Gimpuunan 25 - Hanunuu

Ti Iba ka manga Linahi ni Abraham

¹ Nangasawa maan si Abraham, ag kay ngaran niya asawa si Kitura.

² Kanda manga anak sida ni Simran, ni Huksan, ni Midan, ni Midyan, ni Isbak ag ni Suwa.

³ Si Huksan kay ama nida ni Shiba ni Didan. Kay manga linahi ni Didan ti manga Asuriyu, Litusiyu, ag Liyumyu.

⁴ Kay manga anak lalaki ni Midyan sida ni Ipa, ni Ipir, ni Hanuk, ni Abida ag ni Ildaa. Sida tanan ti manga linahi ni Kitura.

^5-6 Bag-u namatay si Abraham, tinayakan niya ti tanan niya kasiyunan sa kan Isaak. Dapat pinakan-an niya manga pamakaun ti iba niya ka manga anak sa iba niya ka manga asawa, ag ati baliwa pag daga sa butlakan niya sida pag ipinatahan, arayu sa kay anak, sa kan Isaak.

Ti Pagkamatay ag Paglubung sa kan Abraham

⁷ Nabuhi si Abraham sa sulud usa ka gatus may pitungpulu ka timpu.

⁸ Namatay siya gurangun yi gid. Bag-u ipinaamut siya sa kay manga katawuhan namatay yi.

⁹ Ilinbung siya niya manga anak nida ni Isaak ni Ismail ati sa lukib sa Makpila, sa may butlakan Mamri, sa bantud magkaapu ni Iprun kaybi kay anak ni Suhar usa ka Hitiyu.

¹⁰ Tunda pag tanman binili ni Abraham sa atubangan manga Hitiyu. Ati pag ilinbung si Abraham hanggan kay asawa si Sara.

¹¹ Igu namatay si Abraham, pinapaladan Diyus si Isaak ag ati siya pag nangulian sa Biir Lahay Ruy.

Kay manga Linahi ni Ismail

¹² Inda ti tultulanun tungkul sa magtal-anakan ni Ismail kay anak ni Abraham sa kan Hagar usa ka Ihipsiyu, kay suruguun ni Sara.

¹³ Inda kay manga ngaran anak ni Ismail ginan sa akaan: Nibayut, Kidar, Adbiil, Mibsam,

¹⁴ Misma, Duma, Masa,

¹⁵ Hadad, Tima, Hitur, Napis ag Kidima.

¹⁶ Sida ngani kay manga anak ni Ismail, ti takinan 12 ka linahi ni Ismail. Kanda manga ngaran imaw ti ipinaingaran sa tuhay-tuhay pag rugar kanda inulianan.

¹⁷ Nabuhi si Ismail 137 ka timpu. Namatay siya ag ipinaamut siya sa kay manga katawuhan namatay yi.

¹⁸ Nangulian kay manga linahi sa manga rugar ginan sa Habila tugka sa Sur, sa butlakan Ihiptu atabug sa Asirya. Kanda linabanan ti tanan nida katawuhan, ti manga linahi ni Isaak.

Ti Kapanganakan ni Isaw ag ni Hakub

¹⁹ Inda ti tultulanun tungkul sa magtal-anakan ni Isaak kay anak ni Abraham.

²⁰ Si Isaak 40 yi ka timpu sa kay nag-asawa sa kan Ribika, kay anak ni Bitwil usa ka Amuriyu taga Padan Aram. Si Ribika kay patar-ari ni Laban, Amuriyu diman.

²¹ Dahil baug si Ribika, nandarangin si Isaak sa Panginuun hampay magkaimaw anak. Dinungug Panginuun kay darangin, nakan namuduy si Ribika.

²² Mag-asaydan niya magtululangan ti siing lapsag sa basad tiyan. Magkun si Ribika, “Hayga kainda ti magpangyari sa kangku?” Nakan nagpaingana siya sa Panginuun tungkul siyun. Magkun ti Panginuun sa kanya,

²³ “Ginan sa kanmu duwa ka lapsag asan sa kanmu basad tiyan ti gimpuunan duwa ka nasyun; duwa ka puru tawu ti manlalabanan. Kay usa bumaliw makapangyarihan kaysa usa. Kay akaan sumirbi sa kay ari.”

²⁴ Pagka nanganak yi ngani si Ribika, siing kay anak.

²⁵ Kay un-an linmuwang maragang-ragang, nakan iningarnan nida siya Isaw.

²⁶ Igu linmuwang kay ikadwa, kay kamang mahiyaptan sa bingul niya patar-ari, nakan iningarnan nida siya Hakub. Si Isaak 60 yi ka timpu igu nanganak siing si Ribika.

Ipinabili ni Isaw Kay Karampatan bilang Panganay

²⁷ Igu nagdaka ti duwa ka lapsag, binmaliw maliksi pag manug-idu si Isaw ag pirmi siya sa tanman, ag si Hakub waydi mabuut pag tawu ag pirmi siya sa sulud manga turda.

²⁸ Pagmahalun gid ni Isaak si Isaw dahil maraibgun siya magkaun manga inidu ni Isaw, dapat si Hakub pagmahalun waydi ni Ribika.

²⁹ Sa usa ka sirang, habang magtama sinabakanan si Hakub, rinmas-ug si Isaw ginan sa katalunan magkalun-us yi gid.

³⁰ Magkun siya tag sa kan Hakub, “Aduy, nai gid duy aku kanmu pagtamaun sabakan maragang-ragang dahil magkalun-us yi gid aku.” (Nakan pag-ingarnan diman Idum si Isaw.)

³¹ Dapat sinmagut si Hakub, “Pakan-an niku kawu inda nu ipakaun nimu sa kangku kanmu karampatan bilang panganay.”

³² Magkun si Isaw, “Hu pasnu aku, hintay waydi kang mabuwat sa tunda pag karampatan niku nu mamatay lang waydi aku sa lun-us.”

³³ Sinmagut si Hakub, “Nu katunda pag sumpa dap kawu sa kangku.” Nakan nansumpa ngani si Isaw miatag sa kan Hakub kay karampatan niya bilang panganay.

³⁴ Susun pinakan-an siya ni Hakub tinapay hanggan sabakan. Igu nakakaun siya ag nakainum, ginminan yi maan. Dahil sa tunda pag binwat ni Isaw, binul-an niya halaga kay karampatan bilang panganay.