunda ni Tamar, inilisan niya kay rutay pan balu, ag tinumungan kay uyahun. Tinmukaw siya sa may sabian banwa Inaim, sa saruy dalan atabug sa Timna. Gayak niya dayaun si Huda dahil udwaya pag-ipakaun sa kanya si Sila una kan-akan yi inda hampay kay asawan-un.

^15-16 Igu nakitan ni Huda si Tamar, unman niya nakilala kay umagad maaw inda dahil may panaung kay uyahun. Kay isip usa inda ka babayi baraydan. Nakan napakarani siya sa kay arani sa saruy dalan ag magkun, “Abala, man-ululidan kita.” Sinmagut si Tamar, “Hintay kanmu ibayad sa kangku nu mangulid aku sa kanmu?”

¹⁷ Magkun si Huda, “Pakan-an niku kawu kambing ginan sa kang manga hayup.” Sinmagut si Tamar, “Hu, pasnu aku nu may iayaw kawu sa kangku hampay makasiguru aku manbayad kawu sa kangku tugka sa maipadara yi nimu ti kambing.”

^18-19 Nagpaingana si Huda, “Hintay pag garantiya kam pagkaibgan?” Sinmagut si Tamar, “Ayawan sa kangku ti paggamitun nimu pag pantatak hanggan kay panhigut, bag-u kanmu sugkud.” Nakan ipinakaun ngani tunda ni Huda ag nangulid siya sa kan Tamar. Siyun ginan, nuli si Tamar, bag-u bin-ul niya kay tumung sa kay uyahun ag isinulung maan kay rutay pan balu. Igu dugay, namuduy siya.

²⁰ Udwaya dugay, ipinatibu ni Huda ti kambing sa kakilala niya sa kan Hira taga Adulam hampay bul-un ti ipinakaun niya pag manga bagay sa babayi bilang garantiya, dapat unman niya siya nakitan.

²¹ Nagpaingana si Hira sa manga tawu taga Inaim nu naan yi ti babayi baraydan matukawan sa saruy dalan. Dapat nagsagut ti manga tawu, “Unman waydi kami may nakitan babayi katida atay.”

²² Nakan nagbalik si Hira sa kan Huda ag magkun, “Unman niku siya nakitan. Ag magkun ti manga tawu unman kunu may babayi katida ati.”

²³ Magkun si Huda, “Pabay-anan yi lang nita itagu niya ti manga ipinakaun niku pag gamit sa kanya, dahil barang kasarin-an waya kita manga tawu maghanap kita sa unman. Una katida, pinatibuan di niku siya kambing dapat unman nimu siya nakitan ati.”

²⁴ Nakalawuy ti tulu ka bulan, nabaritaan ni Huda kay umagad si Tamar nanpabili kay bilug ag namuduy inda. Nakan magkun si Huda, “Daraha niyu siya sa luwas banwa ag sunuga.”

²⁵ Dapat igu ipinalwas yi si Tamar, nanpasabi siya sa kan Huda, “Indaay ti pantatak hanggan ti higut bag-u ti sugkud. Ti may apu inda imaw kay ama niku anak sa kang tiyan. Kilalan-a niyu nu kantapu inda.”

²⁶ Nakilala ni Huda kanya tunda pag manga gamit nakan magkun siya, “Balaw siya may kasalanan. Aku ti may salan dahil unman niku pinasnuan maasawa niya kang anak si Sila.” Udyi nag-uman nag-ulid si Huda sa kan Tamar.

²⁷ Pagka arani yi manganak si Tamar, naalaman kay pag-ibuduy maaw siing.

²⁸ Igu magpanganak yi siya, linmuwang ti kamang usa ka lapsag. Hinigtan manughilut higut maragang hampay maalaman inda ti un-an ilinusad.

²⁹ Dapat hinugut maan lapsag kay kamang ag kay usa di ti un-an linmuwang. Magkun ti manughilut, “Mag-una man kawu magluwang.” Nakan iningarnan Paris ti lapsag.

³⁰ Bag-u linmuwang diman waydi kay kasiing may higut maragang sa kamang. Ag iningarnan siya Sira.