Gimpuunan 30 - Hanunuu

¹ Si Rakil unman waya gid magbuduy, nakan maghirak siya sa kan Liya. Magkun siya tag kan Hakub, “Pakan-i nimu aku anak dahil nu unman, pihu gid mamatay aku!”

² Nangisug si Hakub sa kanya ag magkun, “Hayga, Diyus aw aku? Siya ti nagpasya balaw kawu magkaanak.”

³ Magkun si Rakil, “Nu katida, pag-ulid kawu sa kan Bilha sa kang suruguun hampay sa panab-anan niya magkaimaw diman aku anak.”

⁴ Nakan ipinakaun niya si Bilha sa kan Hakub bilang asawa, ag nangulid ngani si Hakub sa kan Bilha.

⁵ Namuduy si Bilha ag nanganak lalaki.

⁶ Magkun si Rakil, “Bin-ul yi Diyus kang magkay-a. Dinungug Diyus kang darangin dahil pinakan-an niya aku usa ka anak lalaki.” Nakan pinaingarnan niya Dan ti lapsag.

⁷ Namuduy maan si Bilha kay suruguun ni Rakil ag nanganak lalaki kay pangadwa anak nida ni Hakub.

⁸ Magkun si Rakil, “Masyadu gid kanmi mag-irisgan magtar-ari, ag nanalu aku.” Nakan pinaingarnan niya Niptali ti lapsag.

⁹ Pagka udyi mag-anak si Liya, pinaulid niya sa kan Hakub kay suruguun si Silpa.

¹⁰ Namuduy si Silpa ag nanganak lalaki.

¹¹ Magkun si Liya, “Mapalad aku.” Nakan pinangaranan niya Gad ti lapsag.

¹² Ainanak maan ni Silpa kay ikadwa pag anak lalaki nida ni Hakub.

¹³ Magkun si Liya, “Masulung gid aku! Taynguna ingarnan aku manga babayi masulung.” Nakan pinangaranan niya Asir ti lapsag.

¹⁴ Tag-ani tirigu ati katpung kay mag-atag ni Rubin sa tanman ag may nakitan siya manga tanum mandragura. Binmuul siya kay burak inda ag dinara sa kay ina sa kan Liya. Igu nakitan tunda ni Rakil magkun siya tag kan Liya, “Pakan-i duy aku manga mandragura dara nimu anak.”

¹⁵ Dapat sinmagut si Liya, “Udwaya aw kawu magkasulung sa kanmu pagbuul sa kang asawa? Taynguna, bul-un waya nimu ti manga mandragura niku anak?” Magkun si Rakil, “Nu pakan-an nimu aku manga mandragura ipaulid niku si Hakub sa kanmu taynguna pag yabi.”

¹⁶ Marukirum yi kay magras-ug ni Hakub ginan sa tanman, sinulang siya ni Liya ag magkun, “Kailangan sa kangku kawu pag umulid taynguna pag yabi, dahil binayadan yi niku kawu sa kan Rakil manga mandragura dara niku anak.” Nakan nangulid ngani si Hakub sa kan Liya sa tunda pag yabi.

¹⁷ Dinungug Diyus ti darangin ni Liya ag namuduy siya. Nanganak siya lalaki kay ikalima pag anak nida ni Hakub.

¹⁸ Magkun si Liya, “Pinapaladan aku Diyus dahil ipinakaun niku kang suruguun sa kang asawa.” Nakan pinaingarnan niya Isakar kay lapsag.

¹⁹ Namuduy maan si Liya ag nanganak lalaki ti ikan-um pag anak nida ni Hakub.

²⁰ Magkun siya, “Pinakan-an aku Diyus mayad pag pakaun. Pahalgaan yi aku niku asawa taynguna dahil napakan-an yi niku siya unum ka anak pudu lalaki.” Nakan pinaingarnan niya Sabulun ti lapsag.

²¹ Udyi dugay, nanganak si Liya babayi ag pinaingarnan niya Dina.

²² Unman diman kinalimtan Diyus si Rakil. Dinungug niya kay darangin magkaanak siya hanggan.

²³ Namuduy siya ag nanganak lalaki. Magkun siya, “Bin-ul Diyus kang kakay-ahan.”

²⁴ Nakan pinaingarnan niya Husi ti lapsag dahil magkun siya, “Mana pakan-an aku Panginuun usa waya ka anak.”

Ti Kasunduan ni Hakub ag ni Laban

²⁵ Igu ainanak ni Rakil si Husi, magkun si Hakub sa kan Laban, “Pasnui yi duy nimu aku makauli sa kanmi rugar.

²⁶ Pakan-an yi duy sa kangku kang manga asawa hanggan kang manga anak, dahil tabanun yi niku sida sa kang pagbalik sa kanmi. Alam di waydi nimu kang-ud kang sirbi sa kanmu.”

²⁷ Sinmagut si Laban, “Nu mahimu danga dapu. Angay sa kang nanpahula, pinapaladan gid aku Panginuun dahil sa kanmu.

²⁸ Sabiha lang sa kangku nu pira kang ibayad sa kanmu ag bayadan niku kawu.”

²⁹ Magkun si Hakub, “Alam duy nimu nu kabitay kang nagsirbi sa kanmu ag nu kabitay pag yinmamu kanmu manga hayup dahil sa kang pag-alaga.

³⁰ Sa kang magras-ug sitaay, pira-pira wata kanmu manga hayup, dapat taynguna mayamu yi, dahil pinapaladan kawu Panginuun dahil sa kangku. Taynguna, kailangan yi siguru aku magsikap para sa kang sadili magtal-anakan.”

³¹ Nagpaingana si Laban, “Hintay lugud kanmu gustu kang ibayad sa kanmu?” Sinmagut si Hakub, “Danga yi nimu aku pag bayadi. Iparargu niku kang mag-alaga sa kanmu manga hayup nu pumasnu kawu sa kang hilingun:

³² Bantayan niku taynguna kanmu manga hayup ag bul-un niku ti manga mabiru pag karanidu hanggan ti manga buntuk-buntukan pag manga kambing. Tida yi lang kanmu pinagkabayad sa kangku.

³³ Rumas-ug ti sirang, maalaman nimu nu masarigan aku ngatay unman nu alamun nimu ti manga ibinayad nimu pag manga hayup sa kangku. Nu may makitan duy kawu kambing balaw buntuk-buntukan ngatay karanidu balaw mabiru, mahimu duy sabihun nimu tunda kang tinakaw.”

³⁴ Sinmagut si Laban, “Nu katunda kanmu gustu, hu pasnu aku.”

³⁵ Dapat sa tunda diman pag sirang, ipinasaman ni Laban ti manga buntuk-buntukan pag kambing lalaki ag babayi, hanggan ti manga mabiru pag karanidu. Ipinaalaga niya inda sa kay manga anak lalaki.

³⁶ Ipinasaman niya inda sa kan Hakub sa tulu ka sirang nu lakawun kay kaarayu. Ti nasawad pag manga hayup imaw ti pagtanudan ni Hakub.

³⁷ Nagbuul si Hakub manga sanga almindru, abilyanu, ag kastanyu, bag-u kay iba ka bahagi binul-an niya lukub, nakan may buntuk-buntukan malagti nu bantayun ti manga sanga.

^38-39 Ipinauli niya tunda pag manga sanga sa atubangan irinman manga hayup hampay makitan inda nu mag-inum sida. Ati sa atubangan manga sanga pag mag-aramaan ti manga kambing nu mag-inum sida. Batik-batik kanda manga anak nu mag-anak sida.

⁴⁰ Dapat saman kan Hakub binwat sa manga karanidu: Habang mag-aramaan tunda pag manga hayup, pag-ipasrangu niya sida sa manga buntuk-buntukan pag kambing hanggan sa mabiru pag kambing ni Laban. Nakan nakatipun diman si Hakub kay sadili niya manga hayup ag balaw niya inda ipinaamut sa manga hayup ni Laban.

⁴¹ Nu mag-aramaan yi ti manga hayup mayad kay bilug ati sa may irinman, pag-ipauli rargu ni Hakub tunda pag manga sanga sa kanda atubangan.

⁴² Dapat nu malumuy pag manga hayup ti mag-aramaan, unman niya pag-ipauli ti manga sanga, nakan ti manga malumuy kan Laban di ag ti manga maliksi kay bilug kan Hakub.

⁴³ Sa panab-anan tunda, nagyaman gid si Hakub. Yinmamu kay manga hayup hanggan kay manga kamilyu ag asnu. Yinmamu diman hanggan kay suruguun lalaki ag babayi.